Didimanyisha 9 - MUKANDA WA MYIDI MUKULU

¹ Pashishe mutumibue muitanu kuela mpungi. Meme kumona mutotu uvua mutuuke mu diulu, mukuluke panshi. Kuupeshabu nsapi wa ku kandondu.

² Mutotu unzulula kandondu, muinshi kupatukamu, mufuane wa mu tshikutu tshinene tshia kapia. Kufiikishawu diba ne kapepe.

³ Mpasu kupatuka mu muinshi awu, kutangalaka pa buloba. Mpasu ayi kupeta bukole bu bua tuminyiminyi.

⁴ Kuyikandikabu bua kayinyangi bisosa, nansha mitshi, nansha biakudia bia pa madimi; kadi ikengeshe amu bantu bavuabu kabayi batue tshitampi tshia Mvidi Mukulu pa mpala.

⁵ Kayivua ne bukenji bua kushipa bantu abu to; kadi amu bua kubakengesha ngondu itanu. Ivua isuma muntu, usama bu musuma kudi kaminyiminyi.

⁶ Ngondu itanu eyi, bantu nebakebe lufu, bua lubakuate. Kadi kaluakubakuata to. Nebajinge kufua. Kadi lufu nelubanyeme mutantshi mule.

⁷ Mpasu eyi numfuane tubalu tuvuabu balongolola ku mvita. Pa mitu payi padi bintu bu bifulu bia mpawungi. Mpala yayi numfuane ya bantu.

⁸ Nsuki yayi idi bu ya bakaji, menu ayi bu a nyama ya ntambue.

⁹ Pa biadi biayi padi bu tuzaku tua tshiamu. Masala ayi adi enza mutoyi bu wa matempu mavule, adi tubalu tupulumuna lukasa ku mvita.

¹⁰ Idi ne mikila ne mianga bu bia tuminyiminyi. Mu mikila amu mudi bukole budi bukengesha bantu ngondu itanu.

¹¹ Idi ne mukalenga udi uyilombola. Ke mutumibue udi ulama kandondu. Bena Ebrewu badi bamuinyika ne: “Abadone,” bena Ngreke ne: “Apoliyone” (mmomumue ne: Mubutudianganyi).

¹² Dikenga dia kumpala ndimane kupita; makuabu abidi nealonde.

¹³ Pashishe mutumibue muisambombu kuela mpungi. Meme kumvua diyi dipatukila ku matumba anayi a tshilambuilu tshia mpawungi tshidi kumpala kua Mvidi Mukulu.

¹⁴ Diyi divua diambila mutumibue muisambombu uvua mukuate mpungi ne: “Sulula batumibue banayi bavuabu basuike nkanu pabuipi ne musulu wa Perate.”

¹⁵ Kusululabu batumibue banayi abu. Bavua babalongolola amu bua diba adi, dituku adi, ngondu awu, ne tshidimu atshi, bua kubutulabu tshia bisatu tshia bantu bonsu.

¹⁶ Kummanyishabu bungi bua basolayi bavua babanda pa tubalu: bavua bitotu nkama ibidi.

¹⁷ Kundejabu tubalu ne basolayi bavua babandepu. Bavua ne tuzaku tua mvita tukunze bu kapia, tua lubidibidi bu mabue a safire, ne tua kalabi bu mvuanda. Mitu ya tubalu ivua bu ya nyama ya ntambue. Mukana muayi muvua mupatuka kapia, muinshi ne mvuanda.

¹⁸ Bipupu bisatu kubutula tshia bisatu tshimue tshia bantu: ke kapia, muinshi, ne mvuanda, bivua bipatuka mukana mua tubalu.

¹⁹ Bualu bukole bua tubalu atu buvua mukana, kabidi ku mikila. Mikila yatu ivua mifuanangane ne nyoka. Ivua ne mitu ya kukengesha nayi bantu.

²⁰ Kadi bantu bavua bashala ne muoyi, bonsu bavua bipupu ebi kabiyi bibutula, kabavua badilengeja to. Batshivua batendelela nwidie ivuabu badienzela. Batshivua bakukuila mikishi mibi, kabidi ne nwidie mienza ne mpawungi, ne tshiamu tshitoke tshia mushinga mukole, ne tshiamu tshikunze, ne mabue, kabidi ne mitshi. Ke nwidie idi kayiyi mua kumona, kayiyi yumvua, kayiyi yenda.

²¹ Bantu aba kabavua nansha badilengeja ku bibidilu biabu bibi bia kushipangana, kuenza malu a majimbu, kuenda buendenda, kuibangana bintu.