Dielulula 28 - MUKANDA WA MYIDI MUKULU

Bena diakalenga

¹ Nuenu bitabe Maweja-Nangila Mvidi Mukulu wenu, bakumbaje bimpe mikenji yende yonsu indi nnumanyisha lelu eyi, nenuikale bena diakalenga bapite bisamba bionsu bia pa buloba.

² Nanku Maweja-Nangila Mvidi Mukulu wenu neanusankishe mushindu ewu:

³ Bantu badi mu tshimenga, nansha badi mu misoku, Maweja-Nangila neabele lupemba.

⁴ Maweja-Nangila neanupe bana ba bungi, biakudia bipite bungi pa madimi enu; neavudije ngombe yenu, mikoku ne mbuji.

⁵ Maweja-Nangila neanupe bimuma, ne ntete bisaka tente.

⁶ Maweja-Nangila neanuele lupemba diba dionsu ne miaba yonsu.

⁷ Maweja-Nangila neanuambuluishe bua nutshimune baluishi benu. Pikalabu bavuile njila umue, nebanyeme bapingena mu njila muanda mutekete mishilangane.

⁸ Maweja-Nangila Mvidi Mukulu wenu nealame biakudia bionsu binudi bateke mu mayeba enu. Neanuendeshe diakalenga ku midimu yenu yonsu. Nanku neanusankishe bulelela, mu ditunga didiye munupe.

⁹ Nuenu bakumbaje mikenji ya Maweja-Nangila Mvidi Mukulu wenu, benze mudiye musue, nenuikale tshisamba tshia bantu bende, bu muvuaye mumane kunulaya.

¹⁰ Bantu ba bisamba bikuabu bionsu nebamone munudi bantu ba Maweja-Nangila, badi bamuenzela mudimu. Nanku nebanutshine.

¹¹ Panuafika mu ditunga divua Maweja-Nangila mulaye bankambua benu bua kunupesha, nenulele bana ba bungi. Bimuna bienu nebivulangane. Kabidi nenuikale ne biakudia bipite bungi.

¹² Bena Izrayele, Maweja-Nangila neanunzuluile tshibuashibuashi, muaba udiye mulame mayi a mvula. Neanulokeshile mvula anu pa diba diende, bua midimu yenu yonsu itante. Nanku kanuakusomba makuta kudi bantu ba bisamba bikuabu to. Amu bobu nebikale banusomba.

¹³ Nanku, nuenu bakumbaje mikenji yonsu ya Maweja-Nangila Mvidi Mukulu wenu, indi nnumanyisha lelu eyi, nenuikale bena diakalenga bapite bisamba bionsu bia pa buloba. Kanuakushadila kudibu to. Nenuikale nubatumina diyi.

¹⁴ Kanuena mua kubenga nansha kakese mikenji imvua munuambile bua kuya kutendelela mvidie mikuabu.

Bena diakabi

¹⁵ Kadi panuikala kanuyi nuitaba, kanuyi nutumikila meyi ne mikenji bia Maweja-Nangila Mvidi Mukulu wenu, bindi nnumanyisha lelu ebi, neanunyoke mushindu ewu:

¹⁶ Bantu badi mu tshimenga, ne badi mu misoku, Maweja-Nangila neabendeshe diakabi.

¹⁷ Maweja-Nangila kakunupa bimuma, ne ntete bisaka tente to. Nebishale anu munda mutupu.

¹⁸ Maweja-Nangila kakunupa bana ba bungi. Kanuakuikala ne biakudia bia bungi. Ngombe yenu, mikoku ne mbuji kabiakuvulangana to.

¹⁹ Maweja-Nangila neanuendeshe diakabi diba dionsu ne miaba yonsu.

²⁰ Nanku, Maweja-Nangila neanuendeshe diakabi mu bionsu binudi nuenza: nenuikale ne makenga, ntatu ne bowa, too ne panuabutuka bonsu lukasa, bualu nudi benze malu mabi, babenge Maweja-Nangila.

²¹ Nanku, mu ditunga didi Maweja-Nangila munupe bua kusomba, neanutumine tshipupu tshia disama dia tshiambu bua kunubutula.

²² Nenunyane, nupeta mubidi luya ne biuja. Biakudia bienu nebiume ne munanga; nansha nebibole. Neanukengeshe nenku too ne panuabutuka bonsu.

²³ Diulu nedikale dikole bu tshiamu tshikunze pa mitu yenu. Buloba nebuikale bushile bu tshiamu ku makasa enu.

²⁴ Maweja-Nangila kakunulokeshila mvula mu madimi enu to. Kadi neanutumine anu butu ne lupuishi, too ne panuabutuka bonsu.

²⁵ Maweja-Nangila neambuluishe baluishi benu bua banutshimune. Panuikala bayile njila umue bua kubaluisha, nenubanyeme, nupingane mu njila muanda mutekete mishilangane. Bakalenga bonsu ba pa buloba nebatshine, pamonabu bionsu bidi binuenzekela.

²⁶ Bitalu bienu, nebabidie kudi nyama ya mibuabua ne nyunyi ya mikanku, muntu kayi mua kuyipata to.

