Didimanyisha 11 - MUKANDA WA MYIDI MUKULU

Bajadiki babidi

¹ Pashishe bavua bampeshe dilenga dia kupima nadi, difuanangane ne dikombu, bangamba ne: — Juka, upime nzubu wa Mvidi Mukulu, kabidi ne tshilambuilu. Ubale bungi bua bantu badi batendelelamu.

² Kadi kupimi lupangu lua pambelu pa nzubu wa Mvidi Mukulu to. Bualu mbalupeshe bantu ba bisamba bikuabu. Bantu abu nebadiatakaje tshimenga tshia tshijila ngondu makumi anayi ne ibidi.

³ Meme nentume bajadiki banyi babidi, bavuale bilamba bikayapale. Matuku tshinunu nkama ibidi ne makumi asambombu aa, nebamanyishe bantu bidi Mvidi Mukulu mubambile.

⁴ Bajadiki babidi aba ke mitshi ya diye ibidi, ne miendu ibidi idi kumpala kua Mfumu wa buloba.

⁵ Pikala muntu ukeba kubakengesha, kapia nekapatuke mukana muabu, kabutule bena lukuna babu. Nenku muntu wakeba mua kubakengesha, nebamushipe mushindu awu.

⁶ Bajadiki abu badi ne bumfumu bua kukanga diulu, kukandika mvula bua kaloki matuku adibu bamanyisha bantu muaku wa Mvidi Mukulu. Badi kabidi ne bumfumu bua kuandamuna mayi enza mashi, ne bua kunyanga buloba, misangu yonsu idibu basue, ne bipupu bia mishindu yonsu.

⁷ Pikala bajadiki bamane kumanyisha bionsu bivua Mvidi Mukulu mubambile, nyama udi upatuka mu kandondu neabaluishe. Neabatshimune, abashipe.

⁸ Bitalu biabu nebishale panshi mu musesu wa mu tshimenga tshinene, muaba uvuabu bapopele Mfumu wabu pa mutshi mutshiamakane. Tshimenga etshi badi batshifuanyikija dina ne: Sodome, nansha ne: Ejipitu.

⁹ Bantu ba bisamba, meku, miakulu, ne matunga onsu, nebaye kumona bitalu biabu matuku asatu ne tshitupa. Kabakuanyisha bua babijike nansha.

¹⁰ Bantu ba pa buloba nebasanke, batue tshianga, basankishangane ne bintu, bua lufu luabu, bualu bambi babidi aba bavua batatshishe bikole bantu ba pa buloba.

¹¹ Kadi matuku asatu ne tshitupa mamane kupita, Mvidi Mukulu neabapingajile mueyelu wa muoyi, bua bajuke. Bonsu badi babamona, nebakuatshike bowa bikole.

¹² Pashishe bambi babidi kumvua diyi dikole dia mu diulu, dibabikila ne: “Bandayi kuneku!” Bobu kubuela mu divuba, kubanda munda mua diulu, bena lukuna babu batangile.

¹³ Diba adi, tshikumina tshikole kuenzeka. Tshia dikumi tshia tshimenga kupuka. Bantu binunu muanda mutekete kufua ku tshikumina atshi. Bavua bashale ne muoyi kutshina bikole. Kutumbishabu Mvidi Mukulu wa mu diulu.

¹⁴ Ke dikenga dibidi. Kadi dimukayi! Disatu didi dilonda amu mpindiewu.

Mpungi wa muanda mutekete

¹⁵ Pashishe mutumibue wa muanda mutekete kuela mpungi. Meyi makole kumvuika mu diulu, amba ne: “Bumfumu bua kulombola buloba budi kudi Maweja-Nangila wetu ne kudi Meshiya wende. Nebashale mu bukalenga kashidi.”

¹⁶ Ke bakulu makumi abidi ne banayi badi basombe mu nkuasa ya butumbi idi kumpala kua Mvidi Mukulu, kudiela mpala panshi, bakukuila Mvidi Mukulu,

¹⁷ bamba ne: “Maweja-Nangila, Mvidi Mukulu wa bukole buonsu, Wewe udiku, uvuaku, tudi tukuela tuasakidila, bualu udi muleje bukole buebe bunene; kabidi bualu udi mubange bukalenga buebe.

¹⁸ Bantu ba bisamba bikuabu bavua bakutombokele ne tshiji. Kadi diba dikadi dimane kukumbana dia Wewe kuleja tshiji tshiebe, dia Wewe kulumbuluisha bafue bonsu. Diba ndimane kufika dia kusankisha bambi bebe bavua bakukuatshila mudimu, ne bantu bebe bonsu badi bakunemeka, baneme ne bashadile. Diba ndimane kufika dia kubutula badi babutula buloba!”

¹⁹ Ke nzubu wa Mvidi Mukulu udi mu diulu, kunzuluka. Mushete wa ndondu kumuenekamu. Mikenya, mikungulu, makubakuba, tshikumina kuenzeka, kabidi mvula mukole wa mabue kuloka.