Dielulula 19 - MUKANDA WA MYIDI MUKULU

Bimenga bia kunyemena

¹ Maweja-Nangila Mvidi Mukulu wenu, neashipe bantu ba bisamba bikuabu bua kunupa ditunga diabu. Nenubanyenge bimenga biabu, nusomba mu nzubu yabu.

² Ditunga didi Maweja-Nangila munupe adi, nudikosolole mu bitupa bisatu. Mu tshitupa tshionsu muikale tshimenga tshia kunyemena.

³ Nanku padi muntu ushipangana, anyemene mu tshimue tshia ku bimenga ebi bisatu bua kusokoma.

⁴ Amu muntu uvua mushipe muntu mukuabu mu mpukapuka, kayi nende ne lukinu, neanyemene mu tshimue tshia ku bimenga ebi bisatu bua kudipandisha.

⁵ Tuangate tshilejilu tshia bantu babidi badi baya muitu bua kupula mutshi. Padi mukuabu ukosa mutshi, tshisuyi tshidi mua kukuka, kushipa uvuabu nende. Nanku muntu uvua mushipangane mu mpukapuka awu, udi mua kunyemena mu tshimue tshia ku bimenga ebi bisatu bua kudipandisha.

⁶ Musombuedi, bu mudiye ne tshiji, udi mua kulondakaja mushipianganyi. Padi njila mupite bule, musombuedi udi mua kupeta mushipianganyi, kumushipa. Kadi ki mbimpe kushipa mushipianganyi uvua mushipe muntu amu mu mpukapuka, kayi nende ne lukinu.

⁷ Ke pandi nnuambila bua nusungule bimenga bisatu bia kunyemena.

⁸ Panuikala banange Maweja-Nangila Mvidi Mukulu wenu, panuenza anu mudiye musue, panuakumbaja mikenji yonsu indi nnuambila eyi, yeye neadiundishe ditunga dienu. Neanupe ditunga dijima divuaye mulaye bankambua benu.

⁹ Diba adi, nenusakidile bimenga bikuabu bisatu bia kunyemena ku bienu bisatu bia kale.

¹⁰ Mushindu ewu mu ditunga dinuapeta kudi Maweja-Nangila Mvidi Mukulu wenu adi, kabakushipamu muntu uvua mushipe muntu nende mu mpukapuka. Nuenu bamushipe, nenuikale ne tshilumbu bua lufu lua muntu ewu.

¹¹ Kadi pikala muntu mukine muanabu, kubutamaye mua kumukuata, kumushipa, pashishe kunyemenaye mu tshimue tshia ku bimenga ebi bisatu,

¹² bakulu ba mu tshimenga tshiende, nebafume bantu bua kumukuata, kumufikisha kudi musombuedi bua amushipe.

¹³ Bua nuenu kusomba biakane mu ditunga dienu, ne kujikija buenzayi bua kushipa muntu udi kayi ne bualu, kanuena mua kufuila muena tshibawu luse to, numushipe!

Mikalu ya maloba

¹⁴ Panuafika mu ditunga didi Maweja-Nangila Mvidi Mukulu wenu munupe, nuenu bamane kupeta miaba ya kusomba, mikalu ne bena mutumba nenu bavua badianjile kuasa muaba awu, ishale anu mushindu unuvua bayisangane, kanuyi nudiundisha buloba bunuvua bapete.

Bajadiki

¹⁵ Padi muntu mushipangane, munyangakaje mikenji, nansha muenze buenzayi bukuabu, muntu umue kena mua kujadika tshilumbu atshi to, anu bantu babidi nansha basatu.

¹⁶ Pikala muntu ujadikila mukuabu tshilumbu tshia dishima,

¹⁷ bantu aba babidi nebaye natshi kudi batuangaji, ne kudi balumbuluishi badi balumbuluisha bilumbu dituku adi mu nzubu wa Mvidi Mukulu.

¹⁸ Balumbuluishi nebalondeshilule tshilumbu atshi bimpe. Pikalabu bajadike ne: mujadiki wa tshilumbu uvua mushiminyine mukuabu malu,

¹⁹ nebamunyoke amu mushindu uvuaye musue ne banyoke muanabu awu, bua kujikija buenzayi bua nanku munkatshi muenu.

²⁰ Pikala bantu bakuabu bumvue mudibu bamunyoke nanku, nebatshine. Kabakushi-minyinangana kabidi malu to.

²¹ Muena tshibawu yonsu, kanumufuidi luse to. Mumusombuele pende: padiye mushipangane, numushipe pende. Padiye mushipe muntu disu, numushipe diende. Padiye mupole muntu dinu, numupole diende. Padiye mukose muntu tshianza nansha dikasa, numukose pende.