Balombodi 8 - MUKANDA WA MYIDI MUKULU

Bena Efrayime badi bafika munda

¹ Bena Efrayime kukonka Ngideyone ne: — Udi mutuenze nenku bua tshinyi? Pauvua uya kuluisha bena Madiyane, kuena mutubikile petu bua tukuambuluishe bua tshinyi? Kutandishabu Ngideyone bikole.

² Kadi Ngideyone kubakonka ne: — Bualu bundi muenze mbupite bunudi nuenu benze anyi? Nuenu bena Efrayime, diambuluisha dienu, nansha diodi dia katupa, didi ne mushinga, ndipite ditshimuna dia bena diku dianyi, dia bena Abiyezere.

³ Nuenu ke bavua Mvidi Mukulu mupeshe mu bianza bakalenga ba bena Madiyane, Orebe ne Zebe. Meme tshiena muanji kuenza bualu bua mushindu ewu to. Diandamuna dia Ngideyone edi kutuyisha tshiji tshia bena Efrayime.

Ngideyone ku luseke ludi diba dipatukila lua Yardene

⁴ Ngideyone ne bena mvita bende nkama isatu, kufika ku Yardene, kusabuka. Bavua bapungile. Kadi kutungunukabu ne dilondakaja baluishi babu.

⁵ Kufikabu mu tshimenga tshia Sukote. Ngideyone kuambila bena tshimenga ne: — Nuabanyine bantu bandi muende nabu aba tukata tua mampa, bualu badi ne dipungi. Ndi ndondakaja bakalenga ba bena Madiyane Zeba ne Salmuna.

⁶ Bamfumu ba tshimenga kumuandamuna ne: — Tudi ne bua kupesha bena mvita bebe biakudia bua tshinyi? Udi mumane kukuata Zeba ne Salmuna anyi?

⁷ Ngideyone kubenga, wamba ne: — Pikala Maweja-Nangila mufile Zeba ne Salmuna mu bianza bianyi, nempande makoba enu ne meba, kabidi ne mingonga, bia mu tshipela.

⁸ Ngideyone kumuka mu tshimenga tshia Sukote. Kuyaye ku Penuyele. Kulombaye kabidi bena tshimenga atshi biakudia. Bena tshimenga kuandamuna anu mushindu uvuabu bandamuna kudi bena Sukote awu.

⁹ Ngideyone kubambila ne: — Meme mumane kutshimuna, mu dipingana dianyi, nengupule kaleya ka tshimenga tshienu etshi.

¹⁰ Zeba ne Salmuna bavua ku Karkore ne bena mvita babu, bavua bashale anu binunu dikumi ne bitanu. Ke bena mvita bavua bashale ba ku bantu balalakanyi bavua bafuma luseke ludi diba dipatukila. Bualu bena mvita bakuabu binunu lukama ne makumi abidi, bavua bamane kubashipa mu mvita.

¹¹ Ngideyone kulonda njila uvua bantu balalakanyi balonda luseke ludi diba dipatukila lua ku Noba ne ku Yogboka. Kuluishaye baluishi bende bavua bashala mu mitanda yabu, bela meji ne: tudi muaba mukole.

¹² Bakalenga babidi ba bena Madiyane, Zeba ne Salmuna, kunyema. Kadi Ngideyone kubalondakaja, kubakuata, kupampakaja bena mvita babu bonsu.

¹³ Pavua Ngideyone ufuma ku mvita, uvua mulonde njila wa ku mukuna wa Erese.

¹⁴ Kukuataye nsongalume wa mu Sukote, kumukonkaye mena a bamfumu bavua mu tshimenga. Muana awu kumufundila mena a bamfumu ne a bakulu bavuamu. Bonsu basanga bavua makumi muanda mutekete ne muanda mutekete.

¹⁵ Pashishe Ngideyone kuya kudi bena tshimenga tshia Sukote, ubambila ne: — Nuvuluke mushindu unuvua bampende, nunkonka ne: “Bena mvita bebe, nansha bobu bapungile, tudi mua kubapesha biakudia bua tshinyi? Kabidi Zeba ne Salmuna, ukadi mumane kubakuata anyi?” Nanku ndi munutuadile Zeba ne Salmuna.

