Bienzedi 17 - MUKANDA WA MYIDI MUKULU

Polu ne Silase mu tshimenga tshia Tesalonike

¹ Polu ne Silase kupitshila mu Amfipolise, ne mu Apoloniya, kufika mu Tesalonike. Mu tshimenga atshi muvua nzubu wa kutendelela wa bena Yuda.

² Bilondeshile tshibidilu tshiende, Polu kubuela mu nzubu wa kutendelela awu. Matuku a Dikisha a mbingu isatu milondangane, Polu ne bantu bavua mu nzubu awu, kuelanganabu meji pa Mikanda ya tshijila.

³ Polu kubumvuija mikanda ayi, ubaleja ne: bilondeshile Mikanda ya tshijila eyi, Kristu uvua ne bua kukenga, kufua, kubiika. Uvua ubambila kabidi ne: — Kristu, Musungidi wetu, ke Yezu undi nnumanyisha!

⁴ Bamue bena Yuda kuitaba bivua Polu ne Silase bambe, kudisangisha nabu. Ke muvua kabidi bena Ngreke ba bungi, bavua bamane kubuela mu tshisumbu tshia bena ditaba ba bena Yuda, ne bakaji bavule bamanyike, benze.

⁵ Kadi bena Yuda bavua ne tshiiji tshipite. Kusangishabu bena buenzayi bavua bendakana mu misesu. Kujulabu nabu tshimvundu munkatshi mua bantu mu tshimenga tshijima. Kuyabu bonsu ku nzubu kua Yazone, bakeba Polu ne Silase, bua kuya kubalumbuisha kumpala kua bantu.

⁶ Bu muvuabu kabayi babasangane, kukuatabu Yazone ne bena ditaba bakuabu, kuyabu babapulumuna kumpala kua bamfumu ba tshimenga, bela mbila ne: — Bantu aba mbatombole bantu miaba yonsu. Mpindiewu bakadi muetu munu!

⁷ Yazone mmubateke kuende! Buonsu buabu badi benza bidi bibengangana ne meyi ne mikandu bia mukalenga wa bakalenga, bualu badi bamba ne: kudi mukalenga mukuabu, diende Yezu!

⁸ Miaku ayi kujula tshiiji tshia bantu bavule, kabidi ne tshia bamfumu ba tshimenga.

⁹ Ke Yazone ne bantu bavuaye nabu kufila makuta, bua banji kubalekela.

Polu ne Silase mu tshimenga tshia Bereya

¹⁰ Bufuku buila, bena ditaba kutuma Polu ne Silase mu Bereya. Bafika muaba awu, kuyabu mu nzubu wa kutendelela wa bena Yuda.

¹¹ Bena Bereya bavua bantu ba disanka, bapite bena Yuda ba mu tshimenga tshia Tesalonike. Bavua bateleja muaku wa Mvidi Mukulu ne ntema. Dituku dionsu bavua babala Mikanda ya tshijila, bua kujadika bivua Polu wamba ne bidi bilelela.

¹² Bantu bavule ba kudibu kuitaba. Bena Ngreke bavule kabidi kuitaba. Munkatshi muabu muvua bakaji baneme ba bungi, kabidi ne bantu balume tshisumbu.

¹³ Kadi bena Yuda ba mu Tesalonike, bumvua ne: Polu udi ulongesha muaku wa Mvidi Mukulu mu Bereya kabidi, kufikabu mu tshimenga atshi, bua kusonsola bantu, bua bajule mutoyi.

¹⁴ Diakamue bena ditaba kutuma Polu ku muelelu wa mayi manene. Silase ne Timote kushala mu Bereya.

¹⁵ Bantu kuya kushindikija Polu too ne ku Atene. Pashishe kupinganabu ku Bereya. Kuambilabu Silase ne Timote ne: Polu udi wamba ne: bandonde lukasa.

Polu mu Atene

¹⁶ Patshivua Polu mu Atene, muindile Silase ne Timote, uvua ne kanyinganyinga pa kumona mu tshimenga tshijima mpingu mivule ya kutendelela nayi nwidie.

¹⁷ Mu nzubu wabu wa kutendelela uvua uyukila ne bena Yuda, kabidi ne bantu ba bisamba bikuabu bavua bamane kubuela mu tshisumbu tshia bena ditaba ba bena Yuda. Kabidi dituku dionsu, muaba uvua bantu bonsu basangile, uvua uyukila ne bantu bakuabu bavua bafika muaba awu.

¹⁸ Bamue balongeshi ba mu tshisumbu tshia bena Epikure, ne ba mu tshisumbu tshia bena Stowa, bavua bayukila kabidi nende. Bamue bavua bamba ne: — Tshidi muena lubuakabuaka ewu musue kuamba ntshinyi? Kadi pavua bakuabu bumvua Polu ulongesha bantu malu a Yezu ne a dibiika, bavua bamba ne: — Bidi bimueneka ne: udi ulongesha malu a mvidie ya bantu ba bisamba bikuabu.

¹⁹ Nanku kuyabu nende mu tshipangu tshia Areyopaje, bamuebeja ne: — Udi mua kutumvuija bualu bupiabupia ebu, buudi ulongesha anyi?

²⁰ Bualu udi utuambila malu adi atukemesha. Nanku tudi basue kumanya tshidi malu awu umvuija.

²¹ (Bualu bena Atene bonsu, ne bantu ba bisamba bikuabu bavua basomba mu tshimenga atshi, bavua basombela amu bua kuamba, nansha bua kuteleja malu mapiamapia!)

²² Polu kuimana munkatshi mua bena tshipangu tshia Areyopaje, wamba ne: — Nuenu bena Atene, ndi mumone ne: nudi batendeledi menemene ba nwidie.

²³ Bualu ndi muendakane mu tshimenga tshienu tshionsu. Meme kumona miaba yonsu inudi nutendelela. Meme kusangana tshilambuilu tshikuabu: bavua bafundapu ne: “Mvidie utudi katuyi bamanye.” Kadi tshinudi nutendelela kanuyi bamanye, meme ndi musue kunumanyishatshi.

²⁴ Mvidi Mukulu udi mufuke bukua panu ne bionsu bidipu, Yeye ke Mfumu wa diulu ne wa buloba. Kena usomba mu nzubu idi bantu bibaka.

²⁵ Kena ukengela bua bantu bamuambuluishe ku tshintu nansha tshimue. Bualu Yeye ke udi upa bantu bonsu muoyi, mueyelu, ne bintu bikuabu bionsu.

²⁶ Udi mufuke bisamba bionsu, bifumine kudi muntu umue, mubitangalaje pa buloba bujima. Kufundilaye tshisamba tshionsu tshikondu tshia kusomba panu, ne mikalu ya miaba idi tshi mua kuasa.

²⁷ Uvua muenze nanku, bua bantu bikale bamukeba. Nanku padibu bidikija mua kupetangana nende, bumue nebamupete. Bushuwa Mvidi Mukulu udi pabuipi ne muntu yonsu,

²⁸ bualu “Munda muende tudi ne muoyi, munda muende tudi mua kunyunga, tudi kabidi amu munda muende.” Ke mudi bamue ba ku bafundi benu bajadike ne: “Tudi bana bende kabidi.”

²⁹ Patudi bana bende, katuena mua kuela meji ne: Mvidi Mukulu udi mufuanangane ne lupingu luenza ne tshiamu tshia mpawungi, nansha ne tshiamu tshitoke tshia mushinga mukole, nansha ne dibue, bintu bidi bantu batalame benza ku lungenyi luabu.

³⁰ Mvidi Mukulu kena musue kuvuluka bikondu bivua bantu kabayi bamumanye. Kadi mpindiewu udi ubikila bantu bonsu miaba yonsu, ubalomba bua badilengeje.

³¹ Bualu mmufunde dituku didi muntu udiye musungule ne bua kulumbuluisha bantu bonsu, kukosa nsambu yabu pa yoyi. Ke bualu budiye mujadikile bantu bonsu pa kubisha muntu ewu ku bafue!

³² Bumvua amu Polu wakula bua dibiika dia bafue, bamue bantu kumuseka. Kadi bakuabu kuamba ne: — Netuvue kukuteleja musangu mukuabu, bua upite kutuambila bualu ebu!

³³ Ke Polu kulayangana nabu, kuya.

³⁴ Bamue kumulonda, kuitaba Mvidi Mukulu. Kudibu kuvua Diyonisiyuse, muena mu tshipangu tshia Areyopaje, kabidi ne mukaji, diende Damarise, ne bantu bakuabu kabidi.