Dibadika 31 - MUKANDA WA MYIDI MUKULU

Bena Izrayele badi baluisha bena Madiyane

¹ Maweja-Nangila kuambila Moshe ne:

² — Uye kunyoka bena Madiyane bua kusombuela bena Izrayele badibu benzele bibi. Pashishe neushiye buloba.

³ Moshe kuambila bena Izrayele ne: — Bantu bakuabu ba kunudi bambule bia mvita bua kuluisha bena Madiyane, bua bapete dinyoka didi Maweja-Nangila mubafundile.

⁴ Nanku nusungule bena mvita tshinunu ku tshisamba tshionsu tshia bena Izrayele.

⁵ Kusungulabu bena mvita tshinunu ku tshisamba tshionsu tshia bena Izrayele. Bonsu basanga bavua 12.000.

⁶ Moshe kubatuma bonsu mu mvita, babalombola kudi mutuangaji Pinhase, muana wa Elazare. Pinhase uvua muambule bintu bia tshijila, kabidi ne mpungi bua kumanyisha bantu diba dia kutuadija mvita.

⁷ Kuluishabu bena Madiyane, bu muvua Maweja-Nangila muambile Moshe. Kushipabu bantu balume bonsu.

⁸ Kushipabu kabidi Balaame, muana wa Beyore, pamue ne bamfumu batanu ba bena Madiyane: Evi, Rekeme, Sure, Ure ne Reba.

⁹ Kukuatabu bakaji ne bana ba bena Madiyane mu bupika. Kunyengabu nyama yabu ivua yambula majitu, bimuna biabu ne bintu biabu bionsu.

¹⁰ Bena Izrayele kuosha bimenga bia bena Madiyane bionsu, ne mitanda yabu yonsu.

¹¹ Pashishe kumukabu ne bantu, ne bimuna kabidi, ne bintu bionsu bivuabu banyenga mu mvita.

¹² Kufikabu ne bintu abi kudi Moshe, kudi mutuangaji Elazare, ne kudi bena Izrayele bonsu, bavua basomba mu mitanda yabu mu mpata ya Mowabe, pabuipi ne musulu wa Yardene, dishiya dia Yeriko.

¹³ Moshe, Elazare ne bamfumu bakuabu ba bena Izrayele, kupatuka mu mitanda bua kuakidila bena mvita abu.

¹⁴ Moshe kufikila balombodi bonsu ba bena mvita, bavua baya kuluangana ne bena Madiyane munda, nansha ba bena mvita tshinunu, nansha ba bena mvita lukama.

¹⁵ Kubambilaye ne: — Kanuvua bashipe bantu bakaji to!

¹⁶ Nudi bamanye bimpe ne: bakaji ba bena Madiyane aba ke bavua bitabe meji a Balaame, bafikishe bena Izrayele ku ditombokela Maweja-Nangila, bua kutendelela anu mvidie wa ku Peyore. Ke pavua tshipupu tshibutule bantu ba Maweja-Nangila.

¹⁷ Nanku mpindiewu nushipe bana ba balume bonsu, kabidi ne bakaji bonsu bakadi bamane kumanyangana ne balume.

¹⁸ Kadi nsongakaji idi kayiyi mianji kumanyangana ne balume, kanuyishipi to. Ishale bualu buenu.

¹⁹ Kadi nuenu bonsu bavua bashipe muntu, nansha balenge tshitalu, nushale anu pambelu pa mitanda matuku muanda mutekete. Numushe mikiya yenu dituku disatu ne dia muanda mutekete. Bantu bakaji banuvua bakuate mu bupika benze pabu nanku.

²⁰ Numushe kabidi mikiya idi pa bilamba bienu, ne pa bintu bionsu binudi nabi, bidi bienza ne biseba, ne boya bua mbuji, nansha ne mabaya a mitshi.

²¹ Pashishe mutuangaji Elazare kuambila bantu bonsu bavua baye ku mvita mikenji ivua Maweja-Nangila muambile Moshe ne:

^22-23 — Biamu bionsu bidi kabiyi binyanguke mu kapia, bu mudi bintu bienza ne tshiamu tshia mpawungi, tshitoke tshia mushinga mukole, tshiamu tshia kabanda, tshiamu tshifike, tshiamu tshia mayowa, nansha tshiamu tshikuabu, ubiele mu kapia, pashishe ubitue mu mayi bua kumusha mikiya. Kadi biamu bionsu bidi binyanguke mu kapia, ubitue anu mu mayi bua kumusha mikiya.

²⁴ Dituku dia muanda mutekete, nusukule bilamba bua kumusha mikiya yenu. Pashishe nenupingane mu mitanda, kanuyi kabidi ne mikiya.