¹⁶ Ngideyone kuangata meba ne mingonga bia mu tshipela, kukengesha nabi bakulu ba mu tshimenga tshia Sukote.

¹⁷ Kupulaye kabidi kaleya ka mu tshimenga tshia Penuyele. Kushipaye bena mu tshimenga atshi.

¹⁸ Pashishe Ngideyone kukonka Zeba ne Salmuna ne: — Bantu banuvua bashipe ku Tabore, bavua mushindu kaayi? Kumuandamunabu ne: — Bantu abu bavua bafuanangane nebe. Muntu yonsu wa kudibu uvua mufuanangane ne muana wa mukalenga!

¹⁹ Ngideyone kuela mbila ne: — Bivua bana betu, bana ba mamu mundedi. Nanku ndi nditshipa kudi Maweja-Nangila udi ne muoyi, bu nuenu kanuyi bashipe bana betu aba, meme kabidi tshivua mua kunushipa to!

²⁰ Ngideyone kutumina muanabute wende Yetere diyi ne: — Ndaku, ushipe bakalenga aba! Kadi nsongalume awu kavua ne dikima dia kubatapa muele to. Bu mutshivuaye muana mukese, uvua ne bowa.

²¹ Ke Zeba ne Salmuna kuambila Ngideyone ne: — Utushipe wewe muine. Bualu muntu mukole ke udi mua kukumbaja bualu ebu! Nanku Ngideyone kushipa bakalenga abu babidi. Kuangataye bilengejilu bivua mu nshingu mua tumelu tuabu.

Lufu lua Ngideyone

²² Malu awu mamane kupita, bena Izrayele kuambila Ngideyone ne: — Wikale mukalenga wetu. Pashishe muanebe ne muikuluebe nebapingane pa muaba webe. Bualu udi mutusungidile kudi bena Madiyane.

²³ Ngideyone kuandamuna ne: — Meme tshiena mua kuikala mukalenga wenu to, nansha muananyi kabidi. Anu Maweja-Nangila neikale mukalenga wenu.

²⁴ Ngideyone kuamba kabidi ne: — Kadi ndi musue kunulomba tshintu: muntu yonsu wa kunudi ampeshe kakanu ka ku bintu bivuaye muangate mu mvita. Bena Madiyane bavua bavuala tukanu tua tshiamu tshia mpawungi, bu muvua bantu bonsu ba mu tshipela batuvuala.

²⁵ Nanku bena Izrayele kuandamuna ne: — Netukupeshetu ne disanka. Bena Izrayele kuadija tshilamba panshi. Muntu yonsu kuelapu kakanu ka ku bintu biende bivuaye muangate mu mvita.

²⁶ Tukanu tuonsu tua mpawungi tuvua Ngideyone mulombe, tuvua ne bujitu bua kilo bu makumi abidi. Ngideyone kupeta kabidi bilengejilu bikuabu, tukanu tua ku matshi, bilamba bimpe bikunze, bivua bakalenga ba bena Madiyane bavuale, ne nkanu ya mu nshingu, ivuabu balengeja nayi tumelu tuabu.

²⁷ Ngideyone kuenza lupingu ne biamu bia mpawungi abi. Kulutekaye mu musoku wabu wa Ofra. Bena Izrayele kuya kuntendelela. Nanku lupingu alu kuenza buteyi kudi Ngideyone ne kudi bena diku diende.

²⁸ Kutuadija tshikondu atshi, bena Madiyane bavua anu ku bumfumu bua bena Izrayele kashidi. Kabatshivua kabidi ne bukole to. Ditunga kupeta ditalala bidimu makumi anayi, matuku onsu avua Ngideyone ne muoyi.

²⁹ Yerubaale, udibu binyika kabidi Ngideyone, muana wa Yowashe, kupingana ku nzubu kuende.

³⁰ Uvua ne bana ba balume makumi muanda mutekete, bualu uvua ne bakaji ba bungi.

³¹ Mukajende mukuabu uvuaye mubanjije ku Shekