Bienzedi 16 - MUKANDA WA MYIDI MUKULU

Timote udi ulamata Polu ne Silase

¹ Polu kufika mu Derbe, pashishe mu Listra. Muine amu muvua muena ditaba, dina diende Timote. Mamuende uvua muena Yuda mumane kubuela mu Tshisumbu tshia bena Kristu. Tatuende uvua muena Ngreke.

² Bena ditaba ba mu Listra, ne ba mu Ikoniyume, bavua banyishe Timote bikole.

³ Ke pavua Polu musue kuya nende. Nanku kuyaye kumuteka panshi, bualu bua bena Yuda bavua mu ditunga adi. Bualu bonsu bavua bamanye muvua tatuende wa Timote muena Ngreke.

⁴ Mu bimenga bivuabu bapitshila, bavua bamanyisha bena ditaba mikenji ivua bapostolu ne bakulu ba mu Yerushalayime bele. Bavua balomba kabidi bena ditaba, bua bayikumbaje bimpe.

⁵ Mu Bisumbu bionsu bantu bavua bakolesha ditaba diabu, bavulangana kabidi ku dituku ku dituku.

Mvidi Mukulu udi uleja Polu malu mu Trowase

⁶ Mueyelu wa Tshijila uvua mukandike Polu, ne bavuaye nabu, bua kabalongeshi muaku mu buloba bua Aziya. Ke bobu kupitshila mu buloba bua Frijiya ne bua Ngalate.

⁷ Bafika ku mikalu ya Miziya, kukebabu kubuela mu buloba bua Bitiniya. Kadi Mueyelu wa Tshijila kubakandika.

⁸ Nanku kupitabu mu Miziya, kuya ku tshisabu tshia Trowase.

⁹ Butuku Mvidi Mukulu kuleja Polu malu. Kumonaye muntu wa bena Masedoniya muimane, umulomba ne: “Pitshila mu Masedoniya, uvue kutuambuluisha!”

¹⁰ Polu mumane kumona malu aa, tuetu kudilongolola diakamue bua kuya mu Masedoniya. Bualu tuvua bashindike ne: Mvidi Mukulu udi mutubikile bua kulongesha bena mu ditunga adi Lumu lua Disanka.

Mu Filipe, Lidiya udi witaba Mfumu

¹¹ Tubuela mu majuwa mu Trowase, tuetu kuya buludi ne mu tshidila tshia Samotrase. Butshia tuetu kufika mu Neyapolise.

¹² Tumuka amu, tuetu kufika mu Filipe, tshimenga tshia tshitupa tshia kumpala tshia buloba bua Masedoniya, tshivua kabidi ku bumfumu bua bena Rome. Tuetu kushala mu tshimenga atshi amue matuku.

¹³ Dituku dia Dikisha, tuetu kupatuka mu tshimenga, kuya ku muelelu wa musulu, kutuvua bela meji ne: netupete muaba uvua bena Yuda batendelela. Tuetu kusomba muaba awu, kuyukilangana ne bakaji bavua basangilamu.

¹⁴ Umue wa kudibu, dina diende Lidiya, uvua mutumine ku tshimenga tshia Tiyatira. Uvua ngendamushinga wa bilamba bikunze bia mushinga mukole. Uvua mumane kulamata tshisumbu tshia bena ditaba ba bena Yuda. Uvua muteleje ne ntema bituvua tuamba. Mfumu kunzulula muoyi wende, bua umvue bimpe bivua Polu wakula.

¹⁵ Kumutuabu mu mayi, yeye ne nzubu wende mujima. Pashishe kutulombaye ne: — Panuikala bamone ne: ndi ngitaba Mfumu menemene, nuvua kusomba kuanyi. Kutusengelelaye bikole. Tuetu kushisha kuitaba.

Polu mu nzubu wa lukanu mu tshimenga tshia Filipe

¹⁶ Dituku dikuabu tuvua tuya muaba uvua bantu batendelela. Tuetu kusambakena ne mukaji mupika, muikale ne mukishi mubi uvua umusaka bua kuambila bantu malu adi ne bua kuenzeka. Uvua upetesha bamfumu bende lupetu lua bungi ku mudimu awu.

¹⁷ Kutulondaye tuetu ne Polu, wela mbila ne: — Bantu aba mbena mudimu wa Mvidi Mukulu, Muena kulu! Badi banumanyisha munudi mua kupanda!

¹⁸ Mukaji awu uvua wenza nanku matuku a bungi. Pashishe kutondabi Polu. Ke kukudimukaye, wambila mukishi mubi awu ne: — Mu dina dia Yezu Kristu, ndi nkutumina diyi ne: patuka munda mua muntu awu! Diakamue mukishi kupatuka.

