Dielulula 32 - MUKANDA WA MYIDI MUKULU

¹ Diulu, teleja tshindi ngamba, buloba, umvua miaku yanyi.

² Bindi ndongesha bitampakane miaba yonsu, bu mudi mvula usankisha madimi. Mibelu yanyi imuangalake, mudi lumuma lutangalaka ku bisosa.

³ Ndi ntumbisha dina dia Maweja-Nangila. Bena Izrayele, samunayi Mvidi Mukulu wetu.

⁴ Maweja-Nangila udi ne bukole bu lubuebue. Bionsu bidiye wenza, bidi bimpe. Bidiye wamba, bidi bilelela. Bidiye ulaya, udi ubikumbaja. Udi wenza amu malu mimpe.

⁵ Kadi nuenu, bena Izrayele, nudi bantu babi, bapale. Nudi babenge Maweja-Nangila, batufuisha bundu. Kanutshiena bana bende kabidi to.

⁶ Nudi bantu ba tshianana, kanuyi lungenyi! Munudi nuenzela Maweja-Nangila nanku mbishi? Kena Tatuenu, kena mufuki wenu anyi? Kena munusungule, bua nuikale bantu bende anyi?

⁷ Vulukayi matuku a kale. Elayi meji ku bidimu bimane kupita. Ebejayi baledi benu, nebanuambile bivua bienzeka. Konkayi bakulumpe, nebanulondele malu a kale.

⁸ Mvidi Mukulu wa bukole buonsu, mmuabanyine bantu matunga. Udi mushindike mikalu ya bisamba, muteke tshisamba tshionsu ku bumfumu bua muena mu diulu.

⁹ Udi mudisunguile bena Izrayele, muenze ndelanganyi ya Yakobe bantu bende.

¹⁰ Maweja-Nangila kusangana bena Izrayele mu tshipela, munkatshi mua miadi ya mibuabua. Kubakubaye, kubalongeshaye, kubalamaye bu mudi muntu ulama disu.

¹¹ Maweja-Nangila udi ukuba bena Izrayele, mudi nyunyi wa tshiminyi upapala pa mutu pa disua diende, wibidija bana bende bua kubuka mulu, nansha wolola mapuapua muinshi mua bana bua kabamatshi panshi.

¹² Eyowa, Maweja-Nangila nkayende mmulombodi wa bena Izrayele, kakuyi mvidie mukuabu nansha umue umuambuluisha.

¹³ Maweja-Nangila mmubapeshe ditunga dia mikuna, mubadishe ne biakudia bia mu madimi, mubapatule buitshi mu lubuebue. Mmumeneshe mitshi ya olive mu buloba bua mabue.

¹⁴ Ngombe ne mikoku kubapesha mabele. Bana ba mikoku, bimpanga bia mafuta ne mbuji ya mpumbu, kubapetesha munyinyi. Kudiabu bukula buimpe butambe, banua ne maluvu a mvinyo, makunze bu mashi.

¹⁵ Yeshurune mumane kudia mukute, mumane kudiunda, kusenena, kulengulula Mvidi Mukulu uvua mumufuke, kupetula mulami wende ne mupandishi.

¹⁶ Bena Izrayele bavua bafikisha Maweja-Nangila munda, benza malu mabi, batendelela mvidie ya bisamba bikuabu.

¹⁷ Kulambulabu bifukibua, kabiyi nansha mvidie, milambu. Mvidie mipiamipia ayi, kabavua bayimanye. Bankambua kabavua bayinemeka.

¹⁸ “Eyowa, bena Izrayele, nudi balengulula Maweja-Nangila, mulami wenu uvua munupeteshe muoyi. Yeye ke udi munufikishe ku bantu.”

¹⁹ Maweja-Nangila umona muvua bana bende bamuseka, uvua ne kanyinganyinga kakole.

²⁰ Ke Maweja-Nangila kuamba ne: “Tshiena mua kutekemena kudi bena Izrayele to. Kabena ne kanemu nansha kakese to. Tshiena musue kubalama kabidi to. Nemmone bidi mua kubenzekela.

²¹ Bena Izrayele mbamfikishe munda, bajule tshiiji tshianyi, bualu neatendelele mvidie ya dishima. Nanku meme nembasongakaje ne tshisamba tshia bantu, tshidi katshiyi tshisamba mene. Nenjule tshiiji tshiabu, ne bantu badi kabayi ne lungenyi.

²² Eyowa, Meme Maweja-Nangila ndi ne tshiiji tshikole, tshidi tshifika too ne mu kandondu ka bafue. Tshidi tshiosha, bu mudi kapia kosha biakudia, kabibutula, tshidi tshiosha too ne tshitaku tshia mikuna.

²³ Ndi musue kubavudijila makenga. Ndi musue kubasa mikete yanyi yonsu.

²⁴ Nzala mimane kutekesha bena Izrayele, mubidi luya ne disama dia tshiambu bimane kubakuata, nembatumine nyama ya lonji, kabidi ne nyoka ya lulengu.

²⁵ Nebabashipe ne muele mu misesu. Nebafue ne bowa mu nzubu yabu. Lufu nelubakuate bonsu, bansongalume ne bansongakaji, bakulumpe ne bana.”

²⁶ “Mvua musue kubutula bena Izrayele bonsu, kabayi mua kubatela kabidi pa buloba.

