Balombodi 9 - MUKANDA WA MYIDI MUKULU

Abimeleke mmukalenga wa Shekeme

¹ Abimeleke, muana wa Yerubaale (mmumue ne: Ngideyone), kuya ku Shekeme, bua kuyukila ne bamansebende, kabidi ne bena nzubu wa mamuende bonsu. Kubambilaye ne:

² — Nuye kukonka balombodi ba mu tshimenga ne: nudi basue kuikala ku bumfumu bua bana ba Yerubaale bonsu makumi muanda mutekete, anyi ku bumfumu bua muana umue? Nuvuluke kabidi ne: meme ndi mulela wenu.

³ Bamansebende ba Abimeleke kuya kuambila balombodi ba mu Shekeme malu onsu awu. Balombodi abu kujadika bua kuditua ku tshia Abimeleke, bualu uvua mansebabu.

⁴ Kumupeshabu nkanu ya tshiamu tshitoke tshia mushinga mukole makumi muanda mutekete ya mu nzubu wa mvidie wabu Baale-Berite. Abimeleke kuangata nkanu ayi, kufuta bantu bapote, ba tshianana, bua bamulonde.

⁵ Abimeleke kuya mu nzubu wa tatuende ku Ofra. Muaba awu kushipaye bana babu makumi muanda mutekete, bana ba Yerubaale. Kubashipelaye anu pa lubuebue lumue. Amu Yotame, muana mukala, ke uvua mupande, bualu uvua musokome.

⁶ Balombodi bavua ku Shekeme, ne bantu bonsu bavua ku Bete-Milo, kudisangisha. Kuyabu ku mutshi wa lusanga wa mu Shekeme, pabuipi ne dibue divuabu bimanyika. Kutekabu Abimeleke ku bukalenga.

Yotame udi wela lusumuinu

⁷ Kuambilabu Yotame bionsu abi. Kubandaye ku lusongu lua mukuna wa Ngarizime, kuelaye diyi dikole muende muonsu ne: — Bena Shekeme, nunteleje, panuikala basue bua Mvidi Mukulu anuteleje!

⁸ “Dituku dikuabu, mitshi kumyuangana bua kudisunguila mukalenga. Kuambilayi mutshi wa olive ne: ‘Wikale mukalenga wetu!’

⁹ Kadi mutshi wa olive kuandamuna ne: ‘Nudi nuela meji ne: ndi mua kulekela kupatula mafuta adibu banyisha kudi mvidie ne kudi bantu, bua meme kuikala nditemba, nnyungakana ku mutu kua mitshi mikuabu anyi?’

¹⁰ Mitshi kuambila mutshi wa mfiku ne: ‘Wikale mukalenga wetu!’

¹¹ Kadi mutshi wa mfiku kuandamuna ne: ‘Nudi nuela meji ne: ndi mua kulekela kukuama bimuma bimpe bisheme, bua meme kuikala nditemba, nnyungakana ku mutu kua mitshi mikuabu anyi?’

¹² Pashishe mitshi kuambila mutshi wa mvinyone: ‘Wikale mukalenga wetu!’

¹³ Kadi mutshi wa mvinyo kuandamuna ne: ‘Nudi nuela meji ne: ndi mua kulekela kupatula maluvu adi asankisha mvidie ne bantu, bua meme kuikala nditemba, nnyungakana ku mutu kua mitshi mikuabu anyi?’

¹⁴ Ku ndekelu, mitshi kumvuangana, kuambila mutshi wa meba ne: ‘Wewe wikale mukalenga wetu!’

¹⁵ Mutshi wa meba kuandamuna ne: ‘Panuikala basue kunsungula bu mukalenga wenu bulelela, imanayi muinshi mua dileji dianyi emu! Nuenu kanuyi benze nanku, kapia nekalakuke ku meba anyi. Nekoshe too ne mitshi ya sedre ya mu Lebanone!’ ”

¹⁶ Yotame kukonka bena Shekeme ne: — Panuvua bateke Abimeleke bua ikale mukalenga, nuvua benze bimpe anyi? Nuvua benzele Yerubaale ne nzubu wende bimpe anyi? Nuvua bavuluke bionsu bivua Yerubaale munuenzele anyi?

¹⁷ Tatu wanyi uvua munuluile mvita. Uvua mubuele mu njiwu ya lufu anu bua kunusungidila kudi bena Madiyane.

¹⁸ Kadi lelu, nudi nubenga bena nzubu wende. Nudi bashipe bana bende ba balume makumi muanda mutekete pa lubuebue lumue. Nudi bateke Abimeleke bua ikale mukalenga wa Shekeme, bualu mmuanenu. Kadi Abimeleke mmuana uvua tatu mulele ne mukaji mupika.

