Dielulula 14 - MUKANDA WA MYIDI MUKULU

Bibidilu bibi bia mu madilu

¹ Nuenu bena Izrayele, panudi mu madilu, kanuena mua kuditapa nsalu, nansha kukungula pa lubombu to. Bualu nudi bana ba Maweja-Nangila Mvidi Mukulu wenu.

² Nudi tshisamba tshia tshijila tshia Maweja-Nangila Mvidi Mukulu wenu. Nuenu ke badiye musungule munkatshi mua bisamba bikuabu bidi pa buloba, bua nuikale tshisamba tshiende menemene.

Nyama ya mikiya, ne idi kayiyi ne mikiya

³ Nyama idi ne mikiya idi Maweja-Nangila mubenge, kanuena mua kudia munyinyi wayi to.

⁴ Kadi nudi mua kudia munyinyi wa nyama eyi: ngombe, mukoku, mbuji,

⁵ ngulungu, kabuluku, ntole, mukoku wa mu tshisuku,

⁶ nyama mikuabu yonsu idi ne mikonu mipanduluke, mikale ipingaja bintu mukana, ibidia kabidi.

⁷ Kadi nyama yonsu idi ne mikonu mipanduluke, kayiyi ipingaja bintu mukana, ibidia kabidi, nansha idi ipingaja bintu mu mukana ibidia kabidi, kadi kayiyi ne mikonu mipanduluke, kanuena mua kuyidia to. Nanku nyama eyi idi ne mikiya: kamelu, nsenji ne damane. Bualu idi ipingaja bintu mukana, ibidia kabidi, kadi kayena ne mikonu mipanduluke to.

⁸ Udi ne mikiya kabidi ke ngulube, bualu udi ne mikonu mipanduluke, kadi kena upingaja bintu mukana, ibidia kabidi. Nanku kanuena mua kudia munyinyi wa nyama eyi. Kanuena mua kuyilenga, padiyi mifue.

⁹ Ku nyama yonsu ya mu mayi, nudi mua kudia amu idi ne mamba ne misalala.

¹⁰ Kadi nyama yonsu ya mu mayi idi kayiyi ne mamba ne misalala, idi ne mikiya. Kanuena mua kuyidia to.

¹¹ Nyunyi yonsu idi kayiyi ne mikiya, nudi mua kuyidia.

¹² Kadi kanuena mua kudia nyunyi eyi: nyunyi ya biminyi, tubemba tua mvulu, nyunyi idi idia minyinyi ya mu mayi,

¹³ ntuba (mifuane mukanku), mikanku, nyunyi mishilangane mifuane tubemba,

¹⁴ bikololu,

¹⁵ kasonga nyunyi, nyunyi idi yendakana butuku mifuanangane ne kakutukutu, nyunyi ya pa mayi idi idia malandi, nkumbikumbi,

¹⁶ bipungulu, tshishenene,

¹⁷ nyunyi idi mifuanangane ne tshikololu, nkumbikumbi, kalamangombe, tshiowa,

¹⁸ nyunyi ya mikolu mile idi yenda ku muelelu wa mayi, nyunyi idi ne tshisuba ne nyunyi ya midima.

¹⁹ Bishi bionsu bidi ne masala, kanuena mua kubidia to, bualu bidi ne mikiya.

²⁰ Kadi nudi mua kudia bishi, bidi kabiyi ne mikiya.

²¹ Nuenu bena Izrayele, nudi tshisamba tshisunguluke tshia Maweja-Nangila Mvidi Mukulu wenu. Nanku kanuena mua kudia munyinyi wa nyama midifuile to. Nudi mua kuupesha benyi badi munkatshi muenu, nansha kusumbisha benyi bakuabu. Kanuena mua kulamba munyinyi wa muana wa mbuji, mu mabele a mamuende to.

Mushindu wa kufila tshia dikumi

²² Ku tshidimu tshionsu, nusunguile Maweja-Nangila tshia dikumi tshia bia mu madimi enu.

²³ Pashishe nuye mu nzubu wa Maweja-Nangila Mvidi Mukulu wenu, muaba wikalaye musungule bua nuenu kumonangana nende, ne bua kulambulamu tshia dikumi tshia bintu ebi: ntete ya kuenza bukula, maluvu a mvinyo, mafuta, bamuanabute ba ngombe, ba mikoku ne ba mbuji. Ke munudi mua kulomba, munudi mua kunemeka kashidi Maweja-Nangila Mvidi Mukulu wenu.

²⁴ Nanku pikala Maweja-Nangila Mvidi Mukulu wenu munupesha biakudia bia bungi mu madimi enu, misangu mikuabu kanuena mua kuambula tshia dikumi bua kutshinkisha muaba wikalaye musungule bua kusomba, bualu njila neikale mupite bule.

²⁵ Pikalabi nanku, nudi mua kusumbisha tshia dikumi tshia biakudia ebi, kuya kulambula makuta muaba wa tshijila wa Maweja-Nangila Mvidi Mukulu wenu.

²⁶ Muaba awu, nenusumbe bintu bionsu binudi basue: ngombe, mikoku, mbuji, maluvu a mvinyo, nansha maluvu makole, bua nuenu kudia, kunua, kusanka ne bena meku enu bonsu.

²⁷ Mu masanka awu, mwuluke bena Levi banudi nabu mu bimenga bienu, bualu kabena ne wabu muaba wa bumpianyi munkatshi muenu.

²⁸ Nanku ku bidimu bisatu bisatu, numushe tshia dikumi tshia bia mu madimi enu bia tshidimu atshi, nutshiteke mu bimenga bienu.

²⁹ Biakudia abi, nebiambuluishe bena Levi, badi kabayi ne muaba wa bumpianyi munkatshi muenu. Nebiambuluishe benyi, bana ba nshiya ne bakaji bakamba banudi nabu. Nebapete bintu bia kudiabu kuukuta. Nanku Maweja-Nangila Mvidi Mukulu wenu, neanuele lupemba mu bionsu binudi nuenza.