Danyele 10 - MUKANDA WA MYIDI MUKULU

Bualu buisatu budi Mvidi Mukulu uleja: muntu muvuale bilamba bia buanda bua ndanda

¹ Mu tshidimu tshisatu tshia bukalenga bua Koreshe, mukalenga wa bakalenga wa bena Persa, Mvidi Mukulu kumanyisha Daniyele, muabu binyika kabidi ne Beltashare, bualu. Bualu ebu buvuabu kabayi mua kuela mpata, buvua bumanyisha Daniyele makenga a bungi. Daniyele kuelangana meji bikole ku bualu ebu. Kujingululaye bualu buvua Mvidi Mukulu musue kumuleja.

² “Diba adi, meme Daniyele, mvua mu madilu mbingu isatu mijima.

³ Tshivua ndia biakudia bisheme, tshivua ndia munyinyi, tshivua nnua maluvu, tshivua ndibeyesha nsuki, too ne pakajika mbingu isatu ayi.

⁴ Dituku dia makumi abidi ne dinayi dia ngondu wa kumpala, mvua ku muelelu wa musulu munene wa Tigre.

⁵ Pamvua ntangila, meme kumona muntu muvuale bilamba bia ndanda, musuike mukaba wa tshiamu tshimpe tshia mpawungi mu tshimonu.

⁶ Mubidi wende uvua mufuanangane ne dibue dia mushinga mukole. Mpala wende uvua ukenka bu mupenya wa mvula. Mesu ende awa mafuanangane ne bimunyi bia kapia. Maboku ende ne mikolu yende bivua bibalakana bu tshiamu tshikunze tshinoona. Pavuaye wakula, diyi divua ne tshiona bu tshia mutoyi wa bantu bavule.

⁷ Amu meme Daniyele nkayanyi ke uvua mumone muntu awu. Bantu bavua bannyungulukila kabawa bamone tshintu to. Kadi bowa kubakuata, kunyemabu kuya kusokoma.

⁸ Meme kushala nkayanyi, ntangila bualu abu bua dikema, buvua Mvidi Mukulu undeja. Kadi meme kupanga bukole diba adi. Mpala wanyi kukudimuka, kutokoloka. Meme kujimija bukole buanyi buonsu.

⁹ Meme kumvua muntu awu wakula. Amu ngumvua diyi diende adi, meme kufua tshipuka, kudishinda mutue mpala panshi.

¹⁰ Pashishe tshianza kundenga, kunjula. Ke luzakalu kungenza ku binu ne ku bianza.

¹¹ Muntu awu kungambila ne: ‘Daniyele, wewe udi Mvidi Mukulu unanga, udibambe bua kujingulula miaku indi nkuambila. Imana kulu, bualu mbantume kuudi mpindiewu.’ Ngumvua nanku, meme kuimana kulu, nzakala.

¹² Kuambaye kabidi ne: ‘Daniyele, kutshinyi nansha! Kubangila ku dituku diuvua mudipuekeshe ku mesu a Mvidi Mukulu, muikale ne muoyi wa kujingulula malu avua enzeka aa, Mvidi Mukulu mmumvue ditendelela diebe. Ke pandi mufike bua kukutuadila diandamuna.

¹³ Kadi mutumibue wa Mvidi Mukulu, mulami wa bukalenga bua bena Persa, uvua muanji kuntuila nkanana matuku makumi abidi ne dimue, too ne diba diakafika Mikayele, umue wa ku bamfumu ba batumibue ba Mvidi Mukulu, bua kungambuluishaye. Nenku bavua banji kundama kudi bakalenga banene ba bena Persa.

¹⁴ Mpindiewu ndi mufike bua kukujinguluila malu adi ne bua kukuata bena tshisamba tshiebe mu matuku adi kumpala. Ke bualu bukuabu butshidi Mvidi Mukulu ukuleja bua matuku adi kumpala.’

¹⁵ “Pawaye ungambila miaku eyi, mvua muiname mutangila panshi. Tshivua ne bukole bua kuakula diyi nansha dimue to.

¹⁶ Kadi tshia muoyi tshikuabu, tshifuanangane ne muntu, kundenga ku mishiku. Ke meme kubulula mukana, kuakula tshiakabidi. Meme kuambila muntu uvua muimane kumpala kuanyi ne: ‘Mfumu wanyi, bua bualu ebu budi Mvidi Mukulu mundeje, dibungama ndinkuate. Tshiena ne bukole nansha.

¹⁷ Meme muntu wa tshianana, ndi mua kuyukila ne mfumu wanyi bishi, pandi tshiyi nansha ne bukole, tshiyi ne mueyelu mene.’

¹⁸ Diakamue, uvua mufuanangane ne muntu awu kundenga tshiakabidi, bua kumpingajila bukole.

¹⁹ Muntu mukuabu kungamba ne: ‘Muntu udi Mvidi Mukulu munange, kutshinyi nansha! Malu onsu adi enda bimpe bualu buebe! Kolesha muoyi, kankamana!’ Patshivuaye wenda ungakuisha, bukole buanyi buvua buenda bupingana. Meme kumuambila ne: ‘Mfumu wanyi, udi mua kungakuisha, bualu udi mumpingajile bukole.’

^20-21 Yeye kuamba ne: ‘Udi mumanye ne: ndi mufike kuudi bua tshinyi? Ndi mufike bua kukumanyisha malu adibu bafunde mu mukanda wa bulelela. Kadi ntshidi ne bua kuluisha mutumibue mulami wa ditunga dia Persa. Pa diba menemene dindi nya kumuluisha, mutumibue mulami wa ditunga dia bena Ngreke kufika. Kakuena muntu nansha umue udi ungambuluisha bua kuluisha baluishi aba, anu Mikayele mutumibue wa Mvidi Mukulu udi ulama Izrayele.