Bienzedi 5 - MUKANDA WA MYIDI MUKULU

Ananiyase ne Safira

¹ Kavua muntu mukuabu, dina diende Ananiyase. Bavua bumvuangane ne mukajende Safira bua kupana budimi buabu.

² Kadi Ananiyase kudilamina tshitupa tshia lupetu lua budimi, kuya ne tshikuabu kudi bapostolu. Mukajende uvua mumanye mu-vuaye muenze amu.

³ Ke Petro kumuebeja ne: — Ananiyase, mudi diabolu mubuele mu muoyi webe mmunyi? Udi mushime Mueyelu wa Tshijila, mudilamine tshitupa tshia mushinga wa budimi bua tshinyi?

⁴ Bangabanga budimi ebu buvua buebe. Wewe mumane kubupana, lupetu luabu luvua amu luebe. Kadi udi mushindike bua kuenza bualu ebu bubi bua tshinyi? Kuena mudinge bantu to, udi mudinge Mvidi Mukulu.

⁵ Ananiyase umvua miaku eyi, kuponaye panshi, kufila. Bowa kukuata bantu bonsu bavua bumvua bualu ebu.

⁶ Bansongalume kufika, kujingila tshitalu bilamba, kuya kutshijika.

⁷ Kunyima kua meba bu asatu, mukaji wa Ananiyase kufika, kubuela mu nzubu, kayi mumanye bivua bienzeke.

⁸ Ke Petro kumuebeja ne: — Safira, ngambila tumone, mushinga ewu ke unuvua bapane budimi buenu anyi? Ke Safira ne: — Eyowa, ke mushinga wonsu awu!

⁹ Nanku Petro kumukonka ne: — Nudi bumvuangane bua kuteta Mueyelu wa Mfumu bua tshinyi? Ee, umvua, bantu bavua baye kujika bayebe bakadi bapingana. Badi ku tshiibi. Nebaye kukujika ne wewe kabidi.

¹⁰ Safira kudishinda diakamue ku makasa a Petro, kukula muoyi. Bansongalume kubuela, kumusangana mufue. Kumuambulabu, kuya kumujika pabuipi ne bayende.

¹¹ Bowa bunene kukuata Tshisumbu tshijima tshia bena ditaba, kabidi ne bonsu bavua bumvua malu aa.

Bapostolu badi benza bishima bia bungi

¹² Bapostolu bavua benza bishima bia bungi ne malu a dikema munkatshi mua bantu. Bena ditaba bavua basangile pamue mu lutanda lua Shelomu.

¹³ Bantu bavua kabayi mu tshisumbu tshiabu, kabavua bafika pavuabu. Kadi bavua amu banyisha bena ditaba.

¹⁴ Bungi bua bantu balume ne bakaji bavua bitabe Mvidi Mukulu, babuele mu tshisumbu, buvua buenda buvula.

¹⁵ Bavua bafika ne babeedi mu misesu, babaladika pa malalu ne pa biata, bua nansha Petro upita, mundidimbi wende ubuikile bamue ba kudibu.

¹⁶ Bantu ba bungi ba mu misoku ya pabuipi ne Yerushalayime, bavua bafika ne babeedi, kabidi ne bantu bavua mikishi mibi mikuate. Bonsu bavua amu bapanda.

Badi bakengesha bapostolu

¹⁷ Diba adi mutuangaji munene ne bantu bonsu bavuaye nabu, ke bena tshisumbu tshia Basaduke, kufikila bapostolu munda. Kushindikabu mua kuenza bualu.

¹⁸ Ke kukuatabu bapostolu, kubela mu nzubu wa lukanu.

¹⁹ Kadi butuku, mutumibue wa Mfumu kunzulula biibi bia nzubu, kupatula bapostolu, ubambila ne:

²⁰ — Nuye mu nzubu wa Mvidi Mukulu. Numanyishemu bantu malu onsu adi atangila muoyi mupiamupia udi Yezu mubatuadile.

²¹ Bapostolu kuitaba. Dinda dionsu kubuelabu mu nzubu wa Mvidi Mukulu, kutuadija kulongesha bantu. Pinapu mutuangaji munene ne bavuaye nabu, kusangishabu bakulu ba bena Yuda bonsu mu Tshipangu tshikulu. Pashishe kutumabu bantu bua baye kuangata bapostolu mu nzubu wa lukanu.

