Dibadika 11 - MUKANDA WA MYIDI MUKULU

Bena Izrayele badi bafika mu Tabera

¹ Dituku dikuabu bena Izrayele bavua bajana Maweja-Nangila bikole. Maweja-Nangila umvua nanku, kufikaye munda. Kapia ka Maweja-Nangila kutema munkatshi muabu, kuosha tshitupa tshia mitanda.

² Bena Izrayele kudidila Moshe. Kubalombelaye kudi Maweja-Nangila. Kapia kujima.

³ Kuinyikabu muaba awu dina ne: Tabera, mmumue ne: kapia, bualu Maweja-Nangila uvua muoshe mitanda yabu muaba awu.

Bena Izrayele badi balomba munyinyi

⁴ Dituku dikuabu bantu benyi ba mishindu yonsu bavua basombe munkatshi mua bena Izrayele kukuatshika lukuka lua munyinyi. Bena Izrayele mene kutuadija kudiabakena, bebejangana ne: “Udi mua kutupesha munyinyi wa tuetu kudia nnganyi?

⁵ Mu Ejipitu tuvua tusanka! Tuvua ne biakudia bipite bungi: mishipa katuyi tusumba, bisekiseki bivule, mawoji, bimuma bia melone, matungulu a mishindu mishilangane ne ndungu.

⁶ Mpindiewu tudi tuenda tubutuka, katuyi ne biakudia bionsu ebi! Anu mana kututonda diba dionsu!”

⁷ Mana avua mushindu wa ntete ya koriyandre, mitoke too, mafuanangane ne budimbu bua mutshi wa mbdeliyume.

^8-9 Butuku mana avua amata mu mitanda ne lumuma musangu umue. Dinda, bena Izrayele bavua baye kuangula, baapela pankatshi pa mabue abidi, nansha baatua mu tshinu. Pashishe bavua baalamba mu ngesu, nansha baenza mikata. Avua ne muenya bu wa mikata milamba ne mafuta.

¹⁰ Moshe kumvua muvua bena Izrayele badila muadi, basombela ku diku ku diku mu mishiku ya ntenta yabu. Maweja-Nangila kufika munda bikole. Bualu ebu kutonda Moshe.

¹¹ Moshe kuebeja Maweja-Nangila ne: — Udi unkengesha nenku, kuyi umfuila luse bua tshinyi? Udi umpesha bantu bungi nenku, bua meme kubalombola bualu kaayi?

¹² Meme tshiena muimite, tshiena mulele bantu bonsu aba to! Muudi ungambila bua meme kubambula bu mudi ndeji wambula muana pambidi, bua kubafikisha mu ditunga diuvua mulaye bankambua babu, mbishi?

¹³ Munyinyi wa kudia, udi bena Izrayele bonsu aba bandomba, badila ne muadi, meme ndi mua kuupeta kuepi?

¹⁴ Meme nkayanyi tshiena mua kujikija makenga a bena Izrayele bonsu aba to. Bujitu buabu budi bumpite!

¹⁵ Paudi musue kunkengesha nanku, mbimpe unshipe. Ke muudi mua kumfuila luse, tshiyi mmona kabidi dikenga dindi nadi edi to!

¹⁶ Maweja-Nangila kuambila Moshe ne: — Unsunguile bakulu ba bena Izrayele makumi muanda mutekete, bantu baudi mujadike ne: mbakulu ba bushuwa, balombodi ba bena Izrayele. Ufike nabu ku ntenta wa kusambakena. Wimane nabu kumpala kuanyi.

¹⁷ Meme nempueke muaba awu bua kuyukila nebe. Bukole bua Mueyelu wanyi buudi nabu, nembuabanyine kabidi bakulu abu tshitupa. Nanku kuakuikala nkayebe ne mudimu wa kulama bantu. Bakulu abu nebakuambuluishe.

¹⁸ Ambila kabidi bena Izrayele ne: “Nudilongolole bua dituku dia maloba, numushe mikiya! Nebanutumine munyinyi, bualu Maweja-Nangila mumvue miadi yenu ne: Udi mua kutupesha munyinyi nnganyi? Mu Ejipitu, tuvua bimpe bitambe! Nanku, Maweja-Nangila neanupeshe munyinyi wa nuenu kudia.

