Didimanyisha 8 - MUKANDA WA MYIDI MUKULU

Tshitampi tshia muanda mutekete

¹ Pavua Muana wa mukoku ulamuna tshitampi tshia muanda mutekete, mu diulu kupuwamu vii mutantshi wa minute bu makumi asatu.

² Pashishe meme kumona muvua batumibue muanda mutekete, bavua bimane kumpala kua Mvidi Mukulu, bapeta mpungi muanda mutekete.

³ Mutumibue mukuabu kufika, kuimana ku tshilambuilu. Uvua ne mbabula muenza ne mpawungi, wa kuoshila manananshi. Kumupeshabu musenga wa manananshi wa bungi, wa kulambula pamue ne ditendelela dia bantu bonsu ba Mvidi Mukulu, pa tshilambuilu tshia mpawungi tshivua kumpala kua nkuasa wa butumbi.

⁴ Muinshi wa manananshi, pamue ne ditendelela dia bantu ba Mvidi Mukulu, bivua bibandila mu tshianza tshia mutumibue kumpala kua Mvidi Mukulu.

⁵ Pashishe mutumibue kuangata mbabula, kuelamu kapia ka ku tshilambuilu, kuwuja. Pashishe kuitshikijaye kapia pa buloba. Ke makubakuba kuakulawu, mikenya kupenya, tshikumina kuenzeka pa buloba.

Mpungi

⁶ Batumibue muanda mutekete kudilongolola bua kuela mpungi muanda mutekete, ivuabu nayi mu tshianza.

⁷ Mutumibue wa kumpala kuela mpungi. Mvula wa mabue ne kapia, bisambakana ne mashi, kulokabi pa buloba. Tshia bisatu tshimue tshia buloba, tshia mitshi, ne bisosa bibishi bionsu kupiabi.

⁸ Pashishe mutumibue muibidi kuela mpungi. Tshintu tshienza bu mukuna munene utema kapia, kudielatshi mu mayi manene. Tshia bisatu tshia mayi manene kuandamuka mashi.

⁹ Tshia bisatu tshia bionsu bidi ne muoyi mu mayi manene kufua. Tshia bisatu tshia majuwa onsu kunyanguka.

¹⁰ Ke mutumibue muisatu kuela mpungi. Mutotu munene, uvua utema bu tshimunyi tshia kapia, kukuluka mu diulu. Kuponenawu pa tshia bisatu tshimue tshia misulu ne pa mpokolu ya mayi.

¹¹ (Dina dia mutotu ewu divua Bululu.) Tshia bisatu tshia mayi kuandamuka mayi a bululu. Bantu ba bungi kufua, bualu bavua banua mayi avua ne lulengu.

¹² Mutumibue muinayi kuela mpungi. Kutuutabu tshia bisatu tshia diba, tshia ngondu, ne tshia mitotu. Nanku tshia bisatu tshia bukenka buabi kujimina. Muvua amu miidima tshia bisatu tshia dituku, ne tshia bisatu tshia butuku kabidi.

¹³ Meme kumona kabidi nyunyi wa tshiminyi ubuuka mulu mule. Meme kumvua nyunyi awu udila bikole ne: “Eyi dikenga! Dikenga dinene! Dikenga nedikuate bantu ba pa buloba, pelabu mpungi kudi batumibue bakuabu basatu!”