Didimanyisha 15 - MUKANDA WA MYIDI MUKULU

Batumibue ne bipupu bia ndekelu

¹ Pashishe meme kumona tshintu tshikuabu tshinene, kabidi tshia dikema mu diulu. Ke batumibue muanda mutekete bavua bafika ne bipupu muanda mutekete. Ke bipupu bia ndekelu, bualu nebitalaje tshiji tshia Mvidi Mukulu.

² Pashishe meme kumona tshintu bu mayi manene menza bu lumuenu, engelela bu kapia. Meme kumona kabidi bavua batshimune nyama, tshimfuanyi tshiende, ne kampanda uvua ne dina didi bungi budileja. Bavua bimane pa mayi manene awu, bakuate mu tshianza nzenze ivua Mvidi Mukulu mubapeshe.

³ Bavua bimba musambu wa Moshe, muntu wa Mvidi Mukulu, kabidi ne musambu wa Muana wa mukoku ne: “Maweja-Nangila Mvidi Mukulu wa bukole buonsu, udi muenze malu manene a dikema! Mukalenga wa bisamba bionsu, malu audi wela meji, ne audi ukumbaja, adi mimpe, aleja muudi muena diyi dimue.

⁴ Maweja-Nangila, wabenga kukutshina nnganyi? Wabenga kukunemeka udiku anyi? Bualu Wewe nkayebe udi wa tshijila. Bisamba bionsu nebikukukuile, bualu bantu bonsu badi bamona patoke malu mimpe audi wenza.”

⁵ Ebi bimane kuenzeka, meme kumona nzubu wa Mvidi Mukulu unzuluka mu diulu. Mu nzubu amu muvua ntenta wa ndondu wa Mvidi Mukulu.

⁶ Batumibue muanda mutekete bavua bakuate bipupu muanda mutekete mu bianza, kupatuka mu nzubu wa Mvidi Mukulu amu. Bavua bavuale bilamba bienza ne ndanda mutoke biengelela, basuike mikaba ya mpawungi pa tshiadi.

⁷ Tshimue tshia ku Bia muoyi binayi kupeshatshi batumibue muanda mutekete makopu muanda mutekete menza ne mpawungi, avua tente ne tshiji tshia Mvidi Mukulu, udi ne muoyi kashidi ne kashidi.

⁸ Ke nzubu wa Mvidi Mukulu kuwula ne muinshi, bualu bua butumbi ne bukole bia Mvidi Mukulu. Muntu nansha umue kavua mua kubuela mu nzubu wa Mvidi Mukulu, bipupu muanda mutekete, bivua batumibue bafike nabi, kabiyi bianji kukumbana.