Danyele 11 - MUKANDA WA MYIDI MUKULU

¹ Mikayele ke umvua meme muambuluishe, mutue nyama ku mikolu mu tshidimu tshia bukalenga bua Darya-veshe, muena Madayi.

² Mpindiewu ndi nkumanyisha mukenji wa bushiwa. “Bakalenga banene basatu nebalondangane mu bukalenga bua bena Persa. Pashishe mukalenga muinayi neakungije bubanji bupite bua bantu basatu ba kumpala. Nenku bubanji buende nebumupeteshe bukole bua bungi. Diba adi, nealuishe bukalenga bua bena Ngreke.

Mvita pankatshi pa mukalenga wa ditunga dia ku mutu ne mukalenga wa ditunga dia kuinshi

³ Kadi muena mvita mukuabu neadie bukalenga bua bena Ngreke. Neikale ku mutu kua ditunga dialabale. Neenze mudiye musue.

⁴ Kadi pajadikaye bukokeshi buende, nebatshibule bukalenga buende. Nebabuabanye mu ntengu inayi ya buloba. Ndelanganyi yende kayena imupingana mu bukalenga to. Bukalenga buende nebabuabanyine bantu bakuabu. Kadi bantu aba kabena bapeta bukole buvuaye nabu nansha.

⁵ “Muntu udi udia bukalenga mu ditunga dia kuinshi neikale ne bukole. Kadi umue wa ku balombodi bende ba bena mvita neamupite bukole. Neikale mukalenga wa buloba budi bupite buende ku bunene.

⁶ Papita bidimu bikese, bakalenga babidi aba nebatue ndondu. Mukalenga wa ditunga dia ku mutu neasele muana wa bakaji wa mukalenga wa ditunga dia kuinshi, bua kupingaja diumvuangana munkatshi muabu. Kadi muana wa bakaji ewu kakulama bukalenga buende nansha. Bayende kakushala ne muoyi. Nansha muana udibu balela neafue. Muana wa bakaji mene neafue diakamue, ne bende bonsu, kabidi ne tatuende ne bayende.

⁷ Muntu umue wa mu diku diende neapingane mu bukalenga bua tatuende. Neaye kuluisha bena mvita ba mukalenga wa ditunga dia ku mutu mu tshimenga tshiende tshikolesha ne bimana. Neabatshimune.

⁸ Neapingane mu Ejipitu ne bintu biapawulaye: mpingu ya mvidie ya bena ditunga, kabidi ne malonga a mushinga mukole a tshiamu tshia mpawungi ne a tshiamu tshitoke tshia mushinga mukole, avuabu bajidile mvidie ayi. Papita bidimu bia bungi kabayi baluangana mvita,

⁹ mukalenga wa ditunga dia ku mutu neaye mu bukalenga bua kuinshi. Pashishe neapingane kuende.

¹⁰ “Bana ba balume ba mukalenga wa mu ditunga dia ku mutu Mbadilongolole ku mvita. Nebasangishe bena mvita bapite bungi. Umue wa kudibu neaye ne bena mvita bende. Neasambuke mikalu ne lubilu bu lua musulu wa mayi udi upasalala. Pashishe papinganaye mu ditunga diende, nealuishe tshimenga tshia baluishi tshivuabu bakoleshe ne bimana.

¹¹ Mukalenga wa ditunga dia kuinshi, neafike munda. Nealuishe mukalenga wa ditunga dia ku mutu. Awu nealongolole bena mvita tshisumbu tshinene. Kadi Mbamutshimune kudi mukalenga wa ditunga dia kuinshi.

¹² Mukalenga wa ditunga dia kuinshi, neaditambishe bua ditshimuna diende adi. Kadi nansha muyilaye mushipeshe binunu ne binunu bia bena mvita, kakubatshimuna kashidi nansha.

¹³ Mukalenga wa ditunga dia ku mutu neakunguje tshisumbu tshia bena mvita tshitambe tshia kumpala ku bunene. Papita bidimu bikese, neapingane ne tshisumbu tshinene tshia bena mvita, tshikale ne bintu bia bungi bia kuluangana nabi.

¹⁴ Mu tshikondu atshi, bantu ba bungi nebajuke bua kuluangana ne mukalenga wa ditunga dia kuinshi. Nanku bena tshinyangu ba mu tshisamba tshiebe wewe Daniyele, nebajuke. Nebatombokele mukalenga ewu, bua kukumbaja bivua Mvidi Mukulu muleje. Kadi kabakumutshimuna to.

