Bienzedi 7 - MUKANDA WA MYIDI MUKULU

Stefane udi ulongesha bantu

¹ Mutuangaji munene kukonka Stefane ne: — Bidi bantu aba bakusonguela nabi mbia bushuwa anyi?

² Ke Stefane kuandamuna ne: — Batatu, bana betu, ntelejayi. Mvidi Mukulu wa butumbi kumuenekela nkambua wetu Abrahame, patshivuaye mu Mezopotamiya, kayi muanji kuya mu Arane.

³ Kumuambilaye ne: “Umbuka mu ditunga dienu ne mu diku dienu, uye mu ditunga dingakuleja.”

⁴ Abrahame kumbuka mu ditunga dia bena Kesede, kuya kuasa mu Arane. Tatuende mumane kufua, Mvidi Mukulu kumufikisha mu ditunga dinudi basombe mpindiewu edi.

⁵ Mu ditunga edi Mvidi Mukulu kavua mupeshe Abrahame buloba nansha bukese, nansha muaba bunene bua dikasa to. Kadi Mvidi Mukulu kumulaya amu bua kumupa ditunga. Ndelanganyi yende ivua mua kudipiana, yeye mumane kufila. Kadi tshikondu atshi Abrahame kavua muanji kulela.

⁶ Ke Mvidi Mukulu kumuambila ne: “Ndelanganyi yebe neisombe mu ditunga dia bende. Nebashalemu mu bupika bidimu nkama inayi. Nebabakengeshemu.

⁷ Kadi nennyoke bantu bavua babakuate ku bupika. Pashishe nebumbuke mu ditunga adi, bua kuntendelela muaba ewu.

⁸ Nenku Mvidi Mukulu kutua ndondu ne Abrahame. Tshimanyinu tshia ndondu ewu ke ditekangana panshi. Abrahame kulela Izake, kumuteka panshi kunyima kua matuku muanda mukulu. Izake pende kuteka Yakobe panshi. Yakobe kuenza momumue ne bankambua betu dikumi ne babidi.

⁹ Bankambua kutekela Yozefe lubabu, kumupana bua ashale mupika mu Ejipitu. Kadi Mvidi Mukulu uvua nende.

¹⁰ Kumusungidilaye ku makenga ende onsu. Kumuambuluishaye bua mukalenga wa bena Ejipitu, amunange, anyishe meji ende. Ke mukalenga awu kumuteka mulombodi wa ditunga dia Ejipitu, ne wa nzubu wende mujima wa bukalenga.

¹¹ Tshiyole tshia nzala kubuela mu ditunga dijima dia Ejipitu ne dia Kenaane. Bantu kukenga bikole. Bankambua betu kabavua ne tshiakudia.

¹² Yakobe umvua ne: mu Ejipitu mudi ntete ya kuenza bukula, kutumayemu bankambua betu musangu wa kumpala.

¹³ Musangu muibidi uvuabu baye mu Ejipitu, Yozefe kudimanyisha kudi bana babu. Nanku diku dia Yozefe kumanyikadi kudi mukalenga wa bena Ejipitu.

¹⁴ Ke Yozefe kubikidisha tatuende Yakobe ne diku diabu dijima; bantu bonsu basanga bavua makumi muanda mutekete ne batanu.

¹⁵ Nanku Yakobe kupueka mu Ejipitu. Ke muakafuilaye, ne bankambua betu kabidi.

¹⁶ Kuambulabu bitalu biabu, kuya nabi mu Shekeme, kubijikabu mu lukita luvua Abrahame musumbe, mufile mushinga kudi bana ba Emore, nkambua wa bena Shekeme.

¹⁷ Matuku avua Mvidi Mukulu ne bua kukumbaja bivuaye mulaye Abrahame, tshisamba tshietu kutanta, kuvulangana mu Ejipitu.

¹⁸ Ke mukalenga mupiamupia, uvua kayi mumanye Yozefe, kudia bukalenga bua bena Ejipitu.

¹⁹ Mukalenga awu kudinga bana betu, kukengesha bankambua, kubenzeja ku bukole bua bashiye bana babu batekete mu tshisuku, bafue.

²⁰ Ke tshikondu tshivuabu balele Moshe, muana wa mpala muimpe, uvua mutokele Mvidi Mukulu ku muoyi. Kumudishabu ngondu isatu ku nzubu kua tatuende.