¹⁹ Lelu panuikala benzele Yerubaale ne bena nzubu wende bualu ebu ne muoyi muimpe, Abimeleke anusankishe, nuenu kabidi numusankishe.

²⁰ Kadi kanuyi benze nanku, kapia nekapatuke kudi Abimeleke bua kuosha bena Shekeme ne bena Bete-Milo. Kapia nekapatukile kabidi kudi bena Shekeme ne bena Bete-Milo bua kuosha Abimeleke.

²¹ Ke Yotame kunyema, kuya kusokoma ku Beyera, bualu uvua utshina muanabu Abimeleke.

Bena Shekeme badi batombokela Abimeleke

²² Abimeleke uvua mushale mukalenga wa bena Izrayele bidimu bisatu.

²³ Pashishe Mvidi Mukulu kutuma tshimvundu pankatshi pa mukalenga Abimeleke ne bena Shekeme, kabatshiyi bumvuangana kabidi to. Bena Shekeme kutombokela Abimeleke.

²⁴ Ke muvua bena Shekeme bonsu ne Abimeleke ne bua kufuta tshibawu tshia bubi buabu. Abimeleke uvua mupete dinyoka edi, bualu mmushipe bana babu ba balume makumi muanda mutekete, bana ba Yerubaale. Bena Shekeme bavua bapete dinyoka edi, bualu mbakoleshe Abimeleke mu maboku bua kushipaye bana babu.

²⁵ Nanku bua kuenzela Abimeleke bibi, bena Shekeme kumutekela batentekedi ku mikuna yonsu ivua pabuipi ne tshimenga. Bantu abu bavua balamina bena luendu, biba mabuki abu. Bantu bakuabu bavua bambila Abimeleke bionsu abi.

²⁶ Dituku dikuabu, Ngaale, muana wa Ebede, kufika mu Shekeme, ne bana babu ba balume. Nanku bena Shekeme kutuadija kutekemena amu muntu awu.

²⁷ Kuyabu ku mionji yabu ya tumuma tua mvinyo. Kupolabu tumuma, kutukama. Kulongololabu tshibilu. Kuyabu mu nzubu wa mvidie wabu. Kuenzabu didia dinene dia disanka. Kushipabu Abimeleke.

²⁸ Ngaale kubakonka ne: — Tuetu mu Shekeme, tudi bantu ba mushindu kaayi? Tudi baditeke ku bumfumu bua Abimeleke bua tshinyi? Abimeleke mene nnganyi? Udi anu muana wa Yerubaale! Mmuteke Zebule mulombodi wa tshimenga. Kadi nuenu bena Shekeme, nuitabe anu Amore uvua muase tshimenga tshia Shekeme! Katuena ne bualu butudi banangile Abimeleke to.

²⁹ Nuenu bansungule meme Ngaale mfumu wa bena Shekeme, mvua mua kumusha Abimeleke mu bukalenga. Pashishe Ngaale kuela lubila ne: — Abimeleke, longolola bena mvita bebe bimpe, unduishe!

³⁰ Zebule, mulombodi wa tshimenga tshia Shekeme, umvua meyi avua Ngaale muambe, kufikaye munda.

³¹ Kutumaye bantu mu musokoku bua bambile Abimeleke ne: — Ngaale, muana wa Ebede, ne bana babu ba balume batshidi bafikilaku mu Shekeme, mbakujudile tshimvundu, batombuesha bena tshimenga.

³² Nanku butuku ebu, wewe ne bena mvita bebe, nuye kusokoma mu mpata.

³³ Patshiabu dinda, diba dipatuka, uye kuluisha bena tshimenga. Pikala Ngaale ne bantu badiye nabu bapatuke bua kukuluisha, neubenzele muudi musue.

³⁴ Nanku butuku, Abimeleke ne bena mvita bende bonsu, kuya kusokoma pabuipi ne Shekeme. Kutapulukabu mu bisumbu binayi.

³⁵ Diba divua Ngaale upatuka mu tshimenga bua kuimana pabuipi ne tshiibi, Abimeleke ne bena mvita bende kujuka muaba uvuabu basokome.

³⁶ Ngaale ubamona, kuambilaye Zebule ne: — Tangila bena mvita badi bapueka ku mukuna. Zebule kuandamuna ne: — To, ki mbantu nansha! Udi mumone mundidimbi wa mukuna bu bantu!

³⁷ Ngaale kumuambila kabidi ne: — Tangila! Mbantu menemene, badi bapueka pa kakuna ka pankatshi. Bantu bakuabu badi balonda njila wa ku mutshi wa lusanga lua benalubuku.

