Dibadika 23 - MUKANDA WA MYIDI MUKULU

¹ Balaame kuambila Balake ne: “Ungashile muaba ewu bilambuilu muanda mutekete, untuadile kabidi ngombe milume muanda mutekete, ne mikoku ya bimpanga muanda mutekete.”

² Balake kuenza bionsu abi. Pashishe bonsu babidi kulambula Maweja-Nangila ngombe mulume umue, ne mukoku wa tshimpanga umue, pa tshilambuilu tshionsu.

³ Balaame kuambila Balake ne: — Shala muimane pabuipi ne milambu yebe eyi. Meme ndi nya ku luseke. Misangu mikuabu Maweja-Nangila udi mua kummuenekela. Nenkuambile bionsu bikalaye mummanyishe. Balaame kuya muaba uvua kauyi bantu.

⁴ Maweja-Nangila kumuenekela Balaame muaba awu. Awu kuambila Maweja-Nangila ne: — Ndi muenzeje bilambuilu muanda mutekete. Ngalambulu ngombe mulume umue, ne mukoku wa tshimpanga umue, pa tshilambuilu tshionsu.

⁵ Maweja-Nangila kumanyisha Balaame malu a kuambila Balake, kumupingaja kabidi kudiye.

⁶ Balaame kupingana muaba uvua Balake mumuindile, pamue ne bamfumu ba bena Mowabe, pabuipi ne milambu yende.

⁷ Balaame kuamba ne: “Balake, mukalenga wa bena Mowabe, mmumbikile, ku mikuna ya Arame ya ku luseke ludi diba dipatukila: ‘Balaame, ufike bua kukanyina, kutshipa mene bena Izrayele, ndelanganyi ya Yakobe!’

⁸ Kadi bantu badi Mvidi Mukulu kayi mutshipe, mundi meme mua kubatshipa mbishi? Bantu badi Maweja-Nangila kayi mukanyine, mundi mua kubakanyina meme mmunyi?

⁹ Ndi nsomba pa mbuebue, ntangila bantu aba. Ndi pa mikuna, mpuekesha mesu, mbakenketa. Bena Izrayele mbantu ba pa buabu, mbashilangane ne ba bisamba bikuabu.

¹⁰ Kakuena udi mua kubala bungi bua bena Izrayele, kakuena udi mua kubadika ndelanganyi ya Yakobe! Ndi njinga kufua mudi bantu bakane aba bafua. Ndi musue kuikala nabu muaba umue.”

¹¹ Balake kuandamuna Balaame ne: — Tshiudi ungenzela ntshinyi? Ndi mukubikile bua kutshipa baluishi banyi. Kadi wewe udi ubeela amu kubeela lupemba!

¹² Balaame kuandamuna ne: — Mudimu wanyi udi amu wa kuamba tshidi Maweja-Nangila ummanyisha. Ki mmomumue anyi?

Balaame udi wela bena Izrayele lupemba musangu muibidi

¹³ Balake kumuambila kabidi ne: — Tuye nebe muaba mukuabu uudi mua kumona bena Izrayele bonsu. Neubatshipe muaba awu. Bualu muaba ewu uvua mumone amu tshitupa tshia bantu aba.

¹⁴ Balake kuya ne Balaame ku lusongu lua mukuna wa Pisga muaba wa kutentekela. Kuenzaye kabidi bilambuilu muanda mutekete muaba awu. Kulambulaye ngombe mulume umue, ne mukoku wa tshimpanga umue, pa tshilambuilu tshionsu.

¹⁵ Balaame kuambila Balake ne: — Shala muimane ku milambu yebe eyi. Ndi nya ku luseke bua kuindila bidi Maweja-Nangila musue kungambila.

¹⁶ Maweja-Nangila kuyukila ne Balaame, kumumanyisha malu a kuambila Balake, kumupingaja kudiye.

¹⁷ Balaame kupingana muaba uvua Balake mumuindile amu kumuindila pabuipi ne milambu yende, pamue ne bamfumu ba bena Mowabe. Balake kumuebeja tshivua Maweja-Nangila mumumanyishe.

¹⁸ Ke Balaame kuela kasala, wimba ne: “Balake, muana wa Sipore, juka, unteleje bimpe!

¹⁹ Mvidi Mukulu kena muntu, kena ushima! Kena muana wa Adame, kena ushintulula meji ende. Udi wenza amu mudiye wamba. Udi ukumbaja bionsu bidiye ulaya.

²⁰ Uvua mungambile bua meme kuela bena Izrayele lupemba. Maweja kubela lupemba. Tshiena mua kuenza muanyi munga.

²¹ Maweja-Nangila kena mumone bubi, kena mumone buenzavi kudi bena Izrayele. Udi Mvidi Mukulu wabu, musombe munkatshi muabu. Badi bamutumbisha bualu udi mukalenga wabu.

²² Mvidi Mukulu ke udi mubapatule mu Ejipitu, mubapatule ne bukole bu bua nyama wa mbowa.

²³ Majimbu ne mbuku, kabiena biambuluisha bena Izrayele. Bionsu bidi Mvidi Mukulu musue kuenza, bena Izrayele badi babimanye pa diba.

²⁴ Bena Izrayele badi bu mudi nyama wa ntambue, udi ushipa nyama, udia munyinyi. Udi usunsula nyama, unua mashi ende. Kushishaye kulala, kuikisha.”

²⁵ Balake kukandika Balaame ne: — Ne wabengi kubatshipa, kadi kubeedi lupemba nansha!

²⁶ Balaame kumuandamuna ne: — Kadi mvua mudianjile kukuambilane: mudimu wanyi udi amu wa kumanyisha bantu tshidi Maweja-Nangila ungambila!

Balaame udi wela bena Izrayele lupemba musangu muisatu

²⁷ Balake kuambila Balaame ne: — Ndi nya nebe kabidi muaba mukuabu. Misangu mikuabu, Mvidi Mukulu udi mua kuitaba, bua utshipe bena Izrayele muaba awu mu dina dianyi.

²⁸ Kuyabu kulu kua mukuna wa Peyore, muaba udibu mua kumona tshipela.

²⁹ Balaame kuambila Balake ne: “Asa bilambuilu muanda mutekete muaba ewu, untuadile ngombe milume muanda mutekete, ne mikoku ya bimpanga muanda mutekete.”

³⁰ Balake kuenza bionsu abi. Pashishe kulambulaye ngombe mulume umue, ne mukoku wa tshimpanga umue pa tshilambuilu tshionsu.