Bienzedi 24 - MUKANDA WA MYIDI MUKULU

Tshilumbu tshidi bena Yuda bafundila Polu

¹ Kupita matuku atanu, mutuangaji munene Ananiyase, bamue bakulu, ne mulumbuluidi Tertuluse, kufika mu Kezareya. Kumonanganabu ne mulombodi wa ditunga Felikse, bua kumumanyisha tshidibu bafundila Polu.

² Ke Felikse kubikidisha Polu. Tertuluse kulonda tshilumbu, wamba ne: — Wakunemekibua, mu ditunga emu, tudi tusomba talalaa, amu bualu buebe wewe. Udi mulongolole malu a bungi bimpe bitambe muetu munemu, bua diakalenga dietu.

³ Bua bionsu bitudi tupeta diba dionsu, ne miaba yonsu, tudi tukuanyisha bikole.

⁴ Kadi tshiena musue kukupitshishila diba. Ke pandi nkulomba, bua wanji kututelejaku katupa.

⁵ Tudi bamanye se: muntu ewu ntshipupu. Udi utombueja bena Yuda bonsu pa buloba bujima. Udi mfumu wa tshisumbu tshia bena Nazarete.

⁶ Ukavua ukeba kunyanga nzubu wa Mvidi Mukulu ne mikiya. Ke tuetu kumukuata. [Tuvua basue kumulumbuluisha bilondeshile mikenji yetu.

⁷ Kadi Liziyase mulombodi wa basolayi kufika, kutunyenga Polu ku makanda.

⁸ Kutumaye kabidi diyi bua bavua bamufunda bamonangane nebe.] Wewe mulumbuluishe muntu ewu, neudiumvuile nkayebe, mutudi bamufundile pa bualu.

⁹ Bena Yuda kutua ku tshia Tertuluse, bela mbila ne: muudi muambe amu, mmomu!

Polu udi ndilumbuluila

¹⁰ Ke mulombodi wa ditunga kuanyisha Polu, bua alonde pende bualu. Ke Polu kuamba ne: — Bushuwa, ndi mumanye ne: udi ndumbulula munene mu ditunga edi, kukadi bidimu bivule. Ke pandi ndilumbuluila, ntekemena kuudi.

¹¹ Wewe mene udi mua kujadika bindi ngamba: kakuena kupita matuku dikumi ne abidi, andi mufike mu Yerushalayime, bua kutendelela Mvidi Mukulu.

¹² Kabena bansangana ngelangana mpata mu nzubu wa Mvidi Mukulu ne muntu nansha umue, nansha ntombueja bantu mu nzubu ya kutendelela, nansha miaba mikuabu mu tshimenga.

¹³ Bantu aba kabena mua kukujadikila bidibu bamfunde abi to.

¹⁴ Kadi tshindi nkujadikila tshidi nunku: ndi ngenzela Mvidi Mukulu wa bankambua betu mudimu, ndonda njila mupiamupia, udibu bamba ne: mmubi. Kadi ndi ngitaba bionsu bidibu bafunde mu mikanda ya mikenji, ne ya bambi.

¹⁵ Ndi mutekemene kudi Mvidi Mukulu, amu mudibu bobu mene batekemene ne: bantu bimpe ne babi nebabiike ku bafue.

¹⁶ Ke pandi ngenza muanyi muonsu, bua kondu kanyi ka munda kikale katalale kumpala kua Mvidi Mukulu ne kua bantu.

¹⁷ Ndi mumbuke mu Yerushalayime bidimu bivule. Ndi mupinganemu amu mpindiewu, bua kupesha bena tshisamba tshietu makuta a diambuluisha, kabidi bua meme kulambula Mvidi Mukulu milambu.

¹⁸ Ke tshimvua ngenza mene, diba divuabu basangane mu nzubu wa Mvidi Mukulu, ngambuluisha bantu mu mulambu wa kudikobolola. Tshivua ne bantu ba bungi to. Tshivua mujule mutoyi nansha.

¹⁹ Kadi bena Yuda bakuabu ba mu Aziya bavuapu. Bu bobu ne bualu menemene bua mua kusonguela kuudi, bavua mua kuikala apa.

²⁰ Kadi udi mua kuebeja kabidi bantu badi apa. Babambile tshilema tshivuabu bansangane natshi, pavuabu bandumbuluisha mu Tshipangu tshikulu tshiabu.

²¹ Tshilumbu tshindi mua kuikala natshi, tshidi amu tshia miaku imvua muambe ne diyi dikole ne: “mBamfunde lelu ku tshilumbu kumpala kuenu, bualu ndi ngitaba ne: bafue nebabiike.”

²² Felikse uvua mumanye bimpe malu avua atangila bena Kristu. Kuindijaye bena tshilumbu, wamba ne: — Netukose tshilumbu tshienu, pikala Liziyase, mulombodi wa basolayi, mumane kufika.

²³ Kutuminaye mfumu wa basolayi bavua ne bua kulama Polu diyi ne: “Kanutambi kumufimpakaja. Kanukandiki balunda bende badi basue kumukumbula.”

Felikse ne Drusila badi bamonangana ne Polu

²⁴ Kupita matuku, Felikse ne mukajende Drusila wa bena Yuda kufikabu. Kubikidishabu Polu. Bavua basue kumvua tshi-vuaye ulongesha bua Yezu ne bua ditaba dia bena Kristu.

²⁵ Kadi pakavua Polu ulongesha mudi muntu ne bua kukumbaja bidi Mvidi Mukulu musue, kudikolela, kudilongolola ku dituku diavua Mvidi Mukulu kulumbuluisha bantu, Felikse kukuatshika buowa, kuamba ne: — Abi mbikumbane! Nenkubikidishe kabidi, pangapeta diba.

²⁶ Kadi bu muvua Felikse mutekemene ne: Polu neambuejile makuta, kumubikidishaye misangu mivule, bua kuyukila nende.

²⁷ Kupita bidimu bibidi, Porsiyuse Festuse kupingana Felikse mu bulombodi bua ditunga. Kadi bu muvua Felikse musue kusankisha bena Yuda, ki mmupatule Polu mu lukanu nansha.