¹⁹ Kadi bamfumu ba mukaji awu bavua bamona ne: katuakupetela kabidi makuta kudi mukaji awu. Nanku kukuatabu Polu ne Silase, benda babapulumuna kumpala kua bamfumu ba tshimenga, muaba uvua bantu basangile.

²⁰ Kubimanyikabu kumpala kua balombodi ba tshimenga ba bena Rome, babambila ne: — Bantu aba badi batombola bantu mu tshimenga tshietu. Badi bena Yuda!

²¹ Badi balongesha bibidilu bidi mikenji yetu kukandika. Bu mutudi bena Rome, katuena mua kubianyisha, nansha kubienza.

²² Bantu bonsu bavua basangile muaba awu kuela Polu ne Silase bibingu. Ke balombodi kutuma diyi, bua babavule bilamba, babatuutshishe mikaba.

²³ Bamane kubatuuta bikole, kubelabu mu nzubu wa lukanu. Kuambilabu mulami wa nzubu awu ne: ubalame bimpe.

²⁴ Mulami umvua nanku, kubelaye mu kazubu ka munda mua nzubu menemene. Kubelaye kabidi tshikunyi ku makasa.

²⁵ Munda nkulu, Polu ne Silase bavua batendelela, bimba misambu, batumbisha Mvidi Mukulu. Bena lukanu bakuabu bavua babateleja.

²⁶ Diakamue tshikumina tshikole kuenzeka, kunyukisha nzubu wa lukanu too ne ku tshitaku tshiende. Bu mpindiewu, biibi bionsu bia nzubu wa lukanu kunzuluka, nkanu ya bena lukanu bonsu kufuka.

²⁷ Mulami utabuluka ku tulu, kumonaye biibi bionsu bia nzubu wa lukanu buashi. Kutulaye muele wende bua kudishipa, bualu uvua muele meji ne: bena lukanu mbanyeme.

²⁸ Kadi Polu kumuela diyi muende muonsu ne: — Kudienzedi bibi nansha! Tuetu bonsu tudi apa!

²⁹ Ke mulami kulombesha muendu, kubuela lukasa mu kazubu kavua bena lukanu. Kudielaye ku makasa a Polu ne Silase, uzakala ne buowa.

³⁰ Pashishe kubapatulaye mu kazubu aku, ubakonka ne: — Bakalenga, bua meme kupanda, ngenze tshinyi?

³¹ Polu ne Silase kuandamuna ne: — Itaba Mfumu Yezu. Nanku neupande, wewe ne nzubu webe.

³² Nanku kubalongeshabu, yeye ne bonsu ba mu nzubu muende, muaku wa Mfumu.

³³ Butuku abu, mulami kuya nabu, kusukula mputa yabu. Diakamue yeye ne bena diende bonsu, kubatuabu mu mayi.

³⁴ Mulami kuya ne Polu ne Silase kuende, kubalambishila biakudia. Yeye ne bonsu ba mu nzubu muende bavua ne disanka divule, bualu mpindiewu bavua bitaba Mvidi Mukulu.

³⁵ Butshia balombodi ba tshimenga ba bena Rome kutuma bantu, bua bambile mulami ne: — Lekela bantu abu, baye!

³⁶ Ke mulami kuvua kuambila Polu ne: — Balombodi ba tshimenga mbatume diyi, bua bamupatule mu lukanu. Nanku nudi mua kupatuka. Nuaya amu bimpe!

³⁷ Kadi Polu kuambila bantu bavua balombodi batume ne: — Tuetu bavua bapete bukenji bua bena Rome, mbatutuutshishe mikaba, bantu bonsu batangile, kabayi banji kutulumbuluisha. Bavua batuelesha kabidi mu lukanu. Kadi mpindiewu badi basue kutulekela mu musokoku anyi? Tuetu katuena basue nanku to! Balombodi bafike bobu nkayabu bua kutulekela!

³⁸ Bantu bavuabu batume, kuyabu kuambila balombodi ba tshimenga ba bena Rome miaku ayi. Balombodi bumvua ne: Polu ne Silase badi ne bukenji bua bena Rome, buowa kubakuata.

³⁹ Kuvuabu kubalomba luse. Pashishe kubalekelabu, babasengelela bua bumuke mu tshimenga.

⁴⁰ Polu ne Silase bamane kupatuka mu nzubu wa lukanu, kuyabu kua Lidiya. Kumonanganabu ne bena ditaba, kubakoleshabu ku muoyi, kulayanganabu nabu.