Bienzedi 28 - MUKANDA WA MYIDI MUKULU

Polu mu Malta

¹ Tuetu bamane kupanduka, tuakumvua bantu binyika tshidila etshi ne: “Malta.”

² Bena tshidila kubakidila bimpe bitambe. Muvua mashika makole, bualu mvula uvua uloka wa bungi. Nanku kutemeshabu kapia, tuetu kusemena bonsu bua kuota.

³ Polu kuangula nkunyi bua kuela mu kapia. Nyoka kupatukamu, unyema luya, kumusuma ku tshianza.

⁴ Pavua bena ditunga bamona nyoka mulembelela ku tshianza tshia Polu, kuambilanganabu ne: — Bushuwa, ewu mmushipianganyi. Nansha yeye mupanduke ku mayi, Mvidi Mukulu udi amu umunyoka!

⁵ Kadi Polu kunyukula tshianza, nyoka kumata mu kapia. Kabivua bimusama nansha.

⁶ Bakuabu bavua bela meji ne: Polu neuwule mubidi, nansha neadishinde panshi, afile. Kuindilabu tshitupa tshile, nansha kumona bualu. Ke kuelabu meji makuabu, bamba ne: muntu ewu mmvidie.

⁷ Pabuipi ne muaba awu pavua lupangu lua Publiyuse, mfumu wa tshidila. Muntu ewu kutuakidila bimpe. Tuetu kulala kuende matuku asatu.

⁸ Tatuende wa Publiyuse uvua mu bulalu, usama mubidi luya, ne munda mua mukungulu. Polu kuya kumumona, kutendelela Mvidi Mukulu. Kutentekaye muntu awu bianza, yeye kumvua bimpe.

⁹ Ke babeedi bakuabu ba mu tshidila kufika. Masama abu kujika.

¹⁰ Bena mu tshidila kudisankisha ne bintu bishilangane. Diba dia kulayangana nabu, kutupabu bionsu bituvua tukengela bua luendu.

Polu udi ufika ku Rome

¹¹ Kunyima kua ngondu isatu, tuetu kubuela mu majuwa a ku Aleksandriya, avua dina ne: “Mvidie ya Mapasa.” Avua mashale mu tshidila ngondu yonsu ya muvu wa mashika.

¹² Nanku tuetu kufika nawu mu tshimenga tshia Sirakuse, kushalamu matuku asatu.

¹³ Tumukamu, tuetu kulonda muelelu wa mayi, kufika ku Rejiyo. Butshia lupepele kujuka luseke lua kuinshi kua ditunga. Tuetu kuenda amu matuku abidi tshianana, kufika mu Putiyoli.

¹⁴ Mu tshimenga etshi tuetu kusangana bena tshisumbu tshietu. Bavua balomba bua tushale nabu lumingu lujima. Ke mutuakafika ku Rome nanku.

¹⁵ Bena ditaba ba mu Rome bavua bamane kumvua lumu lua difika dietu. Kuvuabu too ne ku Tshisalu tshia Apiyuse, ne ku Nzubu isatu ya Tshiala benyi, bua kutuakidila. Amu Polu ubamona, kukolaye muoyi, wela Mvidi Mukulu tuasakidila.

¹⁶ Tuetu bamane kufika mu Rome, kuanyishabu bua Polu ashale pa nkayende, bamulama amu kudi musolayi umue.

Polu udi ulongesha mu Rome

¹⁷ Kupita matuku asatu, Polu kubikidisha bakulu ba bena Yuda bavua mu Rome. Bamane kusangila, kubambilaye ne: — Bana betu, tshiyi muenzele tshisamba tshietu bualu bubi, tshiyi munyange bibidilu bia bankambua betu, bavua bankuata mu Yerushalayime. Kumfilabu mu bianza bia bena Rome.

¹⁸ Aba bamane kunkonkoloja, bavua basue kundekela, bualu kabavua bansangana ne tshilumbu tshia mua kumfundila lufu.

¹⁹ Kadi bena Yuda kubenga ne: “Ka-numulekedi!” Ke meme kulomba ne: nutume tshilumbu tshianyi kua Kezare. Kadi tshiena ne muoyi wa kufunda tshisamba tshietu, bua kulumbulula natshi.

²⁰ Ke pandi mulombe bua kumonangana nenu apa. mBansuike lukanu elu, bualu bua muntu ewu udi bena Izrayele bonsu batekemena.

²¹ Kumuandamunabu ne: — Bena Yuda ki mbatutumine mukanda nansha umue udi utangila bualu buebe. Muanetu nansha umue ki mmufume kuntu aku, bua kutuambila bualu bubi buudi muenze, nansha kutujadikila malu ebe.

²² Nanku tudi basue kudiumvuila meji audi wela. Bualu tudi bamanye ne: tshisumbu tshiudi mubuele atshi, miaba yonsu bantu badi batshibenga.

²³ Dituku divuabu bumvuangana ne Polu, bantu bapite bungi kufika muaba uvuaye ulala. Polu kubalongesha ku dinda too ne ku dilolu, kubumvuija bimpe malu a Bukalenga bua Mvidi Mukulu. Uvua utela miaku ya mu Mikenji ya Moshe, ne ya mu mikanda ya Bambi, ukeba amu bua bitabe Yezu.

²⁴ Bamue bavua bitaba, bakuabu babenga.

²⁵ Bu muvuabu kabayi basue kumyuangana, bakavua bakeba kutangalaka. Ke Polu kubambila amu ne: — Miaku ivua Mueyelu wa Tshijila muambile bankambua benu mukana mua muambi Yeshaya, ivua pa bualu!

²⁶ Uvua muambe ne: “Uye, wambile bena tshisamba etshi ne: Nenuteleje, kanuyi nujingulula; nenutangile, kanuyi numona tshintu.

²⁷ Bualu nuenu bena tshisamba etshi, nudi bapapishe muoyi wenu, nudi bajibike matshi, babuite ku mesu. Nudi nubenga kumona, nubenga kumvua, nubenga kujingulula malu, nubenga kupingana kundi, bua meme kunupandisha.”

²⁸ Ndi nnuambila ne: Mvidi Mukulu mmutumine bantu ba bisamba bikuabu mukenji wa lupandu, bualu bobu nebauteleje! [

²⁹ Polu wamba nanku, bena Yuda kutangalakangana, benda belangana mpata mikole.]

³⁰ Polu kushala bidimu bibidi bijima mu nzubu uvuaye ufutshila. Uvua uyukila ne bonsu bavua baya kumonangana nende.

³¹ Uvua umanyisha malu a Bukalenga bua Mvidi Mukulu, ulongesha ne muoyi mukole, bidi bitangila Mfumu Yezu Kristu, kabayi bamukandika.