Bienzedi 6 - MUKANDA WA MYIDI MUKULU

Badi basungula bantu muanda mutekete bua bambuluishe bapostolu

¹ Matuku makese apita, bu muvua bungi bua balongi buvulangana, bena Yuda bavua bakula tshiena ngreke, kujana bena Yuda ba mu ditunga. Bavua bamba ne: bena ditunga badi balengulula bakamba betu, padibu bababanyina biakudia ku dituku ku dituku.

² Nanku bapostolu dikumi ne babidi kusangisha balongi bonsu, kubambila ne: — Katuena mua kulekela kulongesha muaku wa Mvidi Mukulu, bua kubuelakana ne malu a didia to.

³ Nenku bana betu, sungulayi munkatshi muenu bantu ba lumu luimpe muanda mutekete, badi buwule ne Mueyelu wa Tshijila, kabidi ne meji. Netubateke ku mudimu ewu.

⁴ Tuetu netutungunuke ne mudimu wetu wa kutendelela Mvidi Mukulu, ne wa kulongesha muaku wende.

⁵ Bantu bonsu kuanyisha bivua bapostolu bambe. Kusungulabu Stefane, muntu wa ditaba divule, muwule kabidi ne Mueyelu wa Tshijila, pamue ne Filipe, Prokore, Nikanore, Timona, Parmenase, ne Nikola, muena Antiyokiya, uvua mubuele mu tshisumbu tshia bena Yuda kukavua matuku.

⁶ Pashishe kubalejabu kudi bapostolu. Abu kutendelela Mvidi Mukulu, kubatenteka bianza.

⁷ Muaku wa Mvidi Mukulu kutanta bikole. Balongi kuelangana mu Yerushalayime. Batuangaji ba bungi bavua batuadija kuitaba.

Badi bakuata Stefane

⁸ Mvidi Mukulu uvua muele Stefane lupemba. Kupetaye bukole bua kuenza bishima ne malu a dikema munkatshi mua bantu.

⁹ Bantu bakuabu ba mu nzubu wa kutendelela wa bena Yuda, uvuabu binyika ne: “Ngwa Bapikula,” kudiwula Stefane. Bantu abu bavua bena Yuda ba mu musoku wa Sirene, ne ba mu tshimenga tshia Aleksandriya, kabidi ba mu buloba bua Silisiya ne Aziya. Kuelanganabu mpata ne Stefane.

¹⁰ Kadi kabavua ne bukole bua kumutuisha. Bualu Stefane uvua wakula ne meji, avuaye mupete kudi Mueyelu wa Tshijila.

¹¹ Kubuejilabu bantu, bua bamusonguele ne: “Tudi bamumvue usendeka Moshe, ne Mvidi Mukulu mene!”

¹² Ke pavuabu basonsola bakulu, ne balongeshi ba mikenji, ne bantu bakuabu. Kuyabu kudi Stefane, kumukuata, kuya nende ku Tshipangu tshikulu.

¹³ Kubilabu kabidi bantu bavua bamushiminyina malu, bamba ne: — Muntu ewu udi amu usendeka nzubu wetu wa tshijila, ne mikenji ya Moshe!

¹⁴ Tudi bamumvue wamba ne: “Yezu wa mu Nazarete awu neupule nzubu wa Mvidi Mukulu; neakudimune kabidi bibidilu bivua Moshe mutushile!”

¹⁵ Bantu bonsu bavua basombe mu nzubu wa Tshipangu bavua batangile Stefane talalaa. Bavua bamone mpala wende umueneka bu wa mutumibue wa Mvidi Mukulu.