Bienzedi 21 - MUKANDA WA MYIDI MUKULU

Polu udi uya ku Yerushalayime

¹ Bamane kulayangana nabu, tuetu kubuela mu majuwa, kuya buludi ku tshidila tshia Kose. Butshia tuetu kufika mu tshidila tshia Rodose. Tumukamu, tuetu kuya mu tshimenga tshia Patara.

² Tuetu kusanganamu majuwa aya ku Fenisiya. Ke tuetu kubuelamu, kuya.

³ Bafika pabuipi ne Shipre, muaba uvua tshidila tshimueneka ku diboku dietu dia bakaji, tuetu kupita kuinshi kuatshi, kuya ku Siriya. Tuetu kutuluka mu majuwa mu Tire, bualu ke muaba uvua majuwa ne bua kushiya bujitu.

⁴ Tuetu kusanganamu bena ditaba, kushala nabu lumingu lujima. Mueyelu wa Tshijila kubasonsola, bua bambile Polu ne: kuyi mu Yerushalayime to.

⁵ Kadi lumingu alu lujika, tuetu kutungunuka ne luendu luetu. Bena ditaba bonsu, bakaji babu ne bana, kuya kutushindikija too ne ku mpenga kua tshimenga. Tuetu kutua binu ku muelelu wa mayi manene, kutendelela Mvidi Mukulu.

⁶ Bamane kulayangana nabu, tuetu kubanda mu majuwa. Bena ditaba kupingana kuabu.

⁷ Tuetu kumuka mu Tire, kuya mu Ptolemayise. Ke mutuvua bajikije luendu luetu lua pa mayi nanku. Mu Ptolemayise tuetu kuya kukumbula bena ditaba, kushala nabu dituku dijima.

⁸ Butshia tuetu kutungunuka ne luendu, kuyila njila wa ku makasa, kufika mu Kezareya. Tuetu kuya kua Filipe, mulongeshi wa Lumu lua Disanka, kulala kuende. Filipe uvua wa ku bantu muanda mutekete, bavuabu basunguile ku Yerushalayime, bua kuambuluisha bapostolu.

⁹ Uvua ne bana bende ba bakaji banayi, kabayi basela. Bavua bambi, bamanyisha bantu bivua Mvidi Mukulu mubambile.

¹⁰ Tuetu bamane kushala muaba awu matuku makese, ke muambi kampanda, diende Agabuse, kufumina ku Yudeya.

¹¹ Kufikaye patuvua, kuangata mukaba wa Polu, kudisuika nawu makasa ne bianza, wamba ne: — Mueyelu wa Tshijila udi wamba ne: Muena mukaba ewu, bena Yuda nebamusuike mushindu ewu mu Yerushalayime, pashishe nebamufile mu bianza bia bantu ba bisamba bikuabu.

¹² Tumvua nanku, tuetu ne bena mu Kezareya kusengelela Polu ne: kuyi ku Yerushalayime to.

¹³ Kadi yeye kutuandamuna ne: — Nudi nudila, nukeba kuntekesha mu maboku bua tshinyi? Meme ndi nganyisha ki amu bua bansuike mionji, apu kabidi ne bua kutuila Mfumu Yezu mu Yerushalayime.

¹⁴ Bu muvua Polu kayi musue kuitaba bituvua bambe, tuetu kulekela kumusengelela, tuamba ne: — Bienzeke mudi Mfumu musue!

¹⁵ Bamane kushala kabidi amue matuku muaba awu, tuetu kulongolola bintu bietu, bua kuya ku Yerushalayime.

¹⁶ Bena ditaba ba mu Kezareya kutushindikija. Kutufdabu kua Mnasone, bua tuetu kulala kuende. Uvua muntu wa mu Shipre, umue wa ku bena ditaba ba kumpala.

Polu udi ufika kua Yakobe

¹⁷ Tufika mu Yerushalayime, bena ditaba kubakidila ne disanka.

¹⁸ Butshia Polu kuya netu kua Yakobe, kuvua bakulu bonsu ba Tshisumbu tshia bena ditaba basangile.

¹⁹ Polu kubela muoyi, kubalondela malu onsu menemene, avua Mvidi Mukulu mukumbaje ku mudimu uvuaye muenze munkatshi mua bantu ba bisamba bikuabu.

²⁰ Bamane kumvua bionsu abi, kutumbishabu Mvidi Mukulu. Pashishe kuambilabu Polu ne: — Muanetu, udi mumone mukadi bena Yuda bitaba Yezu binunu ne binunu. Kadi buonsu buabu batshidi amu bakumbaje bimpe mikenji ya Moshe.

²¹ Kadi bavua babambile ne: Polu udi ulongesha bena Yuda bonsu, badi basomba munkatshi mua bisamba bikuabu, ne: kanulondi mikenji ya Moshe, kanuteki bana benu panshi, nulekele bibidilu bia bena Yuda.

