Bienzedi 4 - MUKANDA WA MYIDI MUKULU

Badi babikila Petro ne Yowanane mu Tshipangu tshikulu

¹ Patshivua Petro ne Yowanane balongesha bantu, ke batuangaji, balombodi ba balami ba nzubu wa Mvidi Mukulu, ne Basaduke, kufika.

² Bavua bafike munda bikole, bualu bapostolu babidi aba bavua balongesha bantu, babamanyisha ne: bantu badi mua kubiika ku lufu, bualu bavua babajadikile ne: Yezu mmubiike ku bafue.

³ Kukuatabu Petro ne Yowanane, kubela mu nzubu wa lukanu, bualu butuku bukavua buila. Kubalamamu too ne ku dinda.

⁴ Kadi bantu ba bungi bavua bumvue dilongesha edi, kuitababu. Bena ditaba bakavua bu binunu bitanu.

⁵ Butuku bumane kutshia, bamfumu ba bena Yuda, bakulu, ne balongeshi ba mikenji, kusangila mu Yerushalayime.

⁶ Ku bobu abu kuvua Amase, mutuangaji munene, Kayifa, Yowanane, Aleksandre, ne bena diku dia mutuangaji munene bonsu.

⁷ Kubikilabu Petro ne Yowanane. Kubimanyikabu munkatshi muabu, babakonka ne: — Nuvua benze bualu ebu ku bukenji kaayi? Nuvua bajikije disama dia muntu ewu mu dina dia nganyi?

⁸ Ke Petro, muwule ne Mueyelu wa Tshijila, kubambila ne: — Nuenu bamfumu ba ditunga ne bakulu,

⁹ nudi nutulumbuluisha lelu, bua bilenga bitudi benzele mulema, nutukonka mushindu udiye mupanda.

¹⁰ Nanku nuenu bonsu badi apa, kabidi ne bena Izrayele bakuabu bonsu, numanye ne: muntu, unudi numona ewu, udi wenda bimpe amu ku bukole bua dina dia Yezu Kristu wa mu Nazarete, unuvua bapopele ku mutshi mutshiamakane. Kadi Mvidi Mukulu mmumubishe ku bafue.

¹¹ Bu mudi Mikanda ya tshijila yamba, Yezu ke: “Dibue dinuvua nuenu bibaki balekele, kadi didi dienza dibue dia mu ditumba, dishindika nzubu.”

¹² Kakuena lupandu kudi munga muntu to. Bualu panu ponsu Mvidi Mukulu kena mupe bantu dina dikuabu didi mua kutusungila.

¹³ Bena Tshipangu tshikulu bavua bakema bikole, pavuabu bumvua Petro ne Yowanane badilumbuluila bimpe, bashindika bivuabu bamba. Bualu bavua bamanye ne: bantu aba mbantu bashadile, kabayi balonge mikanda. Bavua bajadike kabidi ne: ke bantu bavua bendakana ne Yezu.

¹⁴ Bu muvua bena Tshipangu bamona kabidi muntu uvua tshibombu, muimane pavuabu, wenda biakane, kupangabu tshia kuamba.

¹⁵ Kupatulabu Petro ne Yowanane mu Tshipangu, bua bamone mua kuela tshifulu nkayabu.

¹⁶ Bavua bakonkangana ne: — Bantu aba neabenzele tshinyi? Bualu tshishima tshinene tshidibu benze, bena mu Yerushalayime bonsu mbatshimanye. Nanku katuena mua kutshivila to.

¹⁷ Kadi bua lumu luatshi kalupitshi kutampakana mu bantu, tu-bakanyine bikole, bua kabalongeshi kabidi muntu nansha umue mu dina dia Yezu.

¹⁸ Nanku kubabikilabu, kubakanyinabu bikole, bua kabalongeshi, kabatedi nansha dina dia Yezu.

¹⁹ Ke Petro ne Yowanane kubandamuna ne: — Tshidi tshimpe ku mesu a Mvidi Mukulu ntshinyi? nKunuitaba nuenu anyi, nkumuitaba Yeye? Nudiambile nuenu nkayenu!

²⁰ Kadi tuetu katuena mua kubenga kuamba, tshitudi bamone, kabidi bumvue to.

²¹ Bena Tshipangu kubakanyina tshiakabidi, pashishe kubalekelabu. Kabavua ne mushindu wa kubanyoka, bualu bantu bonsu bavua batumbisha Mvidi Mukulu bua bivua bienzeke.

²² Muntu mene uvuabu bajikije disama ku tshishima awu, ukavua ne bidimu bipite pa makumi anayi!

Bena ditaba badi batendelela

²³ Bamane kubalekela, Petro ne Yowanane kuya kuvua bena ditaba nabu. Kubalondelabu bionsu bivua bamfumu ba batuangaji, ne bakulu ba bena Yuda, bambe.

²⁴ Bena ditaba bumvua nanku, kutendelelabu Mvidi Mukulu ne muoyi umue, bamba ne: — Mukalenga, wewe ke udi mufuke diulu, buloba, mayi manene, ne bionsu bidimu.

²⁵ Wewe ke uvua muambe ku bukole bua Mueyelu wa Tshijila, kabidi mukana mua nkambua wetu Davide muntu webe, ne: “Bisamba bidi biditambisha, bitomboka bua tshinyi? Bena matunga badi bela bifufu bia tshianana bualu kaayi?

²⁶ Bakalenga ba matunga mbele mualu wa mvita, bamfumu mbapunge diyi dimpe, bumvuangane bua kubenga Maweja-Nangila ne Musungula wende.

²⁷ Bushuwa, mu tshimenga emu, Erode ne Ponsiyo Pilate, bantu benyi ne bena Izrayele, mbumvuangane bua kubenga muntu webe wa tshijila Yezu uudi musungule.

²⁸ Nenku mbakumbaje bionsu biuvua mudianze kujadika ku bukole buebe ne ku meji ebe ne: nebienzeke.

²⁹ Kadi mpindiewu, Mfumu, umvua mudibu batukanyina. Ambuluisha bantu bebe, bua bamanyishe muaku webe ne dikima dionsu.

³⁰ Olola tshianza tshiebe, jikija masama a babeedi, enza bishima ne malu a dikema, mu dina dia muntu webe wa tshijila Yezu.

³¹ Bamane kutendelela nanku, muaba uvuabu basangile kuzakala bikole. Bonsu kuwula ne Mueyelu wa Tshijila, kumanyisha muaku wa Mvidi Mukulu ne dikima dionsu.

Bena ditaba badi babanyangana bintu biabu

³² Bena ditaba bonsu bavua ne muoyi umue, kabidi ne lungenyi lumue. Muntu nansha umue kavua wamba ne: bintu ebi mbianyi meme. Kadi bonsu bavua basangisha bionsu kaba kamue.

³³ Bapostolu bavua bajadika dibika dia Mfumu Yezu ne bukole bua bungi. Mvidi Mukulu uvua ubambuluisha bonsu bikole, ubela lupemba.

³⁴ Kamuvua muena dikenga nansha umue munkatshi muabu. Bonsu bavua ne madimi nansha nzubu, bavua babipana, bangata mushinga wabi,

³⁵ baufila kudi bapostolu. Pashishe bavua babanyangana lupetu luonsu, bilondeshile dikenga divua muntu yonsu nadi.

³⁶ Ke muvua muena Levi mukuabu, mulelela mu tshidila tshia Shipre, dina diende Yozefe, uvua bapostolu binyike ne: Bamabase (mmomumue ne: musambianganyi),

³⁷ mupane budimi buende, muangate mushinga wabu, muufile kudi bapostolu.