Bienzedi 27 - MUKANDA WA MYIDI MUKULU

Badi batuma Polu ku Rome

¹ Dituku dituvua ne bua kubuela mu majuwa bua kuya ku Italiya, kufilabu Polu, ne bamue bena lukanu bakuabu, kudi Yuliyuse, mulombodi wa tshisumbu tshia basolayi ba bena Rome, tshiyuabu binyika ne: “Ntshia Kezare,” bua tshibalame bimpe mu njila.

² Nanku tuetu kubuela mu majuwa a ku Adramite. Majuwa aa avua aya ku bisabu bia mu buloba bua Aziya. Tuvua ne Aristarke, muena Masedoniya, wa mu tshimenga tshia Tesalonike.

³ Butshia, tuetu kufika mu Sidone. Yuliyuse uvua unemeka Polu, wanyisha kabidi bua aye kumonangana ne balunda bende, bua bamupeshe bivuaye ukengela.

⁴ Bamane kumuka, tuetu kulonda mielelu ya tshidila tshia Shipre, bualu lupepele lukole luvua lufuma kutuvua tuya.

⁵ Tuetu kusabuka mayi manene pabuipi ne Silisiya ne Pamfiliya, kufika mu Mira mu buloba bua Lisiya.

⁶ Momu amu mulombodi wa basolayi kupeta majuwa a ku Aleksandriya, avua aya ku Italiya. Ke kutubuejayemu.

⁷ Matuku mavule majuwa avua enda amu bitekete. Tuvua batate bikole bua kufika pabuipi ne tshimenga tshia Knidose. Bu muvua lupepele lutupumbisha mua tuetu kutungunuka luseke alu, tuetu kubenda, batangile ku tshidila tshia Kreta, kupitshila ku lusongu lua buloba bua Salmona.

⁸ Tuetu kuyila ku mielelu ya tshidila ne lutatu lua bungi, kufika pabuipi ne tshimenga tshia Laseya, muaba uvuabu binyika ne: “Tshisabu Tshilenga”.

⁹ Bu mutuvua bajimije matuku a bungi mu njila, mukavua njiwu bua kutungunuka ne luendu lua majuwa, bualu matuku a tshijila a mu ntuadijilu wa muvu wa mashika akavua mamane kupita. Ke Polu kuambila bavua mu majuwa ne:

¹⁰ — Bana betu, ndi mumone ne: luendu elu nebikale ne njiwu. Majuwa ne bintu bidi mua kunyanguka. Tuetu mene tudi mua kufuilamu.

¹¹ Kadi mulombodi wa basolayi kavua bualu ne miaku ya Polu. Uvua muitabe amu bivua muendeshi wa majuwa, ne muenawu, bamuambile.

¹² Luseke lukuabu katuvua ne mushindu wa kupitshisha bimpe tshikondu tshia mashika mu tshisabu atshi to. Ke pavua bantu ba bungi bavua mu majuwa bajinga kumuka, bua kufika mu tshisabu tshia Fenikse, bu biobi mua kuenzeka. Tshisabu atshi tshivua mu tshidila tshia Kreta, luseke ludi diba dibuelela luatshi. Tshivua muaba muimpe wa tuetu kupitshisha muvu wa mashika.

Tshipepele pa mayi manene

¹³ Kapepe kavua kafuma kuinshi kua ditunga. Bantu kuela meji ne: tudi mua kukumbaja mutudi tujinga. Nanku kupatulabu longu mu mayi. Bavua bendesha majuwa, balamata menemene ku muelelu wa tshidila tshia Kreta.

¹⁴ Kadi bu mpindiewu tshipepele tshikole kufuma ku mikuna ya tshidila, luseke lua ku mutu luatshi.

¹⁵ Kukokatshi majuwa, kaayi mua kukandamana. Tuetu kupueka,

¹⁶ kupitshila kuinshi kua tshidila tshikese tshia Kawuda, muaba uvua tshipepele tshituya kakese. Ke tuetu kuenza muetu muonsu bua kujula buatu bukese buvua mu mayi.

¹⁷ Bendeshi kububandisha mu majuwa. Pashishe kujingilabu majuwa majima nshinga, bua kaatayiki. Bu muvuabu batshina ne: tudi mua kujama ku nsenga idi ku muelelu wa ditunga dia Libiya, kusululabu longu lukuabu luvua lulelema pa mayi. Ke majuwa kudipuekela ne lupepele.

¹⁸ Bu muvua tshipepele tshitubukula amu bikole, butshia kutuadijabu kuela bintu bikuabu bia bujitu mu mayi.

¹⁹ Dituku divua dilonda, bendeshi kudielela ne biamu mene bia majuwa mu mayi.

²⁰ Matuku a bungi, katuvua tumona diba, nansha mitotu. Tshipepele tshivua amu tshikole. Katuvua kabidi batekemene ne: netupande to.