²⁷ Kadi bena lukuna babu bavua mua kunseka, kuela meji ne: tuetu ke bavua bababutule, Maweja-Nangila kena ne tshidiye wenza.

²⁸ Bena Izrayele ntshisamba tshidi katshiyi ne meji, mbantu badi kabayi ne lungenyi.

²⁹ Bobu bele meji kakese, bavua mua kutshinka kudi buenzayi buabu mua kubafikisha.

³⁰ Pandi meme Maweja-Nangila, lubuebue ludi bukole buabu, mbafila mu bianza bia baluishi babu, muluishi umue neatshimune bena Izrayele tshinunu, baluishi babidi nebanyemeshe bena Izrayele binunu dikumi.

³¹ Kadi baluishi ba bena Izrayele mene mbamanye ne: mvidie yabu idi ibalama kayena ne bukole, bu bua Mvidi Mukulu wa bena Izrayele to.

³² Baluishi abu, badi amu bu bena Sodome ne bena Ngomore. Mbafuanangane ne mutshi wa mvinyo, udi ukuama tumuma tua bululu ne tua lulengu.

³³ Maluyu abu a mvinyo, adi bu lulengu lua nyoka.

³⁴ Meme ndi Maweja-Nangila, teleja tshindi ndongolola mu musokoku, bua kukengesha baluishi benu.

³⁵ Dituku dia kabutu, nembasombuele, bua bapete difutu dia buenzayi buabu. Dituku dia kubutula baluishi ba bena Izrayele, dikadi pabuipi, bukole buabu nebujimine.”

³⁶ Padi bena Izrayele kabatshiyi ne bukole, kabayi ne muntu udi mua kubambuluisha. Maweja-Nangila neabafuile luse. Neabambuluishe, akosa nsambu yabu pa yoyi.

³⁷ Maweja-Nangila neebeje bena Izrayele ne: “Mvidie yenu inuvua batekemene idi penyi?

³⁸ Nuvua bayilambule nyama, bayilambule maluvu a kunua. Nanku ileje bukole buayi, inupandishe, inulame ne muoyi!

³⁹ “Nuenu bena Izrayele, nujadike lelu ne: meme Maweja-Nangila nkayanyi, ndi nnusungidila. Kakuena mvidie mukuabu to, anu meme. Meme ndi mfuisha bantu, mbalama ne muoyi. Ndi mbatapa mputa, mbondapa kabidi. Udi mua kunyenga muntu mu tshianza tshianyi udiku anyi?

⁴⁰ Meme Maweja-Nangila ndi nditshipa, ngela tshianza mulu, ngamba ne: ‘Ndi ne muoyi kashidi ne kashidi.

⁴¹ Ndi nnona muele wanyi wa mvita, ndi ndumbuluisha bantu, mbanyoka. Ndi musue kusombuela baluishi banyi, kufuta bonsu badi bankina.

⁴² Mikete yanyi neitampakane mashi, muele wanyi neukose munyinyi. Baluishi banyi bonsu nebabutuke, nembakuate; nebatapike mputa.’ ”

⁴³ Bisamba bionsu bitumbishe bantu ba Maweja-Nangila. Maweja-Nangila neasombuele bua lufu lua bantu bende. Neanyoke baluishi ba bena Izrayele bonsu. Neafuile ditunga dia bena Izrayele luse, neasambe benadi.

⁴⁴ Moshe ne Yoshuwa, muana wa Nune, kuimana kumpala kua bena Izrayele, kubabadila miaku yonsu ya musambu ewu ne diyi dikole.

⁴⁵ Moshe mumane kumanyisha bena Izrayele malu onsu avua Maweja-Nangila muambe,

⁴⁶ kubabelaye ne: — Mikenji yonsu indi nnuambila lelu eyi, nuyikumbaje. Nuyilongeshe ndelanganyi yenu, bua ikumbaje tshidi Mvidi Mukulu musue.

⁴⁷ Mikenji eyi kayena anu meyi patupu, kadi idi inupetesha muoyi. Nuenu bayikumbaje, nenushale ne muoyi matuku a bungi mu ditunga dinuyaya kubuela dishiya dia Yardene.

Badi bamanyisha lufu lua Moshe

⁴⁸ Anu dituku adi, Maweja-Nangila kuambila Moshe ne:

⁴⁹ — Uye pa mukuna wa Abarime, mu ditunga dia Mowabe, pabuipi ne Yeriko. Ubande ku lusongu lua mukuna wa Nebo. Ubandile ditunga dia Kenaane, dindi mpesha bena Izrayele bua dishale diabu.

⁵⁰ Pashishe neufuile pa mukuna apu, bua ulonde bankambua bebe. Ke muvua muanenu Arone mufuile pa mukuna wa Ore, mulonde bankambua bende.

⁵¹ Wewe ne Arone, nuvua bangenzele bibi bitambe, bena Izrayele bonsu bamone, mu Kadeshe mu tshipela tshia Tsine, bua tshilumbu tshia mayi a ku Meriba. Nuvua ne mpata, kanuvua banyishe bua meme kuleja ne: ndi wa tshijila.

⁵² Nanku, ditunga dia Kenaane dindi mpesha bena Izrayele, wewe Moshe neudimuene anu pa bule. Kadi kuena ubuelamu to.