Dielulula 26 - MUKANDA WA MYIDI MUKULU

Bintu bia tshianyi Kutonda ditaba

¹ Nenufike mu ditunga didi Maweja-Nangila Mvidi Mukulu wenu munupe bua nudikuate. Nuenu bamane kuasamu,

² muntu yonsu wa kunudi angate tshitupa tshia biakudia bia tshianyi, bidiye mudime mu ditunga adi. Abiele mu tshisaka, atshiteke muaba wikala Maweja-Nangila Mvidi Mukulu wenu musungule bua kumonangana nenu.

³ Pashishe muntu awu aye kudi mutuangaji, udi wenza mudimu musangu awu, amuambile ne: “Lelu ndi mfila bintu ebi, bua kujadika ne: Maweja-Nangila Mvidi Mukulu webe, wamfikishi mu ditunga divuaye mulaye bankambua betu.”

⁴ Mutuangaji neangate tshisaka tshia biakudia atshi, atshiteke kumpala kua tshilambuilu tshia Maweja-Nangila Mvidi Mukulu wenu.

⁵ Pashishe muntu udi ufila bintu abi, neambe kabidi kumpala kua Maweja-Nangila ne: “Nkambua wanyi uvua muena Arame, kayi ne muaba wa kusomba. Kadi uyile kusomba ku Ejipitu ne tshisumbu tshikese tshia bantu bavuaye nabu. Bantu abu kuvulangana, kuenza tshisamba tshinene tshia bantu, tshia bukole kabidi.

⁶ Kadi bena Ejipitu kutukengesha, kutuenzeja midimu mikole ya bupika.

⁷ Tuetu kudidila Maweja-Nangila Mvidi Mukulu wa bankambua betu bua atuambuluishe. Kumvuaye miadi yetu. Kumonaye bionsu bivuabu batuenzele, muvuabu batutatshisha, batutuuta, batukengesha.

⁸ Maweja-Nangila kuenza bishima bishilangane bivua bikuatshisha bantu bowa. Kutupatulaye mu Ejipitu ku bukole.

⁹ Nanku watufikishi muaba ewu bua kutupa ditunga edi, didi ne biakudia bipite bungi.

¹⁰ Ke pandi ndambula Maweja-Nangila biakudia bia tshianyi bia mu ditunga didiye mumpe.” Pashishe muntu awu neateke tshisaka tshia biakudia atshi panshi kumpala kua nzubu wa Mvidi Mukulu, adiele panshi bua kukukuila Maweja-Nangila Mvidi Mukulu wenu.

¹¹ Pashishe nuenu bena Izrayele, nusanke ne meku enu onsu bua bionsu bidi Maweja-Nangila Mvidi Mukulu wenu munuenzele. Kadi nusanke pamue ne bena Levi, ne benyi badi mu ditunga dienu.

Tshia dikumi tshia tshidimu tshisatu

¹² Padi bidimu bisatu bikumbana, nenuikale ne “tshidimu tshia bia dikumi.” Nufile tshia dikumi, mmumue ne: tshintu tshimue tshia ku bintu dikumi binudi banowe. Biakudia abi, nebabiangate kudi bena Levi, bana ba nshiya, bakaji bakamba, ne benyi badi munkatshi muenu. Nanku nebikale ne biakudia bia bungi, kabayi bakenga munkatshi muenu.

¹³ Pashishe nenuambile Maweja-Nangila Mvidi Mukulu wenu ne: “Maweja-Nangila wanyi, ndi mukumbaje mikenji yebe yonsu. Tshia dikumi tshia biakudia bionsu bimvua nabi, ndi mupeshe bena Levi, bana banshiya, bakaji bakamba, ne benyi badi munkatshi muetu. Ku nzubu kuanyi, tshiena mushale ne tshintu tshiebe nansha tshimue. Tshiena mupue muoyi biuvua mutuambile pa bualu ebu.

¹⁴ Pamvua mu madilu, tshiena mudie tshia dikumi atshi. Pamvua ne mikiya, tshiena mutshilenge, nansha mutshilambule bua muntu mufue. Maweja-Nangila Mvidi Mukulu wanyi, ndi muteleje mikenji yebe, muyikumbaje yonsu.

¹⁵ Mu diulu, muaba webe wa tshijila, muudi musombe, wambuluishe tshisamba tshiebe tshia Izrayele, badi mu ditunga didi ne biakudia bia bungi, diudi mutupe bu muuvua mulaye bankambua betu.”

Bena Izrayele ntshisamba tshia Maweja-Nangila

¹⁶ Lelu Maweja-Nangila Mvidi Mukulu wenu udi unuambila, bua nukumbaje meyi ende ne mikenji yende. Nubitumikile ne muoyi mujima, ne bukole buenu buonsu.

¹⁷ Lelu Maweja-Nangila Mvidi Mukulu wenu, udi unulaya ne: nuenu benze mudiye musue, bakumbaje meyi ende ne mikenji yende, Yeye neikale Mvidi Mukulu wenu.

¹⁸ Nuenu kabidi nuvua bamulaye bua kuikala tshisamba tshiende, tshia bantu badiye mupite kunanga, badi bakumbaja meyi ende ne mikenji yende.

¹⁹ Eyowa, ku bisamba bionsu bidi Maweja-Nangila Mvidi Mukulu wenu mufuke, mmusue bua nuenu nuikale babapite ku lumu, ku butumbi ne ku buneme. Mmusue bua nuikale bantu bende, badi bamuenzela mudimu bu muvuaye mumane kunuambila.