¹⁹ Munyinyi awu kawakuikala wa dituku dimue, matuku abidi, asatu, dikumi, nansha makumi abidi to.

²⁰ Nenuudie ngondu mujima. Neunutonde, unupatukila mu diulu. Ke muanunyokabu, bualu nuvua nudiabakena, nujinga Ejipitu, nulengulula Maweja-Nangila udi munkatshi muenu.”

²¹ Moshe kukema, wamba ne: — Akia! Bena Izrayele badi muaba ewu mbapite pa binunu nkama isambombu. Muudi mua kuamba ne: nembapeshe munyinyi, mbadisha ngondu mujima mbishi?

²² Tuetu bashipe mikoku, mbuji ne ngombe yonsu itudi nayi, nansha tuetu baloba mishipa yonsu ya mu mayi manene, kabiena mua kukumbana bantu aba to!

²³ Maweja-Nangila kuandamuna Moshe ne: — Meme ndi ne bukole bua kukumbaja bionsu abi. Wewe nkayebe neudimuene amu mpindiewu mundi mbikumbaja.

Mvidi Mukulu udi upesha bakulu tshitupa tshia bukole bua Mueyelu wende

²⁴ Moshe kumuka ku ntenta, kuya kuambila bantu bivua Maweja-Nangila mumuambile. Pashishe kubikilaye bakulu ba bena Izrayele makumi muanda mutekete, kubimanyika ku ntenta wa kusambakena.

²⁵ Maweja-Nangila kupueka mu divuba bua kuyukila ne Moshe. Kuabanyinaye bakulu ba bena Izrayele abu, tshitupa tshia bukole bua Mueyelu wende, buvuaye mupeshe Moshe. Bakulu bamane kupeta Mueyelu wa Mvidi Mukulu, kutuadijabu kuakula bu bambi. Kadi kabivua bitungunuka to.

²⁶ Ku bantu makumi muanda mutekete abu, bantu babidi, Eldade ne Medade, bavua bashale ku mitanda. Kabavua baye ku ntenta wa kusambakena to. Kadi kupetabu pabu Mueyelu wa Mvidi Mukulu. Kubangabu kuakula bu bambi munkatshi mua mitanda.

²⁷ Nsongalume mukuabu kuyaye lubilu kudi Moshe, umuambila ne: — Eldade ne Medade bavua bashale ku mitanda, badi bakula bu bambi!

²⁸ Yoshuwa, muana wa Nune, uvua wambuluisha Moshe bituadije ku buana, kuelaye diyi ne: — Mfumuanyi Moshe, ubakandike, kabenji nanku!

²⁹ Moshe kuandamuna ne: — Lekela kungumvuila mukawu! Meme ndi njinga ne: Maweja-Nangila apeshe bena Izrayele bonsu Mueyelu wende bua bikale bonsu bambi!

³⁰ Pashishe Moshe ne bakulu makumi muanda mutekete ba bena Izrayele, kupingana ku mitanda.

Nyunyi ya tulumbu

³¹ Maweja-Nangila kujula lupepela lufumina ku mayi manene. Kufikalu ne nyunyi ya tulumbu ku mitanda aku. Nyunyi ayi ivua mikilangane panshi minyungulule mitanda, mutantshi wa luendu lua dituku dijima, mienza mushiki bu metre mujima.

³² Bena Izrayele kubanga kuangula nyunyi dituku adi, butuku bujima, too dituku dibiidi dijima. Uvua uyangula mikese, uvua nayi kilos binunu! Bavua bayiteka panshi nseke yonsu ku mpenga kua mitanda bua kuyanyika.

³³ Kadi, bena Izrayele kabayi banji kujikija kudia, munyinyi awu mutshikale mukana, Maweja-Nangila kubafikila munda. Kubatuminaye tshipupu tshikole.

³⁴ Kuinyikabu muaba awu ne: Kibrote-Taawa, mmumue ne: nkita ya bena lukuka. Bualu ke muaba uvuabu bajiike bena Izrayele bavua ne lukuka lua munyinyi.

³⁵ Bena Izrayele kumbuka ku Kibrote-Taawa, kuya kuasa mitanda yabu ku Asherote.