²¹ Pavuabu bamushiye pende mu tshisuku nanku, muana wa bakaji wa mukalenga wa bena Ejipitu kumuangula, kumukolesha bu muanende mulela.

²² Ke muvuabu balongeshe Moshe malu onsu avua bena Ejipitu bamanye. Kuenzaye muntu uvua mumanye mua kuakula ne kulongolola malu.

²³ Moshe ukumbaja bidimu makumi anayi, kujingaye kumonangana ne bana babu bena Izrayele.

²⁴ Dimue dituku kumonaye muena Ejipitu ukengesha muena Izrayele. Kusungidilaye uvuabu bakengeshe. Bua kumusombuela, kushipaye muena Ejipitu.

²⁵ Uvua wela meji ne: bana betu bena Izrayele nebumvue ne: Mvidi Mukulu mmunsungule bua kubapikula. Kadi bobu kabavua bitabe nanku to.

²⁶ Butshia, Moshe kusangana bena Izrayele babidi baluangana. Kukebaye mua kubasunga, ubabela ne: “Bana betu, nudi bena muntu. Nudi nukengeshangana bua tshinyi?”

²⁷ Kadi uvua ukuma muinende, kusakila Moshe, umuamba ne: “Udi mukuteke mfumu ne mukoshi wa nsambu yetu nnganyi?

²⁸ Udi musue kunshipa, muuvua mushipe muena Ejipitu makelela anyi?”

²⁹ Moshe umvua miaku ayi, kunyemaye, kuya mu buloba bua Madiyane. Kulelayemu bana ba balume babidi.

³⁰ Bidimu makumi anayi bimane kupita, mutumibue wa Mvidi Mukulu kumuenekela Moshe mu tshipuka tshitema kapia, mu tshipela tshivua pabuipi ne mukuna wa Sinayi.

³¹ Moshe kukatshila bivuaye mumone abi. Kusemenaye pabuipi bua kubibandila. Kumvuaye diyi dia Maweja-Nangila, diamba ne:

³² “Meme ndi Mvidi Mukulu wa bankambua bebe, Mvidi Mukulu wa Abrahame, wa Izake ne wa Yakobe.” Moshe kuzakala ne bowa. Nanshaye kukimina kubanduluka kabidi.

³³ Ke Maweja-Nangila kumuamba ne: “Ko-pola bisabata, bualu muaba uudi muimane ewu mbuloba bua tshijila.

³⁴ Ndi mumone mudi bantu banyi bakenga mu Ejipitu. Ndi mumvue mudibu batua mikemu. Ke pandi mupueke bua kubasungidila. Mpindiewu, luaku! Ndi nkutuma ku Ejipitu.”

³⁵ Bena Izrayele bavua babenga Moshe, bamuamba ne: “Udi mukuteke mfumu ne mukoshi wa nsambu yetu nnganyi?” Kadi yeye Moshe, ke muntu uvua Mvidi Mukulu mutume, bua alombole bantu bende, abapikule ku diambuluisha dia mutumibue wende, uvua mumumuenekele mu tshipuka.

³⁶ Moshe kupatula bena Izrayele mu Ejipitu, kuenza bishima ne malu a dikema mu ditunga dia bena Ejipitu, mu mayi manene Makunze, ne mu tshipela, bidimu makumi anayi.

³⁷ Moshe awu kabidi ke uvua muambile bena Izrayele ne: “Mvidi Mukulu neanutumine muambi bu meme, muntu wa mu tshisamba tshienu.”

³⁸ Moshe ke uvua pamue ne bena Izrayele mu tshipela: uvua pankatshi pa bankambua betu ne mutumibue wa Mvidi Mukulu, uvua wakula nende pa mukuna wa Sinayi. Mvidi Mukulu kumumanyisha miaku idi mua kumpetesha muoyi. Moshe kuyifikisha kutudi.

³⁹ Kadi bankambua betu bavua babenga kumutumikila. Bavua bamudiombola, bajinga kupingana mu Ejipitu.

⁴⁰ Bavua bambila Arone ne: “Utuenzele nwidie idi mua kutulombola, bualu Moshe uvua mutupatule mu Ejipitu awu, katuena bamanye tshidi tshi-muenzekela.”

⁴¹ Kufulabu lupingu lua muana wa ngombe, kululambulabu mulambu. Nanku kusankidilabu tshintu tshivuabu benze ne bianza biabu!

