Bienzedi 12 - MUKANDA WA MYIDI MUKULU

Badi bashipa Yakobe, bela Petro mu lukanu

¹ Tshikondu atshi mukalenga Erode kutuadija kukengesha bamue ba mu Tshisumbu tshia bena ditaba.

² Kukoseshaye Yakobe, muanabu ne Yowanane, mutu.

³ Bu muvuaye mumone ne: bimvua ngenza ebi bidi bisankisha bena Yuda, kukuatshishaye kabidi ne Petro. (Bivua mu tshikondu tshia tshibilu tshia Mampa kaayi mela buanga.)

⁴ Bamane kukuata Petro, Erode kumuelesha mu lukanu. Kutekaye basolayi bisumbu binayi, basolayi banayi banayi ku tshisumbu, bua bamulame, bakombolangana. Uvua musue kumulumbuluisha ku mesu a bantu, pajika tshibilu tshia Dipita dia Maweja-Nangila.

⁵ Pavua Petro mu lukanu, bena ditaba bavua batendelela Mvidi Mukulu muabu muonsu, bamuakuila.

Mutumibue udi upatula Petro mu lukanu

⁶ Dia muladilu wa dituku divua Erode musue kumulumbuluisha ku mesu a bantu, Petro uvua mulale munkatshi mua basolayi babidi. Bavua bamusuike ne nkanu ibidi. Basolayi bakuabu bavua balama tshiibi tshia ku nzubu wa lukanu.

⁷ Bu mpindiewu, mutumibue wa Maweja-Nangila kumueneka. Butoke kukenka mu tshibambalu. Mutumibue kunyungisha Petro mu lubadi, kumubisha, umuamba ne: — Juka lukasa! Diba adi nkanu ivuabu bamusuike ku bianza kukoseka, kupona panshi.

⁸ Ke mutumibue kumuamba ne: — Vuala tshinkutu tshiebe, undonde.

⁹ Petro kupatuka, ulonda mutumibue. Kavua mumanye ne: bionsu bidi mutumibue wenza mbia bushuwa. Kadi uvua wela meji ne: Mvidi Mukulu udi undeja malu mu tshiota.

¹⁰ Kupitabu tshisumbu tshia kumpala tshia basolayi, pashishe tshibidi. Kufikabu ku tshiibi tshia biamu tshia nzubu wa lukanu bua kubuela mu tshimenga. Amu bafika, tshiibi kunzuluka nkayatshi. Bobu kupatuka, kubuelabu mu musesu mukuabu. Ke mutumibue diakamue kujimina Petro kuisu.

¹¹ Petro kushisha kumanya bivua bimuenzekela, wamba ne: — Mpindiewu ndi mmona bidi bienzeka ebi ne: mbia bushuwa. Maweja-Nangila mmufume mutumibue wende. mMumpatule mu bianza bia Erode, ne mu bualu buonsu bubi buvua bena Yuda bakeba kungenzela.

¹² Petro mumane kujingulula malu onsu avua mamuenzekele, kuyaye kua Mariya, mamuende wa Yowanane, udi dina dikuabu ne: Marke. Bantu bavule bavua basangilaku, batendelela.

¹³ Petro ukokola ku tshiibi tshia ku tshibuelelu, Roda, muena mudimu mukaji, kuya ku tshiibi bua kunzulula.

¹⁴ Kadi bu muvuaye mujingulule diyi dia Petro, kumvuaye disanka. Nanku pa mutu pa kukangula tshiibi, kupinganaye lubilu munda mua nzubu, bua kumanyisha bavuamu ne: Petro udi pambelu.

¹⁵ Bobu kumuamba ne: — Udi mupale anyi? Kadi yeye kushindika muende muonsu ne: — nYeye menemene! Ke bantu kuandamuna ne: — Nanku mmutumibue wende udi umulama.

¹⁶ Kadi Petro uvua amu ukokola. Ke bantu kunzulula tshiibi, kumona Petro! Bonsu kukema bikole, kukatshila.

¹⁷ Ke Petro kupuwisha bantu ne tshianza, kubalondela muvua Mfumu mumupatule mu nzubu wa lukanu. Kuambaye kabidi ne: — Numanyishe Yakobe, ne bana betu bakuabu, bionsu ebi. Pashishe kupatukaye, kuya muaba mukuabu.

¹⁸ Dinda mutoyi munene kujuka munkatshi mua basolayi. Bavua badikonka ne: Petro mmuye penyi?

¹⁹ Erode kubambila bua bamukebe. Kadi nanshabu kumusangana to. Ke Erode kutuma diyi, bua balumbuluishe basolayi balami abu, babashipe. Pashishe kumukaye mu Yudeya, bua kuya kusomba amue matuku mu Kezareya.

Erode udi ufua

²⁰ Erode uvua mufikile bena Tire ne bena Sidone munda bikole. Nanku bena bimenga ebi kudisangisha bua kuya kumyuangana nende. Kulombabu Blastuse, mulombodi wa bena mudimu ba mu nzubu wa mukalenga, bua abakuile. Pashishe kumanyishabu Erode muvuabu bajinga kumyuangana nende. Bualu matunga abu avua apeta biakudia mu ditunga dia mukalenga Erode.

²¹ Dituku divuabu bajadike bua kuyukila nende, Erode kuvuala biende bia bukalenga. Kuyaye kusomba mu nkuasa wende wa bumfumu, wenzela bantu aba diyuki dinene.

²² Diba adi, bantu kuela tunkunduluila, bamba ne: — Udi wakula nanku mMvidi Mukulu mene, ki mmuntu to!

²³ Diakamue mutumibue wa Mvidi Mukulu kusamisha Erode, bualu uvua udikebela lumu luvua Mvidi Mukulu ne bua kupeta. Kubuelaye bikusu, kufua.

²⁴ Kadi bantu bavua bitabe muaku wa Mvidi Mukulu kuvulanganabu bikole.

²⁵ Barnabase ne Shawule bamane kukumbaja mudimu wabu mu Yerushalayime, kupinganabu mu Antiyokiya, pamue ne Yowanane, uvua dina dikuabu ne: Marke.