Bintu binyenga mu mvita

²⁵ Maweja-Nangila kuambila Moshe ne:

²⁶ — Wewe, Elazare ne bamfumu ba bena Izrayele, nubadike bantu ne bimuna bionsu binudi banyenga mu mvita.

²⁷ Wabanya bintu abi mu bitupa bibidi bia mushindu umue: etshi bangate kudi bena mvita bavua mu mvita, tshikuabu bangate kudi bena Izrayele bavua kabayi mu mvita.

²⁸ Ku bintu bidibu bangate kudi bena mvita bavua mu mvita, pa bantu nkama itanu, nungumushile muntu umue, pa nyama nkama itanu, nungumushile nyama umue: ngombe umue, mpunde umue, mukoku umue ne mbuji umue.

²⁹ Bintu bionsu binudi nungumushila abi, ubipeshe mutuangaji Elazare.

³⁰ Kadi ku bintu bionsu bidibu bangate kudi bena Izrayele bakuabu, pa bantu makumi atanu nungumushile muntu umue, ne pa nyama makumi atanu nungumushile nyama umue: ngombe umue, mpunde umue, mukoku umue ne tshimuna tshikuabu tshionsu anu tshimue. Bena Levi badi benza mudimu wa kulama nzubu wanyi wa tshijila bangate bintu abi.

³¹ Moshe ne mutuangaji Elazare kukumbaja bionsu bivua Maweja-Nangila muambe.

³² Bintu bionsu bivuabu banyenga mu mvita bidi nunku: mikoku ne mbuji 675.000

³³ ngombe 72.000,

³⁴ mpunde 61.000,

³⁵ ne nsongakaji ivua kayiyi mianji kumanya balume 32.000.

³⁶ Bintu bionsu bivuabu babanyina bena mvita bavua mu mvita bivua nunku: mikoku ne mbuji 337.500.

³⁷ Ku yoyi ayi bavua bumushile Maweja-Nangila 675.

³⁸ Ku ngombe 36.000, kumushilabu Maweja-Nangila 72,

³⁹ ku mpunde 30.500, kumushilabu Maweja-Nangila 61,

⁴⁰ ku bantu 16.000 kumushilabu Maweja-Nangila 32.

⁴¹ Moshe kupesha mutuangaji Elazare bintu bionsu bivua bia Maweja-Nangila, bu muvua Maweja-Nangila mumane kuamba.

⁴² Bintu bivuabu babanyina bena Izrayele bakuabu, bivua anu mushindu umue ne bivuabu babanyine bena mvita.

⁴³ Muvua mikoku ne mbuji 337.500,

⁴⁴ ngombe 36.000,

⁴⁵ mpunde 30.500,

⁴⁶ ne bantu 16.000.

⁴⁷ Nanku ku bantu ne bintu bionsu bivuabu babanyine bena Izrayele, Moshe kumusha muntu umue ku bantu makumi atanu, ne nyama umue ku nyama makumi atanu. Kupeshaye bena Levi bavua benza mudimu mu nzubu wa Mvidi Mukulu bintu abi, bu muvua Maweja-Nangila mumane kuamba.

Milambu ya ku budisuile bua balombodi

⁴⁸ Bamfumu ba bena mvita bavua balombola bisumbu bia bantu tshinunu nansha lukama, kudisangisha kudi Moshe,

⁴⁹ kumuambila ne: — Tuabadiki bena mvita batuvua nabu mu mvita: muntu nansha umue kena mufue to.

⁵⁰ Ke patudi tulambula Maweja-Nangila milambu, bua atulame ne muoyi. Muntu yonsu wa kutudi nealambule biende bintu bia tshiamu tshia mpawungi bidiye mupete: tukanu tua majita, nkanu ya ku maboku, tukanu tua ku minu, tukanu tua ku matshi, ne mabue a mu nshingu.

⁵¹ Moshe ne mutuangaji Elazare, kuangata bintu bionsu bienza ne tshiamu tshia mpawungi, bivua bantu bafile.

⁵² Bintu bionsu bivuabu bafile kudi balombodi ba bena mvita bua kulambula Maweja-Nangila, bivua ne bujitu bua kilo 170.

⁵³ Kadi bena mvita bavua kabayi ne mianzu, bavua balame bintu bionsu bivuabu bapete mu mvita.

⁵⁴ Moshe ne Elazare kuteka bintu bionsu bia tshiamu tshia mpawungi, bivuabu bafile kudi balombodi ba bena mvita abi, mu ntenta wa kusambakena, bua Maweja-Nangila ikale uvuluka bena Izrayele.