Bienzedi 15 - MUKANDA WA MYIDI MUKULU

Tshipangu tshia mu Yerushalayime

¹ Bamue bantu batumina ku Yudeya, kufikabu mu Antiyokiya. Bavua balongesha bena ditaba ne: “Kabayi banuteka panshi, mudi mikenji ya Moshe miambe, kanuena mua kupanda to.”

² Kadi Polu ne Barnabase kubenga bivuabu balongesha abi, kuelangana nabu mpata bikole pa bualu abu. Ke bena ditaba kushindika ne: tutume Polu ne Barnabase, ne bantu bakuabu ba mu Antiyokiya, ku Yerushalayime, kudi bapostolu ne bakulu, bua batangile tshilumbu etshi.

³ Tshisumbu tshia bena ditaba kubambuluisha bua kuya ku luendu alu. Bavua bapitshila mu Fenisiya ne mu Samariya, balondela bena matunga aa, muvua bantu ba mu bisamba bikuabu bitabe Mvidi Mukulu. Bualu abu buvua busankisha bena ditaba bonsu bikole.

⁴ Bamane kufika mu Yerushalayime, kubakidilabu kudi Tshisumbu tshia bena ditaba, bapostolu ne bakulu. Ke bobu kubalondela bionsu bivua Mvidi Mukulu muenze mu bianza biabu.

⁵ Kadi bantu bakuabu ba luseke lua Baparushe bakavua bamane kubuela mu Tshisumbu tshia bena ditaba, kujukabu, bamba ne: — Bateke bantu ba bisamba bikuabu panshi, babambile kabidi bua bakumbaje mikenji ya Moshe.

⁶ Ke bapostolu ne bakulu kusangila bua kutangila tshilumbu atshi.

⁷ Bamane kuelangana meji mukungulu mule, Petro kujuka, kubambila ne: — Bana betu, nudi bamanye ne: kukadi matuku a bungi, Mvidi Mukulu mmunsungule munkatshi muenu, bua meme kumanyisha bantu ba bisamba bikuabu Lumu lua Disanka, bua balumvue, bitabe Yezu.

⁸ Mvidi Mukulu udi mumanye mioyi ya bantu, mmuleje mudiye muanyishe bantu ba bisamba bikuabu, bualu mmubapeshe Mueyelu wa Tshijila mumue netu.

⁹ mMumushe kansungasunga konsu munkatshi muetu nabu. Ke padiye mujimije mibi yabu, bualu bavua bitaba.

¹⁰ Kadi nudi nuteta Mvidi Mukulu mpindiewu bua tshinyi? Nudi basue komekela bena ditaba bujitu buvua bankambua betu, nansha tuetu mene katuyi mua kuambula anyi?

¹¹ Kanuenji nanku! Bualu tudi tuitaba ne: amu Mfumu Yezu udi utusungidila mumue nabu, amu bua luse luende.

¹² Bonsu bavua mu tshipangu kushala bapuwa. Bavua bateleja muvua Barnabase ne Polu babalondela malu a dikema ne bishima bionsu bivua Mvidi Mukulu muenzele bantu ba bisamba bikuabu mu bianza biabu.

¹³ Bajikija diakula, Yakobe kuamba pende ne: — Bana betu, ntelejayi!

¹⁴ Simone mmutulondele muvua Mvidi Mukulu mene mudianze kukuata mudimu, bua kusungula munkatshi mua bantu ba bisamba bikuabu bantu bende, badi banemeka dina diende.

¹⁵ Bionsu ebi bidi Kumyuangana ne miaku ya bambi. Bualu Mikanda ya tshijila idi ijadika ne:

¹⁶ “Maweja-Nangila udi wamba ne: pajika malu onsu aa, nempingane, nengibakulule nzubu wa Davide uvua mupuke, nendongolole bivua binyanguke, nengimanyike nzubu, ashindame.

¹⁷ Nanku bantu bakuabu bonsu nebakebe Maweja-Nangila: ke bena bisamba bionsu bimvua mubikile, bua bishale bianyi. Meme Maweja-Nangila nenkumbaje,

¹⁸ bimvua mumane kumanyisha kale.”

¹⁹ Ke muapostolu Yakobe kuamba kabidi ne: — Ndi ngela meji ne: ki mbimpe kutatshisha bantu ba bisamba bikuabu badi bitaba Mvidi Mukulu to.

²⁰ Kadi tubafundile mukanda, tubambile ne: kanudi minyinyi ya nyama ivuabu balambule nwidie, bualu idi ne mikiya; nulekele buendenda; kanudi minyinyi ya nyama mishipa kayiyi mipatule mashi, nansha mashi mene.

²¹ Bualu kuonsu kuaka, bantu badi balongesha mikenji ya Moshe mu tshimenga tshionsu; kabidi badi babala mikenji eyi mu nzubu ya kutendelela matuku onsu a Dikisha.

Mukanda mutumina bena ditaba ba mu bisamba bikuabu

²² Ke bapostolu, bakulu, pamue ne Tshisumbu tshijima tshia bena ditaba, kujadika bua kusungula bamue ba kudibu, bua babatume mu Antiyokiya, pamue ne Polu ne Barnabase. Kusungulabu bakulu babidi bavua ba lumu luimpe munkatshi mua bena ditaba: ke Yuda, udibu binyika kabidi Barsabase, ne Silase.

²³ Kubapabu mukanda. Bavua bafundamu ne: “Tuetu bapostolu ne bakulu, bana benu, tudi tunuela muoyi, nuenu bena ditaba badi kabayi bena Yuda, badi basa mu Antiyokiya, mu Siriya, ne mu Silisiya.

²⁴ Tudi bumvue ne: bantu bakuabu ba kuetu kunu mbavue kunulubakaja, kunupampakaja kabidi, ne malongesha abu. Kadi katuena babatume ne mukenji nansha.

²⁵ Ke patudi bumvuangana ne muoyi umue bua kusungula bantu, kunutuminabu. Nebikale mu luendu amu, ne bana betu basuibue Barnabase ne Polu,

²⁶ bavua badiele mu njiwu ya lufu, bua mudimu udibu bakuatshila Mfumu Yezu Kristu.

²⁷ Tudi banutumine Yuda ne Silase, bua banuambile mukana bitudi banufundile.

²⁸ Bualu Mueyelu wa Tshijila, ne tuetu mene, tudi bajadike ne: katuena mua kunuomekela bujitu nansha bumue bupite mikenji inudi ne bua kukumbaja eyi:

²⁹ kanudi minyinyi ya nyama ivuabu balambule nwidie. Kanudi mashi, nansha minyinyi ya nyama mishipa, kayiyi mipatule mashi. Nulekele buendenda. Nuenu bakumbaje mikenji eyi, nudi nuenza biakane. Kolayi!”

³⁰ Bantu bavuabu batume abu kuya mu Antiyokiya. Kukungijabu bena ditaba bonsu, kubapa mukanda.

³¹ Pavuabu bababadila mukanda awu, bonsu kusanka bua miaku eyi ivua ibakolesha ku muoyi.

³² Yuda ne Silase bavua bambi. Nanku kuakulabu mukungulu mule, bua kukolesha bana betu ku muoyi, kubasamba kabidi.

³³ Kushalabu amue matuku mu Antiyokiya. Pashishe bana betu kulayangana nabu bimpe, bua bapingane kudi bavua babatume. [

³⁴ Kadi Silase uvua musue kushala muaba awu.]

³⁵ Polu ne Barnabase kushala matuku a bungi mu Antiyokiya. Pamue ne bantu bakuabu ba bungi bavua balongesha bena ditaba, babamanyisha muaku wa Mfumu.

Polu ne Barnabase badi bashiyangana

³⁶ Kupita matuku, Polu kuambila Barnabase ne: — Tubange luendu, tumonangane ne bena ditaba, mu bimenga bionsu bituvua bamanyishe muaku wa Mfumu, bua tumone mudibu.

³⁷ Barnabase uvua musue kuya ne Yowanane, uvuabu binyika kabidi ne: Marke.

³⁸ Kadi Polu kavua musue kuya nende to. Bualu Yowanane Marke uvua mubashiye mu Pamfiliya, mubenge kuenza nabu mudimu.

³⁹ Polu ne Barnabase kutandangana bikole, kushiyangana. Barnabase kuangata Marke, kubuela nende mu majuwa, kuya ku Shipre.

⁴⁰ Polu kusungula Silase. Bena ditaba bamane kubateka mu bianza bia Mvidi Mukulu, ke bobu kuya.

⁴¹ Polu kupita mu Siriya ne mu Silisiya, wenda ukolesha bantu ku muoyi mu Bisumbu bionsu bia bena ditaba.