¹⁵ Mukalenga wa ditunga dia ku mutu neafike. Neimanyike mishiki ya buloba ku tshimana tshia tshimenga. Neakuate tshimenga tshivuabu bakoleshe ne bimana. Mukalenga wa ditunga dia kuinshi, nansha mudiye ne bena mvita ba kalanda musenga, kakunutuila nkanana nansha.

¹⁶ Kadi udi ufika, ubuela mu ditunga, neenze mudiye musue. Bualu kakuakuikala muntu udi mua kumutuila nkanana. Pajikijaye kubutula miaba yonsu idiye upitshila, neabanze mu ditunga didi dipite buimpe.

¹⁷ Pashishe neapangadike bua kuleja bukole buonsu bua bukalenga buende. Neadileje ne budimu bu muntu udi musue kuenza bimpe. Neaseleshe muanende kudi mukalenga wa ditunga dia kuinshi, kadi muikale ne meji a kubutula ditunga dia muluishi wende. Kadi kakukumbaja bualu ebu to.

¹⁸ Kunyima neaye ne mvita yende ku muelelu wa ditunga. Neakuate maloba a bungi, too ne padi mukalenga muenyi umutshimuna, umupingajila malu mabi onsu avuaye muenzele bakuabu.

¹⁹ Pashishe neaye mu bimenga bia mu ditunga diende bivuabu bakoleshe ne bimana. Kadi kakupeta tshipeta tshimpe to. Neafue, kabayi mua kuvuluka kabidi bualu buende.

²⁰ Mupinganyi wende neatume muntu bua kupawula nzubu wa lumu lunene wa mu bukalenga. Kunyima kua matuku makese nebumushe mukalenga ewu ku bumfumu, bantu kabayi bamanye, kakuyi nansha mvita.

²¹ “Muntu udi bantu bapetula neamupingane mu nkuasa, kadi kabena bamupesha muanzu wa bukalenga. Muntu ewu neafike tshikondu tshidi bantu basomba talalaa, bua kunyenga bukalenga mu musokoku.

²² Kakuena tshiluilu tshidi mua kumutshimuna. Neabutule biluilu bionsu. Neashipe kabidi mukalenga wa bena tshisamba tshia ndondu.

²³ Neangate ndondu idibu batue nende bua kudinga nayi bantu. Neikale ne bukole bua bungi, nansha bantu bakese bamulonda munyima.

²⁴ Nansha bantu basomba talalaa, neaye miaba ya mu ditunga idi mipite buimpe, bua kuenza malu avua bankambua bende kabayi benza: neapawule ditunga, abanyine bantu badi bamulonda bintu ne biuma, bivuaye mupawule. Neakebe mua kuluisha bimenga biwabu bakoleshe ne bimana. Kadi malu onsu awu kaena atungunuka kashidi to.

²⁵ “Mudimanye mudiye ne bukole kabidi ne bukitu, neaye ne tshisumbu tshinene tshia bena mvita bua kuluisha mukalenga wa ditunga dia kuinshi. Mukalenga ewu neasangane nende, ne bena mvita ba bungi, ne ba bukole bupite. Kadi kakunutuila nkanana. Bualu nebamuluishe ne budimu.

²⁶ Bualu, bantu badiye usomba nabu, nebamutungile bitungu. Nebatshimune bena mvita bende, babashipe tshisumbu tshipite bunene.

²⁷ Bakalenga babidi nebasombe muaba umue, kadi mitshima yabu neikale miuwule tente ne malu mabi. Nanku nebambilangane meyi a dishima. Disomba diabu dia pamue kadiena dilubuluka. Bualu tshikondu tshia nshikidilu katshiena tshianji kukumbana.

²⁸ Mukalenga wa ditunga dia ku mutu neaye mu ditunga diende ne bubanji bua bungi. Mu luendu alu neenzele tshisamba tshidi tshitue ndondu wa tshijila mudiye musue. Pashishe neapingane mu ditunga diende.

²⁹ “Pakumbana tshikondu tshivuabu bajadike, mukalenga wa ditunga dia ku mutu neaye tshiakabidi mu bukalenga bua kuinshi. Kadi malu a mu tshikondu etshi kaakuenzeka muvua malu a mu tshikondu tshia kumpala nansha.

