Dielulula 18 - MUKANDA WA MYIDI MUKULU

Bintu bidi ndelanganyi ya bena Levi mua kuangata

¹ Tshisamba tshijima tshia bena Levi nansha batuangaji badi munkatshi muabu, kabena bapeta buloba bua bumpianyi, munkatshi mua bena Izrayele to. Nebapete biakudia anu ku milambu, ne ku bintu bikuabu bidi bantu balambula Maweja-Nangila.

² Kabena ne bumpianyi munkatshi mua bena Izrayele, bualu Maweja-Nangila udi bumpianyi buabu, bu muvuaye mumane kubambila.

³ Nanku padi bena Izrayele balambula Maweja-Nangila milambu ya bobumue ya ngombe, mikoku nansha mbuji, batuangaji nebapete diboku, mbanga ne tshifu.

⁴ Nubapeshe kabidi biakudia bia tshianyi bia pa madimi enu: ntete ya kuenza bukula, maluvu a mvinyo, ne mafuta. Nubapeshe kabidi ne miosa inudi nukosa ya mikoku ya kumpala.

⁵ Bualu Maweja-Nangila Mvidi Mukulu mmusungule bena Levi kashidi munkatshi mua bisamba bikuabu bionsu, bua bamuenzele mudimu wa butuangaji.

⁶ Pikala muena Levi umuka mu tshimenga tshia bena Izrayele mudiye musombe, bua kuya muaba wikala Maweja-Nangila musungule,

⁷ neenzele Maweja-Nangila Mvidi Mukulu wende mudimu muaba awu, anu bu mudibu benza kudi bena Levi bakuabu badi benza mudimu mu nzubu wa Mvidi Mukulu.

⁸ Muena Levi awu, neapete biakudia bungi budi bena Levi bakuabu bapeta. Udi mua kulama kabidi bintu bidi bena diku diabu bamutumina, padibu basumbisha bivuaye nabi.

Muambi mulelela ne bambi ba dishima

⁹ Panuafika mu ditunga dikala Maweja-Nangila Mvidi Mukulu wenu munupe, kanulondi buenzayi bua bena ditunga adi.

¹⁰ Muntu nansha umue wa kunudi, kena mua kuosha muanende wa balume nansha wa bakaji bua kumulambula. Kabidi muntu kena mua kuenza majimbu, kutempa, nansha kulowa bantu,

¹¹ nansha kubuka, nansha kuyukila ne bakishi bua kumvua tshidibu bamba.

¹² Bualu Maweja-Nangila udi udiula bikole bantu badi benza buenzayi bua mushindu ewu. Bua bualu ebu, Maweja-Nangila neabanyenge ditunga diabu panuafikamu.

¹³ Nanku nuenu bena Izrayele, nukumbaje amu bidi Maweja-Nangila Mvidi Mukulu wenu musue.

¹⁴ Maweja-Nangila Mvidi Mukulu wenu, udi unukandika bua kanulondi buenzayi bua bena ditunga dinuakuata. Bualu bobu abu badi bitaba badi benza malu a majimbu, babuka mbuku.

¹⁵ Maweja-Nangila neanutumine muambi mukuabu, bu meme Moshe. Neamusungule amu munkatshi mua bana benu. Nenuteleje bidiye wamba.

¹⁶ Muambi ke muntu unuvua balombe Maweja-Nangila ku mukuna wa Sinayi, panuvua bamba ne: “Muntu mukuabu ikale wakula netu. Katutshiena basue kumvua diyi dia Maweja-Nangila Mvidi Mukulu wetu, nansha kumona kapia kadi kakenka aka, bualu kadi mua kutubutula!”

¹⁷ Ke Maweja-Nangila kungambila ne: “Bena Izrayele badi bamba bimpe.

¹⁸ Nanku nembatumine muambi wa munkathi mua bana babu, bu muudi wewe Moshe. Nengikale mmuambila malu, yeye umanyisha bena Izrayele bionsu bingikala mumumanyishe.

¹⁹ Muntu yonsu udi ubenga kuitaba malu adi muambi awu umuambila mu dina dianyi, meme Maweja-Nangila nkayanyi nemmunyoke.

²⁰ Kadi pikala muambi wakula ne dikamakama mu dina dianyi meme Maweja-Nangila, wamba malu andi tshiyi mumuambile, nansha pikalaye wamba malu mu dina dia mvidie mikuabu, muambi awu neafue.”

²¹ Misangu mikuabu nudi mua kudikonka ne: Mmushindu kayi utudi mua kumanya ne: bualu ebu kabuena bufuma kudi Maweja-Nangila?

²² Nanku padi muambi unuambila bualu mu dina dia Maweja-Nangila, kabuyi buenzeka muvuaye muambe amu, numanye ne: ki mbua kudi Maweja-Nangila to. Muambi uvua udiambila bualu abu nkayende. Kanutshinyi, kanuteleji muambi wa nanku to.