²² Kadi netuenze tshinyi? Bualu bena Yuda ba muetu munu nebamanye ne: udi mumane kufika!

²³ Nenku, enza tshitudi tukuambila etshi: tudi apa ne bantu banayi bavua benze dilaya.

²⁴ Ubangate, uye nabu. Wikaleku, padibu badikobolola. Ubafutshile mushinga, bua babeyishe nsuki. Nanku bantu bonsu mbajadike ne: mbakujane patupu, bualu wewe mene udi amu ukumbaja mikenji ya Moshe.

²⁵ Kadi bantu ba bisamba bikuabu bakadi bitaba Yezu, tukadi babafundile bimvua bajadike ne: kabadi minyinyi ya nyama ivuabu balambule mvidie; kabadi mashi; kabadi minyinyi ya nyama mishipa, kayiyi mipatule mashi; balekele buendenda.

²⁶ Butshia Polu kuya ne bantu banayi abu. Kushalaye nabu, pavuabu badikobolola. Pashishe kubuelaye mu nzubu wa Mvidi Mukulu, bua kumanyisha dituku divuabu ne bua kujikija kudikobolola. Bualu dituku adi bavua ne bua kufila mulambu bua yonsu wa kudibu.

Badi bakuatshila Polu mu nzubu wa Mvidi Mukulu

²⁷ Lumingu lua kudikobolola lukavua pa kujika. Ke bena Yuda ba mu Aziya kumona Polu mu nzubu wa Mvidi Mukulu. Kusonsolabu bantu bonsu, kukuatabu Polu,

²⁸ bela mbila ne: — Bena Izrayele, tuambuluishayi! Monayi muntu udi ulongesha bantu bonsu miaba yonsu, bua bapepeje tshisamba tshia Izrayele, mikenji ya Moshe, ne nzubu wa Mvidi Mukulu ewu. Lelu mmubueje bantu ba bisamba bikuabu mu nzubu ewu! mMupishe muaba ewu wa tshijila mukiya!

²⁹ (Bavua bamba nanku, bualu bavua bamona Polu ne Trofime wa mu tshimenga tshia Efeze, bendakana mu tshimenga. Nanku bavua bela meji ne: Polu mmubuele nende mu nzubu wa Mvidi Mukulu).

³⁰ Tshimvundu kutampakana mu tshimenga tshijima. Bantu bonsu kukungila ku nzubu wa Mvidi Mukulu. Kukuatabu Polu, bamupulumuna, bamupatula mu nzubu. Diakamue kukangabu biibi.

³¹ Bavua bakeba kushipa Polu. Kadi bantu bakavua bamanyishe mulombodi wa tshisumbu tshia basolayi ba bena Rome ne: Yerushalayime mujima mmutomboke!

³² Nanku diakamue mulombodi awu kubikila basolayi ne bamfumu babu, kuya lubilu kudi bavua benza mutoyi. Aba bamona mulombodi ne basolayi bende, kulekelabu dituuta Polu.

³³ Ke mulombodi wa basolayi kusemena kudi Polu, kutuma diyi, bua bamukuate, bamusuike nkanu ibidi. Pashishe kuebejaye ne: nnganyi ewu? Tshivuaye muenze ntshinyi?

³⁴ Kadi bantu bavua bela mbila, bamba aba muabu, aba muabu. Nanku mulombodi kavua mua kujingulula muvua tshilumbu. Ke kutumaye diyi, bua baye ne Polu mu nzubu wa basolayi.

³⁵ Amu Polu udiata nabu pa bibandilu bia kumpala kua nzubu, basolayi kumuambuila kulu, bualu bantu bavua ne lonji.

³⁶ Bonsu bavua bamulonda, bela mbila ne: — Bamushipe!

Polu udi ndilumbuluila

³⁷ Pakavuabu bamba kubueja Polu mu nzubu wa basolayi, kulombaye mulombodi wabu ne: — Ndi mua kukuambila bualu anyi? Mulombodi kumuebeja ne: — Udi mumanye muakulu wa bena Ngreke anyi?

³⁸ Nanku kuena muena Ejipitu ewu, uvua mutombueshe bantu matuku makese aa, muye mu tshipela ne bashipianganyi binunu binayi anyi?

³⁹ Polu kuandamuna ne: — Meme ndi muena Yuda. mBandele mu Tarse, tshimenga tshia lumu tshia mu Silisiya. Ndi nkulomba dianyisha, bua ngambile bantu bualu.

⁴⁰ Mulombodi wa basolayi kuanyisha. Ke Polu kuimana pa bibandilu, kupuwisha bantu ne tshianza. Bantu bamane kupuwa, Polu kubambila mu buena ebrewu ne: