Bienzedi 11 - MUKANDA WA MYIDI MUKULU

Petro udi umvuija bena ditaba ba mu Yerushalayime bivuaye muenze

¹ Bapostolu ne bena ditaba bavua mu Yudeya, kumvuabu lumu ne: bantu ba bisamba bikuabu mbitabe muaku wa Mvidi Mukulu.

² Kadi diba divua Petro mupingane mu Yerushalayime, bena ditaba ba mu tshisamba tshia bena Yuda kumujaana,

³ bamba ne: — Udi mubuele mu nzubu ya bantu ba bisamba bikuabu, bavuabu kabayi bateke panshi, muebe kabidi nabu bua tshinyi?

⁴ Ke Petro kubumvuija muvua bualu bujima, wamba ne:

⁵ — Mvua mu tshimenga tshia Yope, ntendelela. Mvidi Mukulu kundeja malu. Meme kumona tshintu bu tshilamba tshinene tshia pa mesa, batshikuata ku nsongu inayi, tshienda tshipueka mu diulu, tshitangila kundi.

⁶ Meme kutangila bimpe munda muatshi, kumona nyama ya mikonu inayi, nyama ya lonji, bilandadi, ne nyunyi ya kulu.

⁷ Ke meme kumvua diyi, dingamba ne: “Petro, juka, ushipe, udie!”

⁸ Meme kuandamuna ne: “Mfumu, tshiena mua kuenza nanku. Bualu katshia tshiena muanji kudia tshintu tshidi Mvidi Mukulu mukandike, nansha tshia mikiya.”

⁹ Meme kumvua tshiakabidi diyi difuma mu diulu ne: “Tshidi Mvidi Mukulu muambe ne: katshiena ne mikiya, wewe kuena mua kutshiamba ne: tshidi ne mikiya!”

¹⁰ Kuenzekabi nanku misangu isatu. Pashishe kupingajabu bionsu mu diulu.

¹¹ Amu diba adi, bantu basatu ba ku Kezareya bavuabu bantumine, kufika ku nzubu kumvua nsomba.

¹² Mueyelu wa Tshijila kungambila bua kuya nabu, tshiyi ngelakana. Bana betu basambombu, bandi mufike nabu apa, kuya kumfila mu Kezareya. Tufika, tuetu kubuela bonsu mu nzubu mua Korneliyuse.

¹³ Yeye kutulondela muvaye mumone mutumibue wa Mvidi Mukulu mu nzubu muende, muimane kumpala kuende, umuamba ne: “Tuma bantu mu Yope, babikile Simone, udi dina dikuabu ne Petro.

¹⁴ Neukumanyishe malu adi mua kukusungidila, wewe ne nzubu webe mujima.”

¹⁵ Ntuadija kulongesha, Mueyelu wa Tshijila kupuekela bantu abu, anu muvuawu mutupuekele petu mu ntuadijilu amu.

¹⁶ Meme kuvuluka muvua Mfumu muambe ne: “Yowanane uvua mutue bantu mu mayi. Kadi nuenu nebanutue munda mua Mueyelu wa Tshijila.

¹⁷ Mvidi Mukulu kubapa dipa dia momumue, divuaye mutupe, pamvua bitabe Mfumu Yezu Kristu. Nanku mumvua meme mua kujikila Mvidi Mukulu njila mbishi?

¹⁸ Miaku ayi kubatalaja. Kutumbishabu Mvidi Mukulu, bamba ne: — Bushuwa, Mvidi Mukulu mmupe kabidi bantu ba bisamba bikuabu bukole bua kudilengeja, bua bapete muoyi mulelela.

Tshisumbu tshia bena ditaba ba mu Antiyokiya

¹⁹ Bamane kushipa Stefane, kutuadijabu kukengesha bena ditaba. Ke bena ditaba kutangalaka. Bamue ba kudibu kuya too ne ku Fenisiya, ne ku Shipre, ne ku Antiyokiya. Kadi bavua balongesha amu bena Yuda nkayabu malu a Mvidi Mukulu.

²⁰ Kadi bamue bena ditaba bavua mu tshidila tshia Shipre, ne ba mu tshimenga tshia Sirene, bavua bafike kabidi mu Antiyokiya. Kutuadijabu kulongesha bantu ba bisamba bikuabu, babamanyisha Lumu lua Disanka lua Mfumu Yezu.

²¹ Mfumu uvua ubambuluisha ne bukole buende. Bantu bavule kuitaba Mfumu, kudilengeja.

²² Balombodi ba Tshisumbu tshia bena ditaba ba mu Yerushalayime kumvua lumu alu. Kutumabu Barnabase mu Antiyokiya.

²³ Ufika, kumonaye muvua Mvidi Mukulu mukumbaje mudimu ne dinanga munkatshi mua bena ditaba. Nanku kusankaye, ubabela bonsu bua bananukile ne muoyi mukole, bitabe Mfumu.

²⁴ Barnabase uvua muntu muimpe, muwule ne Mueyelu wa Tshijila, kabidi ne ditaba. Ke muvua bantu bavua bitaba Mfumu bavulangana bikole.

²⁵ Ke Barnabase kuya kukeba Shawule ku Tarse.

²⁶ Umusangana kupinganaye nende ku Antiyokiya. Kushalabu koku tshidimu tshijima bonsu babidi mu Tshisumbu tshia bena ditaba atshi. Bavua balongesha bantu bavule malu a ditaba. Mu Antiyokiya ke muaba uvua bena ditaba badianze kupetela dina dia bena Kristu.

²⁷ Matuku awu bambi kumuka ku Yerushalayime, kufika ku Antiyokiya.

²⁸ Umue wa kudibu, diende Agabuse, kujuka. Mueyelu wa Tshijila kumuambila, bua amanyishe bantu ne: “Matuku makese aa tshiyole tshia nzala tshinene netshienzeke pa buloba bujima.” (Tshiyole atshi kuenzeka tshikondu tshivua Klode mukalenga wa bakalenga).

²⁹ Bena ditaba kumvuangana bua muntu yonsu afile tshiende tshidiye natshi, bua kuambuluisha bena ditaba ba mu Yudeya.

³⁰ Kuenzabu nanku. Kutumabu Barnabase ne Shawule ne bintu abi kudi bakulu ba mu Yudeya.