²¹ Bantu bavua mu majuwa, matuku mavule kabavua nansha badia. Nanku Polu kuimana kulu kumpala kuabu, ubambila ne: — Bana betu, nuvua mua kunteleja, tuetu kushala mu Kreta. Nanku bintu bietu kabivua mua kunyanguka, nansha kujimina to.

²² Kadi mpindiewu ndi nnulomba ne: kolayi muoyi. Wa kunudi nansha umue kakufua to. Anu majuwa nkayawu neajimine mu mayi.

²³ Butuku ebu, mutumibue wa Mvidi Mukulu undi ngitaba, nkuatshila mudimu, mmummuenekele.

²⁴ Kungambilaye ne: “Polu, kutshinyi to. Neumonangane ne Kezare. Bu mudi Mvidi Mukulu mukunange, neakupandishe ne bonsu baudi nabu mu majuwa emu.”

²⁵ Nanku, bana betu, koleshayi muoyi. Ndi mutekemene Mvidi Mukulu: neakumbaje bionsu bidiye mungambile.

²⁶ Kadi tshipepele netshituele ku muelelu wa tshidila kampanda.

²⁷ Tshipepele tshikavua tshitusaka matuku dikumi ne anayi mu Mayi manene a pankatshi pa matunga. Kadi mundankulu bendeshi ba majuwa kumvua ne: tukadi basemena ku mukuna.

²⁸ Kuelabu nshinga musuika tshintu tshia bujitu mu mayi, bua kuteta bondoke buawu. Kusanganabu bondoke bua metre makumi asatu ne muanda mutekete. Basemena katupa kumpala, kuelabu tshiakabidi nshinga. Kusanganabu bondoke bua metre makumi abidi ne muanda mukulu.

²⁹ Bavua batshina bua majuwa kaayi kudituuta ku mabue. Ke kuelabu ndongu inayi kunyima kua majuwa, bindila ne mioyi kulukulu ne butuku butshie.

³⁰ Bendeshi bavua bakeba kunyema mu majuwa. Kutululabu buatu bukese mu mayi, badinga bantu ne: tudi tuya kuela ndongu kumpala kua majuwa.

³¹ Ke Polu kuambila mulombodi ne basolayi ne: — Pikala bantu aba kabayi bashala mu majuwa, kanuena nupanda to.

³² Ke basolayi kukosa nshinga ya buatu bukese, bua bupueke ne mayi.

³³ Butuku kabuyi buanji kutshia, Polu kulomba bantu bonsu bua badie. Uvua wamba ne: — Kukadi matuku dikumi ne anayi mpindiewu anudi bashale kanuyi badie.

³⁴ Nenku ndi nnulomba bua nudie. Amu nuenu badie, ke kushisha kushala ne muoyi. Muntu nansha umue wa kunudi kakujimija lusuki lua ku mutu wende to.

³⁵ Polu mumane kuamba nanku, kuangataye diampa, kuela Mvidi Mukulu tuasakidila, bonsu bateleja. Pashishe kudikosaye, kudia.

³⁶ Bonsu kukolesha muoyi, kudia.

³⁷ Mu majuwa bonsu basanga tuvua bantu nkama ibidi makumi muanda mutekete ne basambombu.

³⁸ Bantu bamane kudia kuukuta, kuimanshabu ntete mikuabu mu mayi, bua majuwa apepele.

Majuwa adi anyanguka

³⁹ Butshia, bendeshi ba majuwa kabavua bamanye muaba utuvua. Kadi bavua bamona amu tshibungubungu ne lusenga. Kuambabu ne: tuidikije mua kufikaku ne majuwa.

⁴⁰ Kukosabu ndongu, kuyilekela mu mayi. Kusululabu kabidi ne mionji ya biamu bia kuludika nabi majuwa. Pashishe kubandishabu tshilamba tshia ku mutshi uvua kumpala mu majuwa, bua lupepele lusemeje majuwa, aye mu lusenga.

⁴¹ Kadi kufikabu pa muaba wa lusenga pankatshi pa mayi, ku dia bakaji muenji uya luseke elu, ku dia balume muenji uya luseke lukuabu. Majuwa kujaminapu. Mutu wa majuwa kudina mu lusenga, kaayi mua kunyunga. Mavuala makole kutshibula tshiamanda tshiawu.

⁴² Basolayi bavua basue kushipa bena lukanu bonsu, bua muntu nansha umue wa kudibu kanyemi mu mayi.

⁴³ Kadi bu muvua mulombodi wabu musue kupandisha Polu, kuambilaye basolayi bende ne: “Kanuenji nanku to!” Kutumaye kabidi diyi, bua bavua bamanye kuowela, badianjile kudiela mu mayi, baye ku mukuna.

⁴⁴ Bantu bakuabu bavua ne bua kusabukila pa mabaya, nansha pa bitupa bikuabu bia majuwa. Ke muvua bantu bonsu bafike ku mukuna ne muoyi nanku.