Didimanyisha 14 - MUKANDA WA MYIDI MUKULU

Musambu wa bantu bavuabu bapikule

¹ Pashishe nkenzakana, meme kumona Muana wa mukoku muimane kulu pa mukuna wa Siyone. Uvua ne bantu binunu lukama ne makumi anayi ne binayi, bavuabu bafunde dina diende, ne dia Tatu wende, pa mpala.

² Meme kumvua diyi difumina mu diulu, dikungula bu bibila binene bia mayi, bu dikubakuba dikole. Kadi diyi adi divua diumvuika kabidi bu miadi ya bisanji bia lunzenze.

³ Bantu aba binunu ne binunu bavua bimane kumpala kua nkuasa wa butumbi, kua Bia muoyi binayi, ne kua bakulu, bimba musambu mupiamupia. Muntu nansha umue kavua mua kulonga musambu awu, amu bantu abu binunu lukama makumi anayi ne binayi bavuabu bapikule, bumushe pa buloba.

⁴ Bobu abu kabavua basombe ne bakaji. Kabavua babuele mu dibaka. Badi balonda Muana wa mukoku kuonsu kudiye uya. Bavua babapikule, babumushe munkatshi mua bantu bakuabu, bua bikale milambu ya tshianyi, idibu balambula Mvidi Mukulu ne Muana wa mukoku.

⁵ Katshi kabena babumvua bashima. Kabena ne kalema nansha kamue.

Batumibue basatu

⁶ Pashishe meme kumona mutumibue mukuabu ubuuka mulu menemene. Uvua ne bua kumanyisha bantu bonsu ba pa buloba, ba mu bisamba bionsu, ba mu meku onsu, ba miakulu yonsu, ne ba mu matunga onsu, Lumu lua Disanka ludi lushala kashidi.

⁷ Uvua wamba ne diyi dikole ne: “Tshinayi Mvidi Mukulu, mutumbishayi! Bualu diba didiye ulumbuluisha bantu ndimane kukumbana. Kukuilayi Mufuki wa diulu, wa buloba, wa mayi manene, ne wa mpokolu ya mayi.”

⁸ Mutumibue muibidi uvua ulonda wa kumpala, wamba ne: “Eyi tshimenga ntshibutuke! Tshimenga tshinene tshia Babilone ntshibutuke! Ke tshiotshi tshivua tshinuishe bisamba bionsu maluvu atshi, maluvu makole a buendenda buatshi bubi!

⁹ Mutumibue muisatu uvua ulonda babidi ba kumpala, wela diyi dikole ne: “Udi ukukuila nyama ne tshimfuanyi tshiende, wanyisha bua bamutue tshitampi tshiende pa mpala ne pa tshianza,

¹⁰ Mvidi Mukulu neamunuishe maluvu a tshiji tshiende, avuaye muele mu dikopu dia tshiji tshiende, kayi musakidile mayi! Bonsu badi bakukuila nyama, nebabakengeshe mu kapia ne mu mvuanda, batumibue ba tshijila ne Muana wa mukoku bamone.

¹¹ Muinshi wa kapia kadi kabakengesha udi ubanda mu diulu kashidi. Bonsu bavua bakukuile nyama ne tshimfuanyi tshiende, bavuabu batue tshitampi tshia dina diende, nansha butuku nansha mu munya kabena bapeta dikisha to.”

¹² Ke padi bantu ba Mvidi Mukulu, badi bakumbaja mikenji yende, kabidi bitaba Yezu, ne bua kunanukila, kulama lutuulu.

¹³ Pashishe meme kumvua diyi difumina mulu, dingamba ne: — Funda ne: “Badi bafuila mu mudimu wa Mfumu bituadija ku mpindiewu, mbena diakalenga!” Mueyelu wa Mvidi Mukulu udi wamba ne: “Bushuwa, nebikishe bua midimu mikole ivuabu benze, bualu malu mempe avuabu benze adi abalonda, abakuila.”

Badi banowa bia pa buloba

¹⁴ Meme kutangila kabidi, kumona divuba ditoke, basombapu kudi kampanda, umueneka bu muntu. Uvua ne tshifulu tshia bukalenga tshia mpawungi ku mutu, ne muele mutue mu tshianza.

¹⁵ Mutumibue mukuabu kupatuka mu nzubu wa Mvidi Mukulu, wela diyi dikole, wambila uvua musombe pa di-vuba ne: “Ambula muele webe, unowe, bualu diba ndimane kufika. Bia pa buloba bikadi bipie!”

¹⁶ Nenku uvua musombe pa divuba, kukuataye mudimu ne muele wende, kunowa bionsu bivua pa buloba.

¹⁷ Mutumibue mukuabu kupatuka mu nzubu wa Mvidi Mukulu udi mu diulu. Uvua kabidi ne muele mutue.

¹⁸ Mutumibue mukuabu kabidi, uvua ne bumfumu bua kusonsola kapia, uvua ufuma ku tshilambuilu. Kuelaye diyi dikole, wambila uvua ne muele mutue ne: “Angata muele webe, unowe tumuma tua mvinyo tudi mu buloba, bualu tukadi tupie.”

¹⁹ Nenku ke mutumibue kukuata mudimu ne muele wende pa buloba, kunowa tumuma tua nwinyo, kutuela mu tshikaminu tshinene tshia tshiji tshikole tshia Mvidi Mukulu.

²⁰ Bavua bazajila tumuma mu tshikaminu ku mpenga kua tshimenga. Mashi kupatuka mu tshikaminu, menza musulu. Kupuekawu mutantshi wa kilometre nkama isatu, mikale ne buondoke bua metre umue ne tshitupa.