Bienzedi 26 - MUKANDA WA MYIDI MUKULU

Polu udi ndilumbuluila kumpala kua Agripa

¹ Agripa kuambila Polu ne: — Ndi nganyisha bua udilumbuluile. Ke Polu kuolola tshianza, wamba ne:

² — Mukalenga Agripa, ndi ne disanka dia kudilumbuluila lelu kumpala kuebe, pa bionsu bidi bena Yuda bansonguela.

³ Bualu wewe udi mumanye bimpe bibidilu bia bena Yuda, ne mpata yabu. Ke pandi nkulomba, bua untelejeku ne lutulu.

⁴ Bena Yuda bonsu mbamanye mumvua mukole mu buana, nsomba amu munkatshi mua bana betu, ne mu Yerushalayime.

⁵ Nanku badi bammanye kale. Bu bobu basue, badi mua kujadika ne: ndi Muparushe, muena tshisumbu tshia bantu badi bakumbaja bimpe bitambe malu a ditaba dietu.

⁶ Mpindiewu mbangase tshilumbu, bualu ndi ntekemena ne: Mvidi Mukulu neakumbaje bivuaye mulaye bankambua betu.

⁷ Bisamba bietu dikumi ne bibidi bidi bitendelela Mvidi Mukulu butuku ne munya, bitekemena amu: bidi Mvidi Mukulu mulaye, nebikumbane. Mukalenga Agripa, bena Yuda mbamfunde amu bua ditekemena adi.

⁸ Munyi munudi nuenu bena Yuda kanuyi mua kuitaba ne: Mvidi Mukulu udi mua kubisha bafue!

⁹ Meme kabidi mvua muele meji ne: ndi ne bua kuenza muanyi muonsu bua kuluisha Yezu wa mu Nazarete.

¹⁰ Ke bimvua muenze mu Yerushalayime. Mvua mupete dianyisha dia pa buadi kudi batuangaji banene. Ke pamvua muele bena ditaba bavule mu lukanu. Pavuabu babafundile lufu, mvua muanyishe.

¹¹ Misangu mivule mu nzubu ya kutendelela, mvua mbakumisha, mbakolela bua bayile ditaba diabu. Bu mumvua ne lonji lupite, meme kuya too ne ku bimenga bia mu matunga makuabu bua kubakengesha.

Dikudimuka dia Polu

¹² — Ke mumvua muye mu Damase, ne bukenji buvuabu bampeshe kudi bamfumu ba batuangaji, bua kukumbaja mudimu uvuabu bamfundile.

¹³ Mukalenga Agripa, mu njila munda munya, meme kumona butoke bufume mu diulu, bukenke buabu bupite bua diba. Kadi buvua buntokesha amu meme ne batuvua nabu.

¹⁴ Tuetu bonsu kudishinda panshi. Meme kumvua diyi dingamba mu buena ebrewu ne: “Shawule, Shawule, udi unkengesha bua tshinyi? Bu mudi nyama kayi mua kukandamana padibu bamutuuta, bamuludika kudi mfumu wende ne dikombu, ke muudi kuyi mua kuntuila nkanana.”

¹⁵ Ke meme kuebeja ne: “Kadi, mukalenga, wewe udi nganyi?” Kungandamunaye ne: “Ndi Yezu, uudi ukengesha!

¹⁶ Kadi juka, imana kulu. Ndi mukumuenekele, bualu ndi mukusungule bua wikale muena mudimu wanyi. Neujadikile bantu bakuabu muudi mummone lelu. Neubamanyishe kabidi bimbakuleja pashishe.

¹⁷ Nenkulame, bua bena Yuda ne bantu ba bisamba bikuabu kabakuenzedi bibi. Ndi nkutuma kudibu,

¹⁸ bua ubatabaje; ubumushe mu miidima, babuele mu butoke; ubapatule ku bumfumu bua diabolu, babuele mu bumfumu bua Mvidi Mukulu. Nanku bobu bangitabe, nebabajimijile mibi yabu. Nebabuele mu tshisumbu tshia bantu ba Mvidi Mukulu.”

Mudimu wa Polu

¹⁹ — Nanku, mukalenga Agripa, tshivua mubenge bivua Mvidi Mukulu mundeje to.

²⁰ Bangabanga meme kulongesha mu Damase ne mu Yerushalayime, pashishe mu ditunga dijima dia Yudeya, ne mu matunga a bantu ba bisamba bikuabu. Mvua mulombe bantu bonsu, bua bandamune ngenzelu yabu, bapingane kudi Mvidi Mukulu, baleje ku malu mimpe adibu benza, mudibu badilengeja.

²¹ Ke buvua bena Yuda bankuatshile mu nzubu wa Mvidi Mukulu, bakeba kunshipa.

²² Kadi Mvidi Mukulu uvua mundame too ne ku lelu. Ke muntshidi mua kujadikila bantu bonsu, bana ne bakulumpe, malu a Mvidi Mukulu. Ndi ndongesha amu bivua bambi ne Moshe bamanyishe bantu ne:

²³ Kristu neakenge, neafue, neikale wa kumpala wa kubiika ku bafue. Neamanyishe bena tshisamba tshietu, ne bantu ba bisamba bikuabu, butoke budi mua kubasungidila.

Polu udi usaka Agripa ku ditaba

²⁴ Patshivua Polu ndilumbuluila nanku, Festuse kumuela diyi dikole ne: — Polu, udi mupale anyi? Malu mapite bungi audi mulonge mmanyange lungenyi luebe!

²⁵ Polu kumuandamuna ne: — Wakunemekibua Festuse, tshiena mupale to. Bindi ngamba bidi bia meji, kabidi mbilelela.

²⁶ Mukalenga Agripa mmumanye bindi ngamba. Bualu ndi mua kumulongesha bionsu patoke. Tshiena ngamba bualu bupiabupia, budiye kayi mumanye. Bionsu ebi ki mbienzeke mu musokoku ku mpenga nansha.

²⁷ Mukalenga Agripa, udi witaba bambi anyi? Ndi mumanye ne: udi ubitaba!

²⁸ Ke Agripa kuebeja Polu ne: — Udi wela meji ne: amu katupa katudi nebe aka, ukadi mungenze muena Kristu anyi?

²⁹ Polu kuandamuna ne: — Nansha tuetu bashale nebe katupa kipi, nansha tshitupa tshile, kadi ndi nsengelela Mvidi Mukulu ne: ne wewe, ne nuenu bonsu badi banteleja lelu, numfuane meme. Kadi kanumfuanyi ku nkanu eyi to!

³⁰ Ke mukalenga Agripa, mulombodi wa ditunga, Berenike, ne bantu bakuabu bonsu, kujuka.

³¹ Kumukabu, bambilangana ne: — Muntu ewu ki mmuenze bualu bubi bua mua kumushipesha, nansha kumuelesha mu lukanu.

³² Ke mukalenga Agripa kuambila Festuse ne: — Bavua mua kumulekela, yeye kayi mulombe bua kuya kua Kezare.