Danyele 7 - MUKANDA WA MYIDI MUKULU

Bualu bua kumpala budi Mvidi Mukulu uleja Daniyele: nyama inayi

¹ Tshidimu tshia kumpala tshia bukalenga bua Baltazare mu ditunga dia Babilone, Daniyele kulota. Pawaye mu bulalu, muoyi kumupampakana bikole, bua malu awa Mvidi Mukulu mumuleje. Pashishe Daniyele kufunda tshilota tshiende muvuaye mutshimone nunku:

² “Butuku mvua mumone Mvidi Mukulu undeja lupepele lufumina ku ntengu inayi ya buloba, lupepa pa mayi manene.

³ Nyama inayi minene mipite, kupatuka mu mayi manene. Nyama yonsu uvua mushilangane ne mukuabu.

⁴ Nyama wa kumpala uvua mufuanangane ne ntambue, kadi uvua ne mapuapua bu nyunyi wa tshiminyi. Pantshivua mutangile, kutulabu mapuapua ende. Kumuelabu panshi, kumuimanyika pa mikonu ibidi ya nyima bu muntu. Kupetaye lungenyi lua muntu.

⁵ Nyama muibidi uvua mufuanangane ne nyama wa urse, uvua mulale mu kaseka, musume mbadi isatu ku menu. Kumutuminabu diyi bua ajuke bimpe, adie munyinyi wa bungi.

⁶ Pashishe meme kumona nyama mukuabu, uvua mufuanangane ne nkashama. Uwa ne mapuapua anayi bu a nyunyi panyima pende, kabidi ne mitu inayi. Kupetaye bumfumu.

⁷ Pashishe meme kujoja bimpe malu avua Mvidi Mukulu undeja butuku: nyama muinayi umvua mumone, uvua ukuatshisha bowa, uvua ne lonji, kabidi ne bukole bua pa buabu. Uvua ne menu manene a tshiamu, bua kudia ne kusunsula bintu bivuaye ukuata. Uvua udiatakaja bintu bi-vuaye kayi udia. Uvua mushilangane menemene ne nyama isatu ya kumpala eyi. Uvua kabidi ne nsengu dikumi.

⁸ Pamvua nkenketa nsengu eyi bimpe, lusengu lupialupia lupite bukese, kumenalu munkatshi mua mikuabu. Kutulalu nsengu isatu mikuabu. Lusengu lupialupia luvua ne mesu bu a muntu, luvua ne mukana, luakula malu a ditambisha.

Mvidi Mukulu udi ulumbuluisha

⁹ “Pamvua ntangila amu kutangila, kutekabu nkuasa ya bukalenga. Mununu kufika, kusombapu. Uvua ne bilamba bitoke bu ndanda. Nsuki yende ivua bu miosa ya mikoku. Nkuasa wende wa bukalenga uvua utema kapia. Uvua ne nkata ikenka bu kapia kakole.

¹⁰ Musulu wa kapia kupatuka, kupueka kumpala kuende. Bantu bitotu, makumi a bitotu, kuimana kumpala kuende, bua kumuenzela mudimu. Pashishe bena tshilumbuluilu kusomba bua kulumbuluisha. Kubululabu mikanda.

¹¹ “Mvua ndengamena, nteleja meyi makole a ditambisha avua lusengu lukese luambe. Pantshivua ntangila, kushipabu nyama muinayi. Kuelabu mubidi wende mu kapia bua Imubutula.

¹² Kunyengabu nyama mikuabu bukalenga buayi. Kadi kuyishiyabu ne muoyi matuku mavule.

¹³ “Mvua ntangila amu kutangila malu avua Mvidi Mukulu undeja butuku: Meme kumona tshintu tshifuanangane ne muntu, ufumina mu mavuba a mu diulu. Kusemenaye mutangile kuvua mununu, kuvuabu bamufila.

¹⁴ Kumupeshabu bukokeshi, butumbi ne bukalenga bua bantu ba matunga onsu, ba bisamba bionsu ne ba miakulu yonsu. Bukokeshi buende nebushale kashidi, kabuena bujika. Bukalenga buende kabuena bufue.

Dijingulula dia bualu bua kumpala buvua Mvidi Mukulu mundeje

¹⁵ “Meme Daniyele, bowa kunkuata. Muoyi wanyi kulubakana munda, bualu malu avua Mvidi Mukulu undeja avua ankuatshisha bowa.

¹⁶ Meme kusemena pabuipi ne umue wa ku bantu bavuapu. Meme kumukonka dijingulula dia malu amvua mumone. Yeye kungumvuija ne:

¹⁷ ‘Nyama minene inayi eyi idi makalenga anayi a pa buloba.

¹⁸ Kunyima kuabu tshisamba tshia tshijila tshia Mvidi Mukulu, Muena kulu, netshiangate bukalenga. Netshibulame kashidi.’

¹⁹ Pashishe mvua musue kumanya bualu bua nyama muinayi, uvua mushilangane menemene ne nyama isatu. Ke uvua upita kukuatshisha bantu bowa, muikale ne menu a tshiamu, nzadi ya tshiamu tshikunze. Uvua udia, usunsula bintu bivuaye mukuate, udiatakaja bivuaye kayi udia.

²⁰ Mvua musue kumanya bualu bua nsengu dikumi ivua nayi nyama ku mutu; lusengu lukuabu luvua lumena, lutula nsengu mikuabu isatu. Lusengu alu luvua ne mesu, kabidi ne mukana muvua muakule miaku ya ditambisha. Luvua lumueneka bu lupite nsengu mikuabu bunene.

²¹ Pamvua ntangila, lusengu alu luvua luluangane ne tshisamba tshia tshijila, lutshitshimuna.

²² Kadi muntu kufika, kuhingisha tshisamba tshia tshijila tshia Mvidi Mukulu, Muena kulu. Pakakumbana diba, tshisamba tshia tshijila kudiatshi bukalenga.

²³ “Yeye kungumvuija kabidi nenku: ‘Nyama muinayi udi bukalenga buinayi bua pa buloba, bushilangane ne makalenga makuabu onsu. Bukalenga ebu nebubutule buloba bujima. Nebubudiatakaje mu makasa, bubusunsula.

²⁴ Nsengu dikumi, idi bakalenga dikumi balondangane mu bukalenga abu. Mukalenga wa dikumi ne umue, mushilangane ne bakuabu bavua bamudianjidile, neumbushe bakalenga bakuabu basatu, bua kudiaye bukalenga.

²⁵ Neadiwule Mvidi Mukulu, Muena kulu, ne meyi a kapeja. Neakengeshe tshisamba tshia tshijila. Neapangidije bua kushintulula bikondu ne mikenji bia tshisamba tshia tshijila. Nebafile tshisamba tshia tshijila mu bianza biende, bua atshikokeshe bidimu bisatu ne tshitupa.

²⁶ Pashishe bena tshilumbuluilu ba mu diulu nebalumbuluishe. Nebamunyenge bukalenga buende. Nebabushipe, babubutule kashidi.

²⁷ Nebapeshe tshisamba tshia tshijila tshia Mvidi Mukulu, Muena kulu, bukalenga, bukokeshi, ne lumu, bia makalenga onsu a pa buloba. Bukalenga bua tshisamba etshi nebushale kashidi. Makokeshi onsu a pa buloba neatshitumikile, atshienzela mudimu.’

²⁸ “Apa ke ndekelu wa bualu ebu. “Meme Daniyele, mvua mukuatshike bowa bua bungi. Mpala wanyi kutokoloka. Meme kutuluka bualu ebu diba dionsu mu muoyi wanyi.”