Didimanyisha 5 - MUKANDA WA MYIDI MUKULU

Muana wa mukoku udi wangata mukanda

¹ Mvua mumone mukanda muvunga mu tshianza tshia balume tshia uvua musombe mu nkuasa wa butumbi. Bavua baufunde munda ne panyima, batue bitampi muanda mutekete.

² Meme kumona mutumibue wa bukole, wela diyi dikole ne: — Udi muakanyine kulamuna bitampi, kubulula mukanda nnganyi?

³ Kadi nansha mu diulu, nansha pa buloba, nansha munda mua buloba, kakuvua muntu muakanyine kubulula mukanda bua kumona bidimu to.

⁴ Mvua ndila bikole, bualu kakuvua muntu muakanyine kubulula mukanda, kumona bidimu.

⁵ Ke umue wa ku bakulu kungamba ne: — Lekela muadi. Tangila: ntambue wa mu tshisamba tshia Yuda, wa ku ndelanganyi ya mukalenga Davide, udi mutshimune. Nanku Yeye udi mua kulamuna bitampi muanda mutekete ne kubulula mukanda.

⁶ Ke meme kumona Muana wa mukoku muimane munkatshi kumpala kua nkuasa wa butumbi, bamunyungulukila kudi Bia muoyi binayi ne kudi bakulu. Uvua mumueka bu mushipa. Uvua ne nsengu muanda mutekete, kabidi ne mesu muanda mutekete. Ke mieyelu muanda mutekete ya Mvidi Mukulu ivuabu batume pa buloba bujima.

⁷ Muana wa mukoku kusemena, kuangata mukanda mu tshianza tshia balume tshia uvua musombe mu nkuasa.

⁸ Yeye mumane kuangata mukanda, Bia muoyi binayi ne bakulu makumi abidi ne banayi kukukuila Muana wa mukoku. Mukulu yonsu uvua ne lunzenze, kabidi ne makopu menza ne mpawungi muwule ne musenga wa kamonya. Musenga awu ke mitendelelu ya bena tshisamba tshia Mvidi Mukulu.

⁹ Bavua bimba musambu mupiamupia, bamba ne: “Wewe udi muakanyine kuangata mukanda, kulamuna bitampi biawu. Bavua bakushipe. Nanku ku lufu luebe, Wewe kupikuila Mvidi Mukulu bantu, ba meku onsu, ba miakulu yonsu, ba bisamba bionsu, ne ba mu matunga onsu.

¹⁰ Wewe kubateka bakalenga ne batuangaji, bua benzele Mvidi Mukulu wetu mudimu. Nebadie bumfumu pa buloba bujima.”

¹¹ Meme kutangila tshiakabidi, kumvua meyi a batumibue bavule, binunu ne bitotu. Bavua banyungulukile nkuasa wa butumbi, Bia muoyi ne bakulu.

¹² Bavua bimba ne diyi dikole ne: “Muana wa mukoku uvuabu bashipe, udi muakanyine kupeta bumfumu, bubanji, meji ne bukole, kanemu, lumu ne butumbi!”

¹³ Ke meme kumvua kabidi bifukibua bionsu, mu diulu, pa buloba, muinshi mua buloba, ne mu mayi manene, — bionsu bidi ne muoyi miaba yonsu, — bimba ne: “Tukukuile udi musombe mu nkuasa wa butumbi, kabidi ne Muana wa mukoku. Tubatumbishe, tubasamune, tuitabe bumfumu buabu kashidi tshiendelele!”

¹⁴ Bia muoyi binayi bivua bitshija ne: “Amene!” Ke bakulu kudiela panshi kukukuila.