Dielulula 11 - MUKANDA WA MYIDI MUKULU

Malu adi Mvidi Mukulu muenzele bena Izrayele

¹ Nunange Maweja-Nangila Mvidi Mukulu wenu, numuenzele mudimu, nukumbaje meyi ne mikenji yende.

² Mpindiewu, ndi nnuambila nuenu mikenji eyi. Tshiena ngambila bana benu to. Bualu bobu kabena bamona, kabena bamanya bionsu bidi Maweja-Nangila munuenzele bua kunuleja bukole buende. Anu nuenu ke badi bamanya butumbi ne bukole buende.

³ Nudi bamanye bishima bionsu bivua Maweja-Nangila muenze. Mmunyoke mukalenga wa bena Ejipitu ne bantu bende bonsu,

⁴ pavuabu banuipata ne biluilu biabu, tubalu ne matempu. Nudi bamanye muvuaye mubabutule kashidi mu Mayi manene makunze.

⁵ Panuvua mu tshipela, Maweja-Nangila ke uvua munulame bua kunufikisha muaba ewu.

⁶ Pashishe uvua mushipe kabidi Datane ne Abirame, bana ba Eliyabe, ba mu tshisamba tshia Rubene. Buloba kupuka, kubajibikila ne meku abu, ne ntenta yabu, ne bantu bonsu bavua baditue ku tshiabu, bena Izrayele bonsu batangile.

⁷ Nanku nuenu nudi bajadike malu manene adi Maweja-Nangila munuenzele.

⁸ Nukumbaje mikenji yonsu indi nnuambila lelu eyi. Neyinuambuluishe bua nukuate ditunga dinuabuela.

⁹ Nanku nenulale matuku a bungi mu ditunga adi, didi ne biakudia bia bungi, divua Maweja-Nangila mumane kuditshipa bua kupesha bankambua benu, ne ndelanganyi yabu yonsu.

Ditunga didi Maweja-Nangila ukuba

¹⁰ Ditunga dinudi nukuata mpindiewu, kadiena bu ditunga dia Ejipitu dinudi bumuke to. Bualu mu Ejipitu, panuvua nukuna ntete, nuvua numbula mikidi bua kufikishisha mayi mu budimi amu, bu mudibu benza mu lupangu lua biseki.

¹¹ Kadi ditunga dinudi nukuata mpindiewu didi ne bibandabanda ne mikuna. Buloba budi bupeta tshitalela ku mayi a mvula.

¹² Maweja-Nangila Mvidi Mukulu wenu, ke udi ulama buloba abu, ku ntuadijilu wa tshidimu too ne ku ndekelu watshi.

¹³ Nuenu bakumbaje bimpe mikenji ya Maweja-Nangila Mvidi Mukulu, indi nnuambila lelu eyi, nuenu bamunange, bamuenzele mudimu ne muoyi wenu mujima ne bukole buenu buonsu,

¹⁴ nealokeshe mvula anu pa diba diende, bua nupete biakudia bimpe, ntete ya bungi ya kuenza bukula, maluvu a mvinyo, ne mafuta.

¹⁵ Maweja-Nangila neameneshe kabidi bisosa bia nuenu kudisha bimuna bienu. Nanku nenudie nukute.

¹⁶ Nanku dimukayi, kanupambuki, kanushiyi njila mululame. Kanutendeledi mvidie mikuabu to.

¹⁷ Nuenu kanuyi bakumbaje mikenji yende, Maweja-Nangila neanufuile munda. Kakunulokeshila kabidi mvula. Kanuakupeta biakudia pa madimi enu to. Nenubutuke mu ditunga edi dimpe, didiye unupesha.

¹⁸ Mikenji eyi indi munupeshe, nuyilame mu mioyi yenu ne mu mitshima yenu. Nuyisuike kabidi ku maboku enu, ne pa mpala yenu, bua kanuyipu muoyi to.

¹⁹ Nulongeshe bana benu mikenji eyi, nuyitele diba dionsu, panudi nusomba ku nzubu yenu, nansha panudi nuendakana mu njila, panudi nulala nansha panudi nubika.

²⁰ Pashishe nuyifunde ku mishiku ya mbelu ya nzubu yenu, ne ku biibi bia bimenga bienu.

²¹ Nuenu bakumbaje mikenji eyi, matuku onsu atshidi diulu kulu ne buloba panshi, nenushale ne muoyi, nuenu ne ndelanganyi yenu, mu ditunga divua Maweja-Nangila mulaye bankambua benu.

²² Eyowa, nukumbaje mikenji yonsu indi nnuambila. Nunange Maweja-Nangila Mvidi Mukulu wenu. Nuitabe bionsu bidiye unuambila, numulamate.

²³ Nanku panuafika pabuipi ne ditunga adi bua kudikuata, Yeye neanuipatshile baluishi benu, badi banupita ku bungi ne ku bukole.

²⁴ Ditunga dijima ndienu. Mikalu yadi idi mushindu ewu: kutuadija ku tshipela tshidi kuinshi mu ditunga, too ne ku mikuna ya Lebanone, idi ku mutu mu ditunga; ku musulu munene wa Perate luseke lua kudi diba dipatukila, too ne ku Mayi manene a pankatshi pa matunga, luseke lua kudi diba dibuelela.

²⁵ Muntu nansha umue kakukandamana to. Bantu bonsu nebanutshine, bakuatshike bowa miaba yonsu inudi nupitshila, bu muvua Maweja-Nangila munulaye.

²⁶ Telejayi! Ndi njinga se: lelu nusungule tshinudi basue: diakalenga nansha diakabi!

²⁷ Panuikala nukumbaja mikenji ya Maweja-Nangila Mvidi Mukulu wenu, indi nnumanyisha lelu, nenuikale bena diakalenga.

²⁸ Kadi panuikala kanuyi nukumbaja mikenji eyi, kanuyi nuitaba bindi nnuambila, nutendelela mvidie inudi kanuyi banji kumanya, nenuikale bena diakabi.

²⁹ Pikala Maweja-Nangila Mvidi Mukulu wenu munufikishe mu ditunga dinuakuata, nenujingile bantu diakalenga ku lusongu lua mukuna wa Ngarizime. Nenubajingile diakabi ku lusongu lua mukuna wa Ebale.

³⁰ (Mikuna eyi idi dishiya dia musulu wa Yardene, dishiya dia njila udi luseke ludi diba dibuelela lua musulu, mu ditunga dia bena Kenaane badi basomba mu tshibandabanda tshia Yardene. Mikuna eyi idi pabuipi ne mitshi ya nsanga ya tshijila ya mu Moreya, idi mitangilangane ne Ngilgale.)

³¹ Nuenu bena Izrayele, nukadi pa kusabuka musulu wa Yardene, bua kubuela mu ditunga edi, didi Maweja-Nangila Mvidi Mukulu wenu unupa. Nenudikuate bua kusombamu.

³² Diba adi, mwuluke bua kukumbaja meyi ne mikenji yende, bindi nnumanyisha lelu ebi.