Didimanyisha 16 - MUKANDA WA MYIDI MUKULU

Makopu adi ne tshiji tshia Mvidi Mukulu

¹ Pashishe meme kumvua diyi dikole difumina mu nzubu wa Mvidi Mukulu, diambila batumibue muanda mutekete ne: “Ndayi, nuitshikije pa buloba makopu muanda mutekete adi ne tshiji tshia Mvidi Mukulu!”

² Mutumibue wa kumpala kuya kuitshikija dikopu diende pa buloba. Ke mubidi wa bantu bonsu bavuabu batue tshitampi tshia nyama, bakukuile tshimfuanyi tshiende, kupandika mputa mibi, ibasamisha bikole.

³ Mutumibue muibidi kuitshikija dikopu diende pa mayi manene. Mayi kuandamuka mashi, bu a muntu mushipa. Ke bionsu bivua ne muoyi mu mayi kufuabi.

⁴ Mutumibue muisatu kuitshikija dikopu diende mu misulu ne mu mpokolu ya mayi. Kuandamukabi mashi.

⁵ Ke meme kumvua mutumibue udi utangila mayi, wamba ne: “Wewe udi wa Tshijila, udiku ne muaku, udi muakane, bualu udi mukose nsambu pa yoyi pa kuenza nanku.

⁶ Bualu bavua bapumune mashi a bantu ba Mvidi Mukulu, ne a bambi. Mpindiewu Wewe udi mubanuishe mashi. mBapete bivuabu ne bua kupeta!”

⁷ Pashishe meme kumvua diyi difumina ku tshilambuilu, diamba ne: “Eyowa, Maweja-Nangila, Mvidi Mukulu wa bukole buonsu, udi ukosa nsambu mudiyi, mu bulelela!”

⁸ Mutumibue muinayi kuitshikija dikopu diende pa diba. Ke kupetadi bukenji bua kuosha bantu ne kapia kadi.

⁹ Munya kuosha bantu bikole. Ke bantu kusendeka dina dia Mvidi Mukulu uvua ulongolola bipupu ebi. Kadi kabavua badilengeja, kabavua batumbisha Mvidi Mukulu to.

¹⁰ Mutumibue muitanu kuitshikija dikopu diende pa nkuasa wa bukalenga wa nyama. Ke bukalenga bua nyama kudiina mu miidima. Bantu bavua bakenga, badisuma menu ku ludimi bua dikenga.

¹¹ Bavua basendeka Mvidi Mukulu wa mu diulu bua makenga abu, ne bua mputa yabu. Kadi kabavua balekela malu abu mabi.

¹² Mutumibue muisambombu kuitshikija dikopu diende pa musulu munene wa Perate. Musulu kuuma, bua bakalenga badi batumina luseke ludi diba dipatukila bapete muaba wa kusabukila.

¹³ Pashishe meme kumona mikishi mibi isatu, mifuanangane ne ndimba. Ivua ipatuka mukana mua nyoka wa tshidika, mua nyama, ne mua muambi wa dishima.

¹⁴ Ke mikishi ya diabolu idi yenza malu a dikema. Mikishi isatu ayi ivua iya kumonangana ne bakalenga ba pa buloba bujima, ikeba kubasangisha bua mvita ya dituku dinene dia Mvidi Mukulu wa bukole buonsu.

¹⁵ Mfumu udi wamba ne: “Teleja! Ndi mfika bu muivi. Muntu udi ushala mutabale, kayi ukopola bilamba biende, mmuena diakalenga, bualu kakuenda butaka, kakumvua bundu, pikalabu bamumona nanku.”

¹⁶ Mikishi kusangisha bakalenga muaba udibu binyika ne: Armagedone, mu buena ebrewu.

¹⁷ Mutumibue wa muanda mutekete kuitshikija dikopu diende mu kapepe. Diyi dikole kumvuika mu nzubu wa Mvidi Mukulu difumina ku nkuasa wa butumbi, diamba ne: “Ke ndekelu wa bionsu!”

¹⁸ Ke mikenya, mitoyi, makubakuba, ne tshikumina tshikole kuenzekabi. Tshikumina tshikole tshia nanku ki ntshianji kuenzeka, katshia bafuka bantu! Buloba kuzakala bikole bipite.

¹⁹ Tshimenga tshinene tshiena tshipanduluke mu bitupa bisatu. Bimenga bia matunga onsu kuupuka. Mvidi Mukulu kavua mupue Babilone munene muoyi. Kumunuishaye maluvu a mu dikopu diende, divua tente ne tshiji tshiende tshikole.

²⁰ Bidiila bionsu kujimina. Kabavua bamone kabidi mikuna minene.

²¹ Mvula wa mabue kuloka, mabue a bujitu bua kilo bu makumi anayi. Kutuutawu bantu. Bu muvua tshipupu tshia mabue atshi tshikole tshipite, bantu bavua amu basendeka Mvidi Mukulu.