Bienzedi 9 - MUKANDA WA MYIDI MUKULU

Yezu udi ubikila Shawule

¹ Kadi Shawule utshivua amu ukanyina balongi ba Mfumu, ukeba kubashipa. Ke kuyaye kudi mutuangaji munene,

² umulomba mikanda bua kuyaye kudileja nayi mu nzubu ya kutendelela ya bena Yuda ya mu tshimenga tshia Damase. Ne mikanda ayi, yeye musangane bantu, balume nansha bakaji, badi balonda Njila wa Mfumu, uvua mua kubakuata, kuya nabu ku Yerushalayime.

³ Patshivuaye mu njila uya mu Damase, ufika pabuipi ne tshimenga atshi, bu mpindiewu butoke kufuma mu diulu, kumunyungulukila.

⁴ Kuponaye panshi. Kumvuaye diyi dimuebeja ne: — Shawule, Shawule, udi unkengeshila tshinyi?

⁵ Shawule kuebeja ne: — Mukalenga, wewe udi nganyi? Ke diyi kuandamuna ne: — Ndi Yezu uudi ukengesha.

⁶ Kadi, juka, buela mu tshimenga. Nebakuambilemu tshiudi ne bua kuenza.

⁷ Bantu bavua ne Shawule mu njila, kupampakana, bapuwa. Bavua bumvua diyi, kabayi bamona muntu.

⁸ Shawule kujuka panshi, utabala, kadi nanshaye kumona tshintu. Kumukuatabu ku tshianza, bua kumufikisha mu Damase.

⁹ Kushalaye matuku asatu, kayi mua kumona, kayi udia nansha unua kantu.

¹⁰ Mu Damase muvua mulongi mukuabu, dina diende Ananiyase. Mfumu kumumuenekela, kumubikila ne: — Ananiyase! Yeye kuandamuna ne: — Mfumu, ke meme ewu!

¹¹ Mfumu kumuambila ne: — Juka, uye lukasa mu musesu Mululame. Ukonke ku nzubu kua Yudase. Kudi muntu wa mu Tarse, dina diende Shawule. Udi utendelela mpindiewu.

¹² Mvua mumuleje muntu, dina ne Ananiyase, ubuela, umutenteka bianza, bua kumonaye tshiakabidi.

¹³ Ananiyase kuandamuna ne: — Mfumu, bantu ba bungi bavua batela muntu awu, bangambila malu mabi onsu avuaye wenzela bantu bebe mu Yerushalayime.

¹⁴ mMufike munu ne bukenji bua kudi batuangaji banene, bua kukuata bonsu badi bitaba dina diebe.

¹⁵ Ke Mfumu kumuandamuna ne: — Uye. Bualu muntu awu ke tshiamu tshia mudimu tshindi musungule, bua kumanyishaye bisamba bikuabu, bakalenga ba matunga, ne bena Izrayele, dina dianyi.

¹⁶ Nemmuleje muonsu muakengaye bua dina dianyi.

¹⁷ Ke Ananiyase kuya. Kubuelaye mu nzubu awu, kutenteka Shawule bianza, umuamba ne: — Muanetu Shawule, Mfumu Yezu uvua mukumuenekele mu njila muudi utumina, mmuntume bua wewe kumona tshiakabidi, kuwula kabidi ne Mueyelu wa Tshijila.

¹⁸ Diakamue bintu kupatuka mu mesu a Shawule bu mamba a nyama. Yeye kutuadija kumona tshiakabidi. Kujukaye. Kumutuabu mu mayi.

¹⁹ Pashishe kudiaye, kupeta bukole. Shawule kushala amue matuku ne balongi ba mu Damase.

Shawule udi ulongesha mu Damase

²⁰ Diakamue kutuadijaye kulongesha mu nzubu ya kutendelela, ujadika ne: Yezu udi Muana wa Mvidi Mukulu.

²¹ Bonsu bavua bamuteleja bavua bakema, bamba ne: — Uvua ukengesha bikole bantu bavua bitaba dina dia Yezu mu Yerushalayime, ki mmuntu ewu anyi? Ki mmufike apa bua kukuata bantu, kubafila kudi bamfumu ba batuangaji anyi?

²² Kadi Shawule uvua amu ulongesha ne bukole ku dituku ku dituku. Pavuaye uleja bena Yuda bavua basomba mu Damase ne miaku ya mu Mukanda wa tshijila ne: Yezu udi Kristu, Musungidi wetu, kabavua bamona pa kumuandamuina.

