Dibadika 32 - MUKANDA WA MYIDI MUKULU

Bisamba bisatu bidi biasa dishiya dia Yardene

¹ Ndelanganyi ya Rubene ne ya Ngade ivua ne bimuna bipite bungi. Kumonabu ditunga dia Yazere ne dia Ngilaade abalengelela bua kumunyinabu bimuna.

² Kuyabu kudi Moshe, kudi mutuangaji Elazare, ne kudi bamfumu ba bena Izrayele, kubambilabu ne:

³ — Bimenga ebi, Atarote, Dibone, Yazere, Nimra, Eshebone, Elale, Sebame, Nebo ne Beyone,

⁴ mbia mu ditunga dia bena Izrayele, didibu bapete ku diambuluisha dia Maweja-Nangila. Ditunga edi ndimpe bua tuetu kumunyinamu bimuna bietu.

⁵ Kusengelelabu kabidi Moshe ne: — Anyisha, utupeshe miaba eyi, tuabanyangane. Katuena basue kusabuka dishiya dia musulu wa Yardene to.

⁶ Moshe kubenga, wamba ne: — Kanuena mua kushala apa to. Bana benu kabena mua kuya ku mvita nkayabu to.

⁷ Nudi basue kupumbisha bena Izrayele bua kufikabu mu ditunga didi Maweja-Nangila mubapeshe anyi?

⁸ Bankambua benu bavua benza kabidi tshilema etshi kale ku Kadeshe-Barneya, pamvua mubatume bua kutentekela ditunga dia Kenaane.

⁹ Pafikibu mu tshibandabanda tshia Eshekole, kutentekelabu ditunga. Kadi mu dipingana diabu, kupumbishabu bena Izrayele mua kufika mu ditunga divua Maweja-Nangila mumane kubapa.

¹⁰ Dituku adi, Maweja-Nangila kubafikila munda, wamba ne:

¹¹ “Bantu bonsu bavua bapatuka mu Ejipitu, badi ne bidimu makumi abidi ne pa mutu, kabena mua kufika mu ditunga dimvua mulaye Abrahame, Izake ne Yakobe to, bualu mbantombokele.

¹² Amu Kalebe, muana wa Yefune, wa mu diku dia Kenaze, ne Yoshuwa, muana wa Nune, ke badi mua kufika mu ditunga adi, bualu kabena bantombokela to.”

¹³ Nanku Maweja-Nangila mmufikile bena Izrayele bonsu munda, mubaladike mu tshipela bidimu makumi anayi, bua bantu bonsu bavua bamutombokela abu babutuke.

¹⁴ Kadi mpindiewu, nuenu bena buenzavi, nudi basue kulonda amu meji mabi a bankambua benu, bua Maweja-Nangila afikile kabidi bena Izrayele munda.

¹⁵ Nuenu bena Rubene ne bena Ngade, panudi nutombokela Maweja-Nangila, yeye neashiye bena Izrayele bonsu mu tshipela, babutukilamu ku tshilema tshienu.

¹⁶ Bena Rubene ne bena Ngade kuambila Moshe ne: — Kabiena muudi wamba amu to. Tudi basue kuasa apa bikumbi bua bimuna bietu, ne bimenga bua bana betu batudi balele.

¹⁷ Pashishe tuetu netuangate bia mvita, tupite kumpala kua bena Izrayele bonsu, bua kubafikisha pa wabu muaba. Diba adi, bana batuvua balele nebashale mu bimenga bibaka bimpe, kabayi mua kutshina njiwu ya kudi bena ditunga edi.

¹⁸ Amu patuafikisha bena Izrayele mu Kenaane, bobu bamane kupeta bonsu muaba wa kuasa, netupingane kuetu.

¹⁹ Katuena basue kuabanyangana nabu buloba budi dishiya dia musulu wa Yardene to, bu tuetu mua kupeta buloba dia munemu dia musulu, luseke luawu ludi diba dipatukila.

²⁰ Moshe kubambila ne: — Mbimpe, angatayi bia mvita, nuye kuluangana mu dina dia Maweja-Nangila, munudi bamane kulaya.