⁴² Ke Mvidi Mukulu kubalengulula, kubalekela banemeke mabulunge a mulu. Ke mudibu bafunde mu mukanda wa bambi ne: “Bena Izrayele, bidimu makumi anayi binuvua mu tshipela, nuvua bandambule meme milambu ya nyama, nansha milambu mikuabu anyi?

⁴³ Nansha kakese! Kadi nuvua bambule ntente wa nwidie Moloke, ne tshimfuanyi tshia Refane, nwidie wenu wa mutotu. Ke mpingu inuvua benze bua kuyikukuila. Ke pandi nnufila mu bupika, dia muamua dia Babilone.

⁴⁴ Mu tshipela, bankambua betu bavua ne ntente wa kusambakena, uvuabu benze mushindu uvua Mvidi Mukulu muambile Moshe, kabidi bilondeshile tshivua Mvidi Mukulu mumuleje.

⁴⁵ Bankambua betu bakuabu bavua bapiane ntente ewu. Bavua bamuambula diba divua Yoshuwa, mulombodi wabu, mukuate nabu ditunga divua dia bisamba bia bende. Bisamba abi, Mvidi Mukulu uvua ubipata, pavua bena Izrayele benda babuela mu ditunga. Nanku ndelanganyi yonsu ya bena Izrayele kushala ne ntente awu, too ne ku tshikondu tshia Davide.

⁴⁶ Davide kabidi uvua mutokele Mvidi Mukulu ku muoyi. Kulombaye bua amone mua kuashila Mvidi Mukulu wa Yakobe nzubu.

⁴⁷ Kadi nzubu awu, bakamuasa amu kudi Shelomu.

⁴⁸ Kadi Mvidi Mukulu wa mulu kena usomba mu nzubu miasa kudi bantu. Bambi bavua bajadika ne:

⁴⁹ “Maweja-Nangila udi wamba ne: Diulu ke nkuasa wanyi, buloba ke tshidiatshilu tshia makasa anyi. Kadi nuenu nenungashile nzubu wa mushindu kaayi? mMuaba kaayi ungasomba meme?

⁵⁰ Diulu ne buloba, ki mmeme udi mubienze anyi?”

⁵¹ Nuenu bantu ba mutu mukole, ba muoyi mupape, kanuena nuitaba ku lubila lua Mvidi Mukulu! Nudi amu nutombokela Mueyelu wa Tshijila! Muvua bankambua benu benza, ke munudi nuenza amu!

⁵² Kudi muambi uvua bankambua benu kabayi bakengeshe anyi? Bavua bashipe bantu bavua babamanyishe ne: Muena buakane neafike. Ke Yeye unudi bapangile, bashipe kabidi mpindiewu!

⁵³ Mvidi Mukulu kunutumina mikenji yende kudi batumibue bende. Kadi kanuena bayikumbaje to!

Badi bashipa Stefane

⁵⁴ Bena Tshipangu bumvua miaku yonsu eyi, kufikabu munda bikole, kudia dinu, pavuabu batangile Stefane.

⁵⁵ Kadi Stefane, muwule ne Mueyelu wa Tshijila, kutangila mulu, kumona butumbi bua Mvidi Mukulu, ne Yezu muimane ku dia bukole dia Mvidi Mukulu.

⁵⁶ Kuambaye ne: — Telejayi: ndi mmona diulu diunzuluke. Ndi mmona Muana wa muntu, muimane ku dia bukole dia Mvidi Mukulu.

⁵⁷ Ke kuelabu mbila mikole, bajibika ne bianza ku matshi. Kudielabu kudiye bonsu tshiapamue.

⁵⁸ Kumukokelabu ku mpenga kua tshimenga. Kumuasabu mabue bua kumushipa. Bajadiki ba bualu ebu, bavua badianjila kumuasa mabue, bavua bashiye bilamba biabu kudi nsongalume, diende Shawule.

⁵⁹ Pavuabu bamuasa mabue apu, Stefane uvua utendelela Mvidi Mukulu, wamba ne: — Mfumu Yezu, angata muoyi wanyi!

⁶⁰ Pashishe kutuaye binu panshi, kuela lubila lukole ne: — Mfumu, kuvuluki bubi buabu ebu! Mumane kuamba nanku, kukulaye muoyi.