Dielulula 21 - MUKANDA WA MYIDI MUKULU

Mua kusombuela mushipianganyi udi kayi mumanyike

¹ Panuafika mu ditunga dikala Maweja-Nangila Mvidi Mukulu wenu munupe bua kusomba, nuenu basangane tshitalu tshia muntu mu tshisuku, kanuyi bamanye uvua mumushipe,

² bakulu ne balumbuluishi nebapime mutantshi uvua muntu mufuile, ne ku bimenga bidi pabuipi,

³ bua kujadika tshimenga tshidi pabuipi ne tshitalu tshia muntu awu. Bakulu ba mu tshimenga atshi, nebangate muana mukaji wa ngombe, udi kayi muanji kuambula bujitu.

⁴ Nebaye nende pabuipi ne musulu udi ne mayi apueka amu kupueka, ku mielelu yawu kudibu kabayi banji kudima, nansha kukuna biakudia. Pafikabu ne muana wa ngombe muaba awu, nebamunyongoboje nshingu.

⁵ Pashishe bena Levi, badi Maweja-Nangila Mvidi Mukulu wenu musungule bua kumuenzela mudimu, ne bua kuela bantu lupemba mu dina dia Maweja-Nangila, nebasemene pabuipi. Bualu bobu ke badi mua kujikija bilumbu bionsu: bia matandu, bia mvita, nansha bia bantu batapangane.

⁶ Nanku bakulu bonsu ba mu tshimenga atshi, bavua bafika ku tshitalu tshia muntu awu, nebowele bianza pambidi pa muana wa ngombe uvuabu banyongoboje nshingu awu,

⁷ bela lusanzu ne: “Katuena bashipe muntu ewu, kabidi katuena bamanye mudiye mufue.

⁸ Nanku wewe Maweja-Nangila, utufuile tuetu bena Izrayele luse. Udi mumane kutupikula. Kututangidi tuetu bu badi ne tshilumbu tshia lufu lua muntu ewu to.” Diba adi, Mvidi Mukulu neabafuile luse.

⁹ Nuenu benze nanku, nudi nusankisha Maweja-Nangila. Kanuakuikala bena tshibawu bua lufu lua mushindu ewu to.

Kusela mukaji mukuata ku mvita

¹⁰ Panuikala nuluangana mvita, Maweja-Nangila Mvidi Mukulu wenu munuambuluishe bua kukuata baluishi benu mu lukanu,

¹¹ muntu wa kunudi udi mua kumona mukaji muimpe, udiye musue kusela, munkatshi mua bena lukanu abu.

¹² Nanku aye nende kuende. Mukaji akungule nsuki ya ku mutu, adikose nzadi.

¹³ Umushe bilamba bia lukanu, avuale bikuabu, asombe ku nzubu kua muntu awu, enze madilu a tatuende ne a mamuende ngondu mujima. Pashishe mulume neamubuelele mu nzubu, bua ashale mukajende.

¹⁴ Kadi pikala mulume, matuku mamane kupita, umona ne: mukaji katshiena kabidi unsankisha, nansha undengelela, udi mua kumulekela, bua aye kudiye musue. Kena mua kumusumbisha, nansha kumulama bu mupika, bualu uvua mukajende.

Bumpianyi bua muanabute

¹⁵ Pikala muntu musele bakaji babidi, kayi mubanange bonsu mushindu wa momumue, bakaji abu balele bana ba balume, kadi muanabute muikale wa mukaji uvuaye kayi mupite kunanga,

¹⁶ bua kuabanyina bana abu bintu bia bumpianyi, tatu awu apeshe muanabute bumpianyi buende bua muanabute. Kena mua kubupesha muana wa mukaji udiye mupite kunanga to.

¹⁷ Nanku bua kuleja ne muana wa mukaji udiye kayi mupite kunanga ke muanabute, amupeshe bintu misangu ibidi, bualu mmuanende wa kumpala udi ne bua kuangata bumpianyi bua bumuanabute.

Muana wa kapeja

¹⁸ Pikala muana upepeja baledi bende, kayi ubumvuila, nansha bobu bamunyoke,

¹⁹ baledi bamukuate, baye nende ku tshilumbuluilu kudi bakulu ba mu tshimenga.

²⁰ Pafikabu nende, nebambile bakulu abu ne: “Muanetu ewu mmututombokele. Udi utupepeja, kena utumvuila to. Mmusue amu kuenza malu mabi ne kunua maluvu.”

²¹ Diba adi, bantu bonsu ba mu tshimenga atshi, nebamuase mabue, bamushipa. Pumvua bena Izrayele binudi bamuenzela, nebatshine. Kabakuenza kabidi buenzayi ebu to. Ke munudi mua kujikija buenzayi munkatshi mua bena Izrayele nanku.

Tshitalu tshia muntu mowa

²² Pikala muntu muenze bualu bubi, nuenu bamufundile tshibawu tshia lufu, bashipe muntu awu, balembeleje tshitalu tshiende ku mutshi,

²³ tshitalu atshi katshiladi kulu butuku to. Nutshijike amu dituku adi. Bualu tshitalu tshishale mushindu awu, tshidi mua kukebela bena ditunga dinyoka kudi Mvidi Mukulu. Nanku nudimuke, ditunga didi Maweja-Nangila Mvidi Mukulu wenu munupe bua kukuata, kanudinyangakaji ne mikiya to.