Didimanyisha 1 - MUKANDA WA MYIDI MUKULU

Mudi mukanda ewu

¹ Mu mukanda ewu mbafunde muvua Yezu Kristu mudimanyishe. Mvidi Mukulu mmuanyishe bua adileje nanku kudi bantu bende, bua bamanye bidi ne bua kuenzeka amu mpindiewu. Kristu kutuma mutumibue wende, bua abimanyishe Yowanane, muena mudimu wa Kristu.

² Yowanane uvua mujadike bionsu bivuaye mumone. Mu mukanda ewu udi umanyisha muaku uvuaye mupete kudi Mvidi Mukulu, ne malu malelela avua Yezu mumuleje.

³ Muntu udi ubala mukanda ewu, mmuena diakalenga. Bantu badi bateleja miaku ya kudi muambi wa Mvidi Mukulu ewu, bakumbaja bidibu bafunde muaba ewu, badi kabidi bena diakalenga! Bualu bionsu ebi nebikumbane amu mpindiewu.

Yowanane udi wela Bisumbu bia bena ditaba muoyi

⁴ Meme Yowanane, ndi mfundila Bisumbu muanda mutekete bia bena ditaba bidi mu buloba bua Aziya mukanda ewu: Dinanga ne bupole bia kudi Mvidi Mukulu, udiku, uvuaku, ne wafikaku, bia kudi mieyelu muanda mutekete idi kumpala kua nkuasa wende wa butumbi,

⁵ ne bia kudi Yezu Kristu, udi ujadika malu mudiwu, Muanabute, Wa kumpala udi mubiike ku bafue, Mukalenga wa bakalenga bonsu ba pa buloba, bishindame munda muenu. Kristu udi utunanga. mMutupikule ku mibi yetu ku lufu luende.

⁶ mMutuenze bakalenga ne batuangaji, bua tukuatshile Tatuende Mvidi Mukulu mudimu. Yezu Kristu udi ne butumbi, kabidi ne bukole, mu nkama ne nkama ya bidimu! Amene.

⁷ Tangila: udi upueka mu mavuba! Bantu bonsu nebamumone, nansha bavua bamutubule mubidi. Bisamba bionsu bia pa buloba nebidile muadi bualu buende. Eyowa, nebikale nanku! Amene.

⁸ Maweja-Nangila, Mvidi Mukulu wa bukole buonsu, udiku, uvuaku, wafikaku, udi wamba ne: “Meme ndi Alfa ne Omega.”

Kristu udi udileja kudi Yowanane

⁹ Meme muanenu Yowanane, ndi mudisange ne Mfumu bu nuenu. Ke padibu bankengesha kabidi bu nuenu. Ke pandi nnanukila nenu ne lutuulu luonsu mu Bukalenga bua Mvidi Mukulu. Bavua bantume mu tshidila tshia Patmose, bualu mvua mulongeshe muaku wa Mvidi Mukulu, mujadike malu malelela avua Yezu mutumanyishe.

¹⁰ Dituku di Mfumu, Mueyelu wa Tshijila kumvulula. Meme kumvua panyima panyi diyi dikole, bu muadi wa mpungi,

¹¹ diamba ne: — Funda tshiudi mumone etshi mu mukanda, uutumine Bisumbu muanda mutekete bia bena ditaba ebi: tshia mu Efeze, mu Smirna, mu Pergame, mu Tiyatira, mu Sardeze, mu Filadelfiya, ne mu Lawodikiya.

¹² Meme kukudimuka, bua mmone uvua ungakuisha. Ke meme kumona bitekelu muanda mutekete bia miendu, bienza ne mpawungi.

¹³ Munkatshi muabi muvua tshintu bu muntu, muvuale muntumpu mutue ne ku makasa, musuike mukaba wa mpawungi pa tshiadi.

¹⁴ Nsuki yende ivua mitoke bu miosa ya mikoku, nansha bu busu bua mvula. Mesu ende avua akenka bu kapia katema.

¹⁵ Makasa ende avua abalakana bu tshiamu tshikunze tshivuabu bengulule mu kapia, bafinunuje. Diyi diende divua dienza tshiona tshikole bu tshibila tshinene tshia mayi.

¹⁶ Uvua ne mitotu muanda mutekete mu tshianza tshiende tshia balume. Muele mutue wa nkanza uvua upatuka mukana muende. Mpala wende uvua ukenka bu diba munda munya.

¹⁷ Meme mumumone nanku, mvua mupone panshi ku makasa ende bu muntu mufue. Ke yeye kuteka tshianza tshiende tshia balume pambidi panyi, wamba ne: — Kutshinyi to! Meme ndi wa kumpala ne wa ndekelu.

¹⁸ Ndi ne muoyi. Mvua mufue. Kadi mpindiewu ndi ne muoyi kashidi. Ndi Mfumu wa lufu ne wa kandondu ka bafue.

¹⁹ Nenku funda biudi umona, bidi bienzeka mpindiewu, ne biavua kuenzeka pashishe.

²⁰ Udi umona mitotu muanda mutekete idi mu tshianza tshianyi tshia balume, ne bitekelu muanda mutekete bia miendu bia mpawungi. Ndi nkumvuija mudibi: mitotu muanda mutekete ke batumibue muanda mutekete ba Bisumbu muanda mutekete bia bena ditaba, bitekelu muanda mutekete ke Bisumbu muanda mutekete bia bena ditaba.