Didimanyisha 6 - MUKANDA WA MYIDI MUKULU

Bitampi

¹ Pashishe meme kumona Muana wa mukoku ulamuna tshitampi tshia kumpala tshia ku bitampi muanda mutekete. Meme kumvua tshimue tshia ku Bia muoyi binayi tshiela diyi bu dikubakuba ne: “Lua!”

² Nkenzakana, ke meme kumona kabalu katoke. Uvua mubandepu uvua mukuate buta. Kumupabu tshifulu tshia bukalenga. Kumukaye bu tshilobu, bua kuya kutshimuna kabidi.

³ Pashishe Muana wa mukoku kulamuna tshitampi tshibidi. Meme kumona Tshia muoyi tshibidi tshianza ne: “Lua!”

⁴ Ke kabalu kakuabu kupatuka, kakunze. Uvua mubandepu, bavua bamupesha muele mutue, kabidi ne bumfumu bua kutangalaja mvita pa buloba, bua bantu bashipangane.

⁵ Pashishe Muana wa mukoku kulamuna tshitampi tshisatu. Meme kumvua Tshia muoyi tshisatu tshianza ne: “Lua!” Nkenzakana, meme kumona kabalu kafiike. Uvua mubandepu uvua ne tshipiminu mu bianza.

⁶ Meme kumvua bu diyi difuma munkatshi mua Bia muoyi binayi, diamba ne: “Kilo umue wa ntete ya kuenza bukula, nansha kilo isatu ya ntete ya orje ikale difutu dia mudimu wa dituku dimue. Kadi kanunyangi mafuta ne maluvu to.”

⁷ Pashishe Muana wa mukoku kulamuna tshitampi tshinayi. Ke meme kumvua Tshia muoyi tshinayi tshianza ne: “Lua!”

⁸ Nkenzakana, ke meme kumona kabalu ka mubidi mutokoloke bu tshitalu. Uvua mubandepu, bavua bamuinyika ne: “Lufu!” Bavua bamulonda kudi kandondu ka bafue. Kubipeshabu bumfumu bua tshia binayi tshimue tshia buloba, bua kushipesha bantu ku muele wa mvita, ku tshiyole tshia nzala, ku disama dia tshiambu, ne ku nyama ya lonji.

⁹ Pashishe Muana wa mukoku kulamuna tshitampi tshitanu. Ke meme kumona muinshi mua tshilambuilu mioyi ya bantu bavuabu bashipe, bualu bavua balongesha muaku wa Mvidi Mukulu, baujadika muabu muonsu.

¹⁰ Kuelabu diyi dikole ne: “Mfumu wa Tshijila, udi ukumbaja biudi mulaye, nealumbuluishe ba pa buloba diba kaayi? Utshidi amu windila, kuyi unyoka bavua batushipe anyi?”

¹¹ Kupeshabu yonsu wa kudibu muntumpu mutoke, babambila ne: indilayi kabidi katupa. Banji kushipa bana benu bakuabu, banutua benzele nabu Mvidi Mukulu mudimu, buonsu buabu, bu muyuabu banushipe nuenu.

¹² Pashishe meme kumona Muana wa mukoku ulamuna tshitampi tshisambombu. Tshikumina tshikole kuenzekatshi. Diba kufuka, bu tshilamba tshia madilu. Ngondu mujima kukunza bu mashi.

¹³ Mitotu kukuluka panshi, bu mutu bimuma bia mfiku bitshidi bibishi bipona, padi tshipepele tshikole tshinyukisha mutshi.

¹⁴ Diulu kujimina, bu mudi mateta ajimina, padibu bavunga mukanda. Mikuna ne bidiila bionsu kutentamuka miaba yabi.

¹⁵ Bakalenga ba pa buloba, balombodi, bamfumu ba basolayi, babanji, bena mianzu, kabidi ne bantu bakuabu bonsu, bapika nansha badi badienzela malu, kuyabu kusokomena mu mikuna ne mu mbuebue ivuamu.

¹⁶ Kadi bavua bambila mikuna ne mbuebue ne: “Tupukilayi, nutusokoke, bua udi musombe mu nkuasa wa butumbi katumonyi, bua tshiiji tshia Muana wa mukoku katshifiki kutudi.

¹⁷ Bualu dituku dinene dia tshiiji tshiabu ndimane kufika. Udi mua kubafuila nkanana nnganyi?”