Dielulula 17 - MUKANDA WA MYIDI MUKULU

¹ Tshimuna tshionsu tshidi ne bulema pambidi: ngombe, mukoku, nansha mbuji, kanuena mua kutshilambula Maweja-Nangila Mvidi Mukulu wenu to. Bualu mulambu awu kawena umulengelela to, udi umubipila.

² Misangu mikuabu, mu tshimue tshia ku bimenga tshidi Maweja-Nangila Mvidi Mukulu wenu mua kunupa bua nuenu kusomba, muntu mulume nansha mukaji udi mua kuenza bibi, kunyangakaja ndondu.

³ Tshilejilu: muntu udi utendelela mvidie ya bisamba bikuabu, nansha diba, ngondu, nansha bintu bivule bidi mu tshibuashibuashi. — Maweja-Nangila katshia ki mmunuambile bua kuenza nanku! —

⁴ Panuikala bumvue ne: muena Izrayele udi utendelela mvidie nanku, nukebulule bua kujadika ne: mmuenze nanku bulelela anyi? Pikala bualu ebu bubi, budi kabuyi buengelela Maweja-Nangila, buenzeke munkatshi muenu bulelela,

⁵ muena tshibawu awu, nansha yeye mulume nansha yeye mukaji, nuye nende ku tshibuelelu tshia tshimenga. Numuase mabue, numushipe.

⁶ Kanuena mua kushipa muena tshibawu awu kanuyi banji kujadika tshilumbu kudi bantu babidi nansha basatu. Muntu umue kena mua kujadika bualu to.

⁷ Bajadiki ba bualu abu ke badi badianjila kumuasa mabue. Pashishe bantu bakuabu nebabambuluishe bua kumushipa. Ke munudi ne bua kumusha bubi munkatshi muenu.

Nsambu ya kukosela muaba wa tshijila

⁸ Pikala balumbuluishi ba muaba unudi basombe, bapangile tshilumbu tshia bantu, bavua bashipangane, batutangane, batapangane mputa, nansha benze tshilema tshikuabu kampande, nuye ne tshilumbu atshi muaba wikala Maweja-Nangila musungule.

⁹ Nuebeje batuangaji ba bena Levi ne balumbuluishi, badi balumbuluisha dituku adi. Nebanuambile munudi mua kukosa tshilumbu atshi.

¹⁰ Nuitabe bionsu bidibu banuambila kudi batuangaji ne balumbuluishi, badi muaba wa tshijila wa Maweja-Nangila, nubikumbaje.

¹¹ Kanuenji munudi basue to. Nukumbaje bionsu bidibu banuambila.

¹² Pikala muntu musue kuditambisha, kayi ulonda tshidi balumbuluishi ne batuangaji, badi benza mudimu mu nzubu wa Maweja-Nangila Mvidi Mukulu wenu, bamba, muntu awu numushipe, bua kujikija buenzayi munkatshi mua bena Izrayele.

¹³ Nanku bena Izrayele kabakuditambisha kabidi nanku to. Nebatshine, padibu bumvue bionsu bidi bienzeka ebi.

Mikenji idi itangila mukalenga

¹⁴ Panuafika mu ditunga didi Maweja-Nangila Mvidi Mukulu wenu munupe bua kusomba, misangu mikuabu nenuikale ne dijinga dia kupeta mukalenga, bua nuikale mudi bisamba bikuabu binudi nabi mutumba.

¹⁵ Mukalenga awu, kikadi muenyi, muntu wa tshisamba tshikuabu to. Ikale anu muena Izrayele. Nanku nubanjije mu bukalenga amu muntu udi Maweja-Nangila Mvidi Mukulu wenu nkayende musungule.

¹⁶ Mukalenga awu, kikadi ne tubalu tua bungi. Kena mua kutuma bantu mu Ejipitu bua kutusumba to. Bualu Maweja-Nangila uvua munukandike bua kupingana mu ditunga edi.

¹⁷ Mukalenga awu kena mua kusela bakaji ba bungi. Bualu bakaji abu, badi mua kumufikisha ku ditombokela Maweja-Nangila. Kabidi kikadi ne biuma bia bungi to.

¹⁸ Mukalenga mumane kusomba mu nkuasa wa bukalenga, bamutentuile mukanda wa mikenji ewu, udibu balame kudi batuangaji ba bena Levi.

¹⁹ Nanku mukalenga alame mukanda awu pabuipi nende, bua ikale uubala matuku onsu atshidiye ne muoyi, bua anemeke Maweja-Nangila Mvidi Mukulu wende, akumbaje mikenji yonsu idibu bafunda mu mukanda awu.

²⁰ Bionsu ebi nebimuambuluishe bua kaditambishi, bu mupite bantu bonsu ba mu tshisamba tshiende, kabidi bua kalenguludi mikenji, kadi ayikumbaje yonsu too ne mikese mene. Nanku mukalenga awu ne ndelanganyi yende, nebashale mu bukalenga matuku a bungi, balombola bena Izrayele.