²³ Matuku makese apita, bena Yuda kumyuangana bua kumushipesha.

²⁴ Kadi bantu bakuabu kumanyisha Shawule tshifufu tshiabu atshi. Baluishi bende kulama biibi bia tshimenga munya ne butuku, bua bamone mua kumushipesha.

²⁵ Ke balongi bende kumuangata butuku, kumutuluila pambidi pa tshimana tshia tshimenga mu tshisaka.

Shawule mu Yerushalayime

²⁶ Shawule ufika mu Yerushalayime, kuidikijaye mua kudisanga ne balongi. Kadi balongi bonsu bavua amu bamutshina. Kabavua bitabe ne: Shawule udi mulongi menemene to.

²⁷ Ke Barnabase kumuangata, kumufikisha kudi bapostolu. Kubalondelaye muvua Shawule mumone Mfumu mu njila, kabidi mutua Mfumu muyukile nende. Kubumvuijaye kabidi ne: Shawule mutulongeshe mu Damase ne dikima mu dina dia Yezu.

²⁸ Ke Shawule kutuadija kuendakana ne balongi miaba yonsu mu Yerushalayime, ulongesha ne dikima mu dina dia Mfumu.

²⁹ Uvua uyukila kabidi ne bena Yuda bavua bakula tshiena ngreke, welangana nabu mpata. Kadi bantu abu bavua bakeba kumushipesha.

³⁰ Balongi bamanya bualu abu, kufilabu Shawule mu Kezareya, bua afike mu Tarse.

³¹ Diba adi Tshisumbu tshia bena ditaba tshivua ne ditalala mu ditunga dijima dia Yudeya, dia Ngalileya, ne dia Samariya. Tshivua tshienda tshikola. Bu muvua bena ditaba balamata Mfumu, batua batanta ne diambuluisha dia Mueyelu wa Tshijila.

Petro udi ujikija disama dia Eneyase

³² Petro uvua wendakana mu ditunga dijima. Dituku dikuabu kuyaye kukumbula bena ditaba ba mu musoku wa Lida.

³³ Mu musoku amu Petro kusangana muena tuneke, dina diende Eneyase. Ukatua mulale mu bulalu panshi bidimu muanda mukulu.

³⁴ Petro kumuamba ne: — Eneyase, Yezu udi ujikija disama diebe! Juka, udilongoluele bulalu! Eneyase kujuka diakamue.

³⁵ Bena mu Lida bonsu, ne bena mu mpata wa Sarone, bamumona wenda bimpe, kuitababu Mfumu.

Petro udi ubisha Tabita ku bafue

³⁶ Mu Yope muvua mukaji muena ditaba, dina diende Tabita (ke “Dorkase” mu buena ngreke, mmomumue ne “ngulungu.”) Uvua wenza malu mempe a bungi, wambuluisha kabidi bapele.

³⁷ Matuku awu disama kumukuata, kufuaye. Kulongololabu tshitalu tshiende, kutshiteka mu nzubu mu tshibambalu tshia kulu.

³⁸ Balongi ba mu Yope kumvua ne: Petro udi mu Lida. Bu muvua Lida kayi mutantshi mule ne Yope, kutumabu bantu babidi kudi Petro, bamusengelela ne: “Fika lukasa munu, kujingakanyi.”

³⁹ Petro kuya ne bantu babidi aba diakamue. Ufika, kumubandishabu ku tshibambalu tshia kulu. Bakamba bonsu kumujingila ne miadi, bamuleja bilamba bia pambidi ne binkutu bivua Dorkase mutele, patshivuaye ne muoyi.

⁴⁰ Petro kupatula bantu bonsu mu nzubu, kutua binu, utendelela Mvidi Mukulu. Pashishe kutangilaye tshitalu, wamba ne: — Tabita, biika! Tabita utabala, kumonaye Petro. Kujukaye pa bulalu, kusomba.

⁴¹ Ke Petro kumukuata ku tshianza, umujula pa bulalu. Ke kubikilaye bena ditaba ne bakamba, ubaleja Tabita ne muoyi.

⁴² Bualu ebu kumanyika mu Yope mujima. Bantu ba bungi kuitaba Mfumu.

⁴³ Petro kushala matuku mavule mu Yope kua Simone, muena mudimu wa biseba.