Dielulula 25 - MUKANDA WA MYIDI MUKULU

Kukosa nsambu

¹ Pikala bena Izrayele babidi batandangana, nebaye kudi balumbuluishi bua kujadika udi mupite ne udi mubinge.

² Pikala muntu udi mupite mupete dinyoka dia kumutuuta mikaba bungi kampande, mulumbuluishi neamuladike panshi, bamututshishe mikaba ayi bungi bukumbanyine tshitema tshivuaye muenze, mulumbuluishi muikale koku.

³ Kadi kanuena mua kutuuta mikaba kupitshisha pa makumi anayi to. Bualu nuenu bapitshishe nenufuishe muanenu bundu ku mesu kua bantu.

Ngombe

⁴ Ngombe udi wenza mudimu wa kudiata miepu ya ntete ya kuenza bukula, kanuena mua kumuela nkata ku mbanga to.

Mukaji mukamba

⁵ Pikala bana ba balume babidi ba muntu umue basombe muaba umue, umue mufue kayi mushiye muana wa balume, mukaji wa mufue awu, kabena mua kumupiana kudi muntu mukuabu to, amu kudi bayende tshina.

⁶ Muana wa balume wa kumpala walela mukaji awu, nebamutangile bu muana wa mufue awu, bua kusangula dina dia mufue mu Izrayele.

⁷ Kadi pikala bayende tshina wa mukaji kayi musue kumupiana, mukaji neaye kudi bakulu ba mu tshimenga. Abambile ne: “Bayanyi tshina udi ubenga mua kumpiana. Kena musue kupesha muanabu muana bua kusangukaye.”

⁸ Nenku bakulu ba mu tshimenga atshi nebabikile mulume awu, bua abajadikile mudiye ubenga kupiana mukaji wa mufue.

⁹ Nanku mukaji neasemene kudi mulume awu, bakulu bonsu batangile, amukopole tshisabata, amufuile mate mu mesu, wamba ne: “Muntu yonsu udi ubenga bua kusangula diku dia muanabu, nebamuenzele anu mushindu ewu.”

¹⁰ Biangatshile dituku adi, nebabikile diku dia muntu awu ne: “Diku edi ndia muntu uvuabu bakopole tshisabata.”

Bidimba bidibu kabayi mua kulenga

¹¹ Pikala bantu balume babidi baluangana, mukaji wa mukuabu kufika bua kusungidila bayende, pikala mukaji mukuate muntu udi uluisha bayende awu ku butaka,

¹² nukose mukaji awu tshianza, kanumufuidi luse to.

Kuenda mushinga

¹³ Mu mabuki enu, kamuikadi bipimu bia bujitu bia mishindu ibidi: ebi ne bujitu bua bushiwa, bikuabu bia dishima bipepela.

¹⁴ Kabidi mu nzubu yenu, kamuikadi bipimu bia bule mishindu ibidi: ebi bia bule bua bushiwa, bikuabu bia dishima bipi.

¹⁵ Nuikale anu ne bipimu bia bujitu biakane, ne bia bule bikumbane, bua nushale ne muoyi matuku mavule mu ditunga diavua Maweja-Nangila Mvidi Mukulu wenu kunupa.

¹⁶ Bualu Maweja-Nangila Mvidi Mukulu wenu udi unyoka bantu badi badinga mushindu ewu.

Bena Amaleke

¹⁷ Nuvuluke muvua bena Amaleke banukengesha mu njila, panuvua mifuma ku Ejipitu.

¹⁸ Kabena batshina Mvidi Mukulu to. Ke muvuabu banualamina mu njila, nuenu bamane kupungila bikole. Kutondabu bantu bonsu bavua bashadile panyima, kubashipa.

¹⁹ Maweja-Nangila Mvidi Mukulu wenu neanufikishe mu ditunga didiye munupe. Neanupandishe ku baluishi bonsu badi nenu mutumba. Diba adi, nenubutule bena Amaleke, kabayi mua kubavuluka kabidi pa buloba to. Kanuena mua kupua bualu ebu muoyi to!