²⁷ Maweja-Nangila neanutumine masama mashilangane nuwuaye muenzele bena Ejipitu: mulaka, maputa, mpusu, ne tshikupi tshidi katshiyi mua kujika to.

²⁸ Neanutumine kabidi disama dia mukupa, dia bumfofu ne dia lungenyi lunyanguke.

²⁹ Nenuendakane munda munya, nubabata bintu bu mpofu. Midimu yenu kayakutungunuka to. Bantu nebanukengeshe bikole, nebanyenge bintu bionsu binudi nabi, muntu nansha umue kayi mua kunuakuila.

³⁰ Pikala muena Izrayele mubangile mukaji, nebabuelele mukaji awu mu nzubu kudi muntu mukuabu. Muntu muase nzubu, kakulalamu to. Yeye mukune mitshi ya mvinyo, kakupola tumuma tuende tua tshianyi nansha musangu umue.

³¹ Nebashipe ngombe yenu, nuenu batangile. Kanuakuyidia munyinyi wayi to. Nebibe mpunde yenu, nuenu batangile, kanuyi mua kuyipeta kabidi. Baluishi nebakuate mikoku yenu, kakuyi muntu udi mua kunuambuluisha.

³² Nebakuate bana benu ba balume ne ba bakaji mu bupika kudi bantu benyi, nuenu batangile. Nenuikale bindile batangila ku njila, kadi bana benu abu kabayi bapingana kabidi to.

³³ Tshisamba tshia bantu banudi kanuyi bamanye, netshinukengeshe, tshinunyenge biakudia bionsu binudi banowe.

³⁴ Panuamona malu onsu aa, nenuikale bu bantu badi ne disama dia mukupa.

³⁵ Maweja-Nangila neanutumine disama dikole dia biuja. Nebinuenze mu makasa, mu binu, ku bibelu, mu mutu too ne mubidi mujima, kakuyi mushindu wa kudiondapa.

³⁶ Pashishe Maweja-Nangila neanukuatshishe mu bupika ne mukalenga unuikala nende. Neanufikishe mu ditunga divua bankambua benu kabayi bamanye, nansha nuenu kabidi. Mu ditunga adi nentendelele mvidie idi anu mpingu ya mitshi misonga, nansha ya mabue.

³⁷ Bena mu matunga ikale Maweja-Nangila munutume, nebakuatshike bonsu bowa, bua bionsu bidi binuenzekela. Nebishale bu nsumuinu, bantu bonsu banuseka.

³⁸ Nenukune maminu a bungi mu madimi enu. Kadi nenunowe biakudia bikese, bualu nebabidie kudi mpasu.

³⁹ Nenukune mitshi ya mvinyo, nuyilame bimpe. Kadi kanuakunua maluvu ayi, kanuakupola nansha tumuma. Bualu nebatudie kudi meshi.

⁴⁰ Mu ditunga dienu nemuikale mitshi ya olive ya bungi. Kadi kanuakupetaku mafuta a kulaba pambidi to. Bualu tumuma atu netupoke, katuyi tuanji kuboba.

⁴¹ Nenulele bana ba balume ne ba bakaji. Kadi kanuakuikala nabu to, bualu nebaye mu bupika.

⁴² Mitshi yonsu ne biakudia bionsu bia mu madimi enu, nebabidie anu kudi mpasu ya mukumbi.

⁴³ Bantu benyi badi munkatshi muenu nebikale ne bukole bua bungi. Kadi bukole buenu nebukepele.

⁴⁴ Bantu abu, nebanusombeshe makuta, nuenu kanutshiyi ne tshia kubasombesha to. Nebikale bamfumu benu, nuenu nubenzela mudimu.

⁴⁵ Makenga onsu neanukuate, nukenga bikole too ne panuabutuka bonsu, bualu nuvua babenge kuitaba ne kukumbaja meyi ne mikenji bia Maweja-Nangila Mvidi Mukulu wenu.

⁴⁶ Makenga onsu aa neanuenzekele bua kunubela, nuenu ne ndelanganyi yenu.

⁴⁷ Panuapeta bintu bia bungi, kadi kanuyi nuenzela Maweja-Nangila Mvidi Mukulu wenu, mudimu ne disanka, ne muoyi wenu mujima,

⁴⁸ Maweja-Nangila neanutumine baluishi, banukuate ku bupika. Nenukenge ne nzala ne nyota, nupanga ne tshilamba tshia kuvuala. Maweja-Nangila neanuambuishe mukoolu wa tshiamu tshia bujitu pa makaya, too ne panuabutuka bonsu.

⁴⁹ Maweja-Nangila neanutumine baluishi, bafume kule ku ndekelu wa buloba, banudi kanuyi bamanye muakulu wabu. Maweja-Nangila neele bantu abu munkatshi muenu, bu mudi nyunyi wa tshiminyi wikila pa biakudia biende.

⁵⁰ Nebikale ne tshikisu, kabayi banemeka bantu bakulakaje, kabayi bafuila bana batekete luse.