³⁸ Ke Zebule kuamba ne: — Malu onsu auvua wamba avua a dishima. Uvua wamba ne: “Abimeleke nnganyi mene bua tuetu kuikala ku bumfumu buende!” Mpindiewu Abimeleke udi ufika ne bantu bauvua upetula. Nanku uye kuluisha Abimeleke!

³⁹ Ngaale kupatuka mu tshimenga, bena Shekeme bamulonda. Kuluishabu Abimeleke.

⁴⁰ Abimeleke kunyemesha Ngaale, kumulondakaja. Bantu ba bungi bavua Ngaale nabu, bavua batapika mputa ya lufu, kabayi banji kufika ku tshiibi tshia tshimenga.

⁴¹ Ke Abimeleke kuya kusomba ku Aruma. Kadi Zebule kuipata Ngaale ne bana babu ba balume mu Shekeme. Kubakandikaye bua kabapinganyi kabidi mu tshimenga to.

⁴² Dituku divua dilonda, bena Shekeme kudilongolola bua kuya mu madimi. Bantu bakuabu kumanyisha Abimeleke bualu ebu.

⁴³ Nanku Abimeleke kutapulula bena mvita bende mu bisumbu bisatu. Kushalabu mu tshisuku, balamine. Abimeleke umona bena Shekeme bapatuka mu tshimenga, kuyaye lukasa bua kubaluisha.

⁴⁴ Abimeleke ne tshisumbu tshia bena mvita bavuaye nabu, kuya lukasa bua kuimana ku tshiibi tshia tshimenga. Bisumbu bikuabu bibidi bia bena mvita bende kuluisha bantu bavua mu madimi, kubashipa.

⁴⁵ Abimeleke kuluangana mvita dituku adi dijima. Kukuataye tshimenga, kushipa benatshi bonsu, kutshinyangakaja. Kumiaminaye luepu mu tshimenga atshi.

⁴⁶ Bena Migdale-Shekeme bumvue lumu alu, kudisangishabu bonsu mu tshibambalu tshivua muinshi mu nzubu wa Baale-Berite.

⁴⁷ Kumanyishabu Abimeleke muaba uvua bantu abu banyemena.

⁴⁸ Abimeleke kuya ku mukuna wa Salmone, ne bena mvita bende bonsu. Kuambulaye tshisuyi, kukosaye ditamba dia mutshi, kuditeka pa dikaya. Kutumaye diyi bua bena mvita bende benze kabidi amu nanku.

⁴⁹ Muntu yonsu wa kudibu kukosa ditamba dia mutshi, kulonda Abimeleke panyima. Kunguijabu matamba a mitshi awu pa mishiku ya tshibambalu tshivua muinshi mu nzubu wa Baale-Berite. Kuoshabu nzubu awu ne bantu bonsu bavuamu. Ke muvua bena Migdale-Shekeme bonsu bafua nanku, balume ne bakaji, bu bantu tshinunu.

Lufu lua Abimeleke

⁵⁰ Abimeleke kumuka muaba awu, kuya ku Tebese. Kusanganaye ne bena tshimenga atshi, kutshikuata.

⁵¹ Kadi munkatshi mua tshimenga atshi, muvua tshibumba tshibaka bimpe. Bantu bonsu, balume, bakaji ne balombodi, bavua banyemenamu, binjila tshiibi, babanda anu ku mutu kua tshibumba atshi.

⁵² Abimeleke kuluisha tshibumba atshi, kusemena ku tshiibi tshia ku tshibuelelu bua kuosha nzubu.

⁵³ Kadi mukaji kuela dibue dinene. Kutuutadi Abimeleke ku mutu. Kumupandadi kabalubalu ka mutu.

⁵⁴ Diakamue Abimeleke kubikila muana wa balume uvua muambule bia mvita biende. Kumuambilaye ne: — Angata muele webe, unshipe, bua bantu kabambi ne: muntu mukaji mmushipe Abimeleke. Muana wa balume awu kutua Abimeleke muele, kuabulukangana. Abimeleke kufua.

⁵⁵ Bena Izrayele bamone ne: Abimeleke mmumane kulua, kupinganabu muntu yonsu kuende.

⁵⁶ Ke muvua Mvidi Mukulu mufute Abimeleke, bua bubi buvuaye muenzele tatuende, mushipe bana babu ba balume makumi muanda mutekete.

⁵⁷ Mvidi Mukulu uvua munyoke kabidi bena Shekeme, bua lonji lukole luwabu nalu. Manyoka onsu avua Yotame, muana wa Yerubaale, muambile bena Shekeme, kukumbanawu.