³⁰ Bantu ba ku luseke ludi diba dibuelela nebafike ne majuwa a mayi. Nebamuluishe mvita. Neatekete mu maboku. Neapingane tshianyima. Nealuishe tshiakabidi tshisamba tshidi tshitue ndondu wa tshijila, bualu neumvuangane ne bantu badi babenga ndondu awu.

³¹ Bena mvita bavuaye mutume nebanyange muaba wa tshijila. Nebakandike bantu, bua kabalambudi Mvidi Mukulu mulambu wa ku dituku ne ku dituku. Nebateke ‘Bualu bubi butambe’ ” pa tshilambuilu.

³² Mukalenga ewu nkayende, ne miaku yende ya lubombu, neafikishe bantu ku dishipa dia ndondu. Kadi bantu bonsu badi bitaba Mvidi Mukulu ne muoyi umue, nebashindame mu malu adibu benza.

³³ Munkatshi mua bantu aba badi ne meji mapite, nebalongeshe bantu bakuabu ba bungi. Kadi matuku makese nebashipe bamue ba munkatshi muabu, neboshe bakuabu, nebeele bakuabu mu lukanu, bamane kubanyenga bintu biabu.

³⁴ Matuku a tshinyangu aa, bantu bakese nebabambuluishe, bualu bantu ba bungi nebabalamate, bikale ne mpala ibidi.

³⁵ Bantu ba bungi nebafue munkatshi mua bantu ba meji. Lufu luabu nelumbushe mikiya ya bantu. Nelubalengeje, lubatokeshe too ne pafika tshikondu tshia ku nshikidilu wa malu. (Bualu tshikondu tshia ku nshikidilu ki ntshianji kufika.)

³⁶ “Mukalenga neenze mudiye musue. Neaditambishe. Neadimone bu udi ku mutu kua mvidie. Neadiwule Mvidi Mukulu wa mvidie yonsu ne meji mapite bubi. Neakume dikasa dimpe, too ne pamueneka tshiji tshia Mvidi Mukulu. Diba adi, Mvidi Mukulu neakumbaje tshivuaye mupangidi ke.

³⁷ Mukalenga kakunemeka mvidie ivua bankambua bende batendelela, nansha mvidie udi bakaji banange bikole. Nanku nuditangile bu udi ku mutu kua mvidie yonsu. Kukunemeka mvidie nansha umue.

³⁸ Pa muaba wayi neatendelele mvidie wa bimenga bikolesha, mvidie udi bankambua bende kabayi bamanye. Nealambule mvidie ewu tshiamu tshia mpawungi, tshiamu tshitoke tshia mushinga mukole, mabue a mushinga mukole, ne bintu bikuabu bia mushinga.

³⁹ Nealuangane ne bimenga bionsu ne diambuluisha dia mvidie muenyi awu. Neatumbishe bantu bonsu badi bitaba mvidie ewu. Neabapeshe bumfumu ku mutu kua bantu ba bungi. Neabapeshe kabidi maloba bu kalumbandi.

⁴⁰ “Mu tshikondu tshia ku nshikidilu, mukalenga wa ditunga dia kuinshi neabangulule mvita. Kadi mukalenga wa ditunga dia ku mutu neamupishe ne matempu a mvita, ne badi babanda pa nyama ya tubalu, kabidi ne matu mavule a mvita. Neabuele mu matunga mashilangane ne bena mvita bende. Neasambuke mikalu, bu mudi mayi a musulu apasalala.

⁴¹ Neakuate ditunga didi dipite buimpe. Neashipemu bantu ba bungi. Kadi bena Edome, bena Mowabe, ne bantu basungula ba bena Amone nebapanduke mu bianza biende.

⁴² Neakokeshe matunga makuabu. Nansha ditunga dia Ejipitu kadiena diumuka ku bumfumu buende nansha.

⁴³ Neanyenge bintu bia mushinga mukole bia mu Ejipitu: mpawungi, tshiamu tshitoke tshia mushinga mukole, ne bintu bia mushinga mukole. Bena Libiya ne bena Etiyopiya nebamuitabe.

⁴⁴ Kadi ngumu ya ku luseke ludi diba dipatukila, ne ya ku mutu kua ditunga neyimukuatshishe bowa. Neapete tshiji tshikole bua kubutula tshisumbu tshinene tshia bantu.

⁴⁵ Nease mitanda yende ya bukalenga pankatshi pa mayi manene ne mukuna wa tshijila wa mu ditunga dipite buimpe. Koku aku nkuafuilaye, kakuyi muntu udi mua kumuambuluisha.”