²² Kadi bantu aba bafika ku nzubu, ki mbasangane bapostolu to. Kupinganabu kuvua bena Tshipangu, babamanyisha ne:

²³ — Tudi basangane nzubu wa lukanu mukanga bimpe, basolayi pa miaba yabu ku biibi. Kadi tukangula nzubu, katuena basanganemu muntu nansha umue to.

²⁴ Mulombodi wa balami ba nzubu wa Mvidi Mukulu, ne bamfumu ba batuangaji bumvua nanku, kulubakanabu, kabayi mua kumvua muvua bapostolu bajimine.

²⁵ Ke muntu mukuabu kufika, ubambila ne: — Bakalenga, bantu banutua bele mu lukanu abu, badi mu nzubu wa Mvidi Mukulu, balongesha bantu.

²⁶ Mulombodi wa balami ba nzubu wa Mvidi Mukulu kuya ne bantu bende bua kukuata bapostolu. Kadi kabavua babakengesha to, bualu bavua batshina ne: bantu badi mua kutuasa mabue.

²⁷ Bafika nabu, kubimanyikabu kumpala kua bena Tshipangu. Ke mutuangaji munene kutuadija kubalumbuluisha,

²⁸ wamba ne: — Tuvua banukandike bikole, bua kanulongeshi bantu mu dina dia muntu awu. Kadi tshinudi benze mpindiewu ntshinyi? Nukadi batampakaje dilongesha diende mu Yerushalayime mujima. Nenku nudi basue kumbueja mu tshilumbu tshia lufu lua muntu ewu!

²⁹ Petro ne bapostolu kuandamuna ne: — Tudi ne bua kutumikila Mvidi Mukulu kumpala, kadi ki mbantu to!

³⁰ Mvidi Mukulu wa bankambua betu mmubishe Yezu, unuvua nuenu bashipeshe, bapopele pa mutshi mutshiamakane.

³¹ Mvidi Mukulu mmumuzanjike ku dia bukole diende; mmumuteke Mfumu ne Mupandishi, bua bena Izrayele badilengeje. Nanku Mvidi Mukulu neabajimijile mibi yabu.

³² Tuetu ne Mueyelu wa Tshijila, udi Mvidi Mukulu mupe badi bamuitaba, tudi bajadiki ba malu aa.

³³ Tshiji tshikole kukuata bena Tshipangu, patuabu bumvue miaku ayi. Bavua bakeba kushipesha bapostolu.

³⁴ Kadi mu Tshipangu muvua Muparushe mukuabu, dina diende Ngamaliyele, mulongeshi wa mikenji, uvua bantu bonsu banemeka. Kujukaye munkatshi mua bena Tshipangu, kulomba bua banji kupatula bapostolu katupa pambelu.

³⁵ Ke kuambilaye bena Tshipangu ne: — Nuenu bena Izrayele, nuamanya tshinudi nukeba kuenzela bantu aba.

³⁶ Matuku makese aa, Teyudase kupatuka, udiamba mudiye muambi wa Mvidi Mukulu. Bantu bu nkama inayi kumuitaba. Kadi kumushipabu. Bonsu bavua bamuitaba, kutangalaka. Lumu lua tshisumbu tshiende kujika.

³⁷ Munyima muende, pa tshikondu tshivuabu babadika bantu, Yudase, muena Ngalileya, kupatuka, kukoka bantu ba bungi mu tshisumbu tshiende. Kadi kumushipabu kabidi. Bonsu bavua bamuitaba, kutangalaka ndung!

³⁸ Nanku ndi nnuambila ne: kanubuelakanyi mu bilumbu bia bantu aba to. Balekelayi, baye! Bualu pikala mudimu wabu ne tshisumbu tshiabu bifuma kudi bantu, nebijike nkayabi!

³⁹ Kadi pikalabi bifuma bulelela kudi Mvidi Mukulu, kanuakubibutula nansha. Dimukayi: pamue apa nudi nuluisha Mvidi Mukulu! Bena Tshipangu bonsu kuanyisha lungenyi lua Ngamaliyele alu.

⁴⁰ Ke kubikilabu bapostolu, kubatuutshishabu nkodi, kubakandika bua kabatedi kabidi dina dia Yezu. Nanku kubalekelabu.

⁴¹ Bapostolu kumuka mu Tshipangu, benda basanka, bualu Mvidi Mukulu uvua mubamone ne: mbakane kumvua bipendu bua dina dia Yezu.

⁴² Ku dituku ku dituku, bavua amu balongesha, bamanyisha bantu Lumu lua Disanka lua Yezu Kristu, mu nzubu wa Mvidi Mukulu ne ku nzubu ya bantu.