²¹ Bantu balume bonsu bambule bia mvita, basabuke dishiya dia musulu wa Yardene, bashalemu too ne diba didi Maweja-Nangila unyenga baluishi betu ditunga diabu.

²² Pashishe ditunga adi dimane kuitaba Maweja-Nangila, nenupingane kuenu, kanuyi ne tshilumbu kudi Maweja-Nangila, nansha kudi bena Izrayele. Nenku Maweja-Nangila neanupe ditunga didi luseke ludi diba dipatukila lua Yardene edi kashidi.

²³ Kadi numanye ne: Nuenu kanuyi bakumbaje bionsu ebi, nenuikale bena tshibawu. Maweja-Nangila neanunyoke.

²⁴ Ashilayi bakaji benu ne bana benu bimenga, enzayi bikumbi bia bimuna bienu. Kadi nukumbaje bionsu binuvua balaye Maweja-Nangila.

²⁵ Bena Rubene ne bena Ngade kuitaba, bambila Moshe ne: — Netukumbaje bionsu biudi utuambila ebi.

²⁶ Nanku bana betu, bakaji betu ne bimuna bietu, nebishale munu mu Ngilaade.

²⁷ Kadi tuetu, netuambule bia mvita, tuye mu mvita. Maweja-Nangila neatuambuluishe, bu muudi utuambila emu.

²⁸ Moshe kufikisha majinga a bena Rubene ne bena Ngade kudi mutuangaji Elazare, kudi Yoshuwa, muana wa Nune, ne kudi bamfumu ba bisamba bia bena Izrayele.

²⁹ Kubambilaye ne: — Pikala bena Rubene ne bena Ngade, basabuke nenu musulu wa Yardene bua kuluangana mvita, bu mudi Maweja-Nangila muambe, banuambuluishe bua nukuate ditunga dia Kenaane, nanku nubapeshe ditunga dia Ngilaade, dikale diabu.

³⁰ Kadi pikalabu kabayi bakumbaje bionsu ebi, nenusombe nabu amu mu ditunga dia Kenaane.

³¹ Bena Rubene ne bena Ngade kuitaba kabidi ne: — Netukumbaje bionsu bidi Maweja-Nangila muambe.

³² Netuambule bia mvita bua kuluangana ne bena Kenaane, badi dishiya dia musulu wa Yardene. Pashishe tuetu netu-pingane dia munemu bua kupeta bupianyi buetu, luseke ludi diba dipatukila lua musulu ewu wa Yardene.

³³ Moshe kupesha bena Ngade, bena Rubene, ne tshitupa tshia tshisamba tshia bena Menashe, muana wa Yozefe, ditunga dia Sihone, mukalenga wa bena Amore, kabidi ne ditunga dia Oge, mukalenga wa bena Bashane. Kubapeshaye bimenga bionsu, kabidi misoku ivua nabi mutumba.

³⁴ Ndelanganyi ya Ngade kuasulula bimenga abi: Dibone, Atarote, Aroyere,

³⁵ Atrote-Shofane, Yazere, Yogbaha,

³⁶ Bete-Nimra ne Bete-Arane. Kulongololabu bimenga ebi bimpe, kubikolesha ne bimana. Kuenzabu kabidi mpangu ne bikumbi bia kumunyina bimuna.

³⁷ Ndelanganyi ya Rubene kuasulula bimenga ebi: Eshebone, Elale, Kiriyatayime,

³⁸ Nebo, Baale-Meyone, bivuabu bamane kukudimuna dina. Pashishe kuasabu kabidi Sibma. Bimenga bikuabu bivuabu base, kubinyikabu mena mapiamapia.

³⁹ Ndelanganyi ya Makire, muana wa Menashe, kutshimuna bena Amore, kubanyenga ditunga dia Ngilaade.

⁴⁰ Ke Moshe kubapesha ditunga edi bua basemu.

⁴¹ Ndelanganyi ya Yayire, muana mukuabu wa Menashe, kunyenga misoku mikuabu ya bena Amore, kuyinyikabu ne: “Misoku ya Yayire.”

⁴² Pashishe Noba kunyenga tshimenga tshia bena Kenate, ne misoku yonsu ivua pabuipi natshi. Kuinyikaye tshimenga etshi dina diende dia Noba.