⁵¹ Nebanyenge bimuna bionsu, ne biakudia bionsu binuvua banowe: ntete ya kuenza bukula, maluvu a mvinyo, mafuta, too ne bana ba ngombe, ba mikoku ne ba mbuji. Nenufue, nubutuke bonsu ne nzala.

⁵² Baluishi abu, nebanutshintshimike mu bimenga bionsu, bidi mu ditunga didi Maweja-Nangila Mvidi Mukulu wenu munupe. Nebanuluishe too ne pupuka bimana bile bia bimenga bienu, miaba inudi nuela meji ne: tudi basokome bimpe.

⁵³ Matuku adibu banutshintshimika awu, nebanukengeshe bikole. Nenudie munyinyi wa bana ba balume ne ba bakaji banudi balele, bikale Maweja-Nangila Mvidi Mukulu wenu munupe.

⁵⁴ Diba adi, muntu wa kunudi udi ne muoyi muimpe, wa kanemu, newoshe muanabu, nansha bana badiye mushale nabu, nansha mukajende, disu dia lonji.

⁵⁵ Bualu neatshine bua umue wa kudibu kavu kumubakula munyinyi wa bana bende abu. Bualu ke tshiakudia tshiende tshimuepele tshidiye mushale natshi. Kena ne mushindu wa kupeta tshikuabu, matuku adibu bamutshintshimike kudi baluishi bua kunukengesha mu bimenga bienu.

⁵⁶ Diba adi, mukaji wa muoyi muimpe, wa kanemu, neenze mushindu wa momumue. Uvua mubanji, kavua musue kuenda nansha ku makasa. Kadi mpindiewu newoshe bayende ne bana badiye mushale nabu ba balume ne ba bakaji, disu dia lonji.

⁵⁷ Newoshe muanende mutekete utshidiye ulelelaku, nansha nkishabende mene, disu dia lonji. Bualu matuku adibu bamutshintshimike awu, mukaji awu kena ne tshintu tshikuabu tshia kudia to. Neakebe mua kudia munyinyi wa bana bende abu mu musokoku, matuku adibu banukengesha mu bimenga bienu.

⁵⁸ Nuenu bena Izrayele, nukumbaje mikenji yonsu ya Mvidi Mukulu, idibu bafunde mu mukanda ewu. Nunemeke udibu binyike dina edi dia butumbi dia “Maweja-Nangila Mvidi Mukulu wenu.”

⁵⁹ Nuenu kanuyi bakumbaje mikenji eyi, Maweja-Nangila neanukengeshe bikole, nuenu ne ndelanganyi yenu yonsu. Nenupete mputa ya lubangu ne masama makole mavule adibu kabayi mua kuondapa.

⁶⁰ Maweja-Nangila neanukengeshe ne makenga makole onsu, anuvua batshine, avuaye mukengeshe nawu bena Ejipitu.

⁶¹ Neanutumine masama ne mputa bia mishindu yonsu, nansha bidibu kabayi bafunde mu mukanda ewu, too ne panuabutuka bonsu.

⁶² Nanku nansha nuenu bamane kusangana bu mitotu ya mulu, anu bantu bakese nebashale ne muoyi. Bualu nuvua babenge Maweja-Nangila Mvidi Mukulu wenu.

⁶³ Bu muvua Maweja-Nangila musanke bua kunuenzela bimpe, nuenu kusangana, ke muasankaye kabidi bua kununyoka, kunufikila munda, kunubutula. Neanumushe mu ditunga divuaye munupe bua kusomba.

⁶⁴ Pashishe neanumuangalaje miaba yonsu, munkatshi mua bisamba bia bende bidi pa buloba bujima. Neatendelele mpingu ya mvidie ya mabue, ne ya mitshi misonga, inudi kanuyi banji kumanya ku bankambua benu too ne mpindiewu.

⁶⁵ Munkatshi mua bisamba bia bende abi, kanuakuikala ne dikisha to. Kanuakuikala ne muaba wa kusomba to. Nanku Maweja-Nangila neanukengeshe bikole. Nenuikale ne kanyinganyinga mu mioyi yenu. Mesu enu kaakumona bimpe to. Nenuikale ne bowa, nuteketa mu maboku.

⁶⁶ Nenuikale ne mioyi kulukulu, nutshina amu lufu. Butuku ne munya nenuikale anu nuzakala.

⁶⁷ Panuamona bionsu ebi, nenuikale ne bowa, dinda nenujinge bua butuku buila lukasa, butuku nujinga bua butshia lukasa.

⁶⁸ Pashishe Maweja-Nangila neanuambule mu maatu, anupingaje kabidi mu Ejipitu, ditunga dimvua munuambile ne: kanuena mua kumufika kabidi. Muine amu, nuenu bonsu balume ne bakaji nenukebe kua kudisumbisha bu bapika kudi baluishi benu. Kadi muntu nansha umue kakunusumba to!

DIYUKI DIA NDEKELU DIA MOSHE

⁶⁹ Umvuayi muvua Moshe mutue ndondu ne bena Izrayele mu ditunga dia Mowabe, mu dina ne ku diyi dia Maweja-Nangila. (Ndondu ewu mmusakidila ku ndondu wa ku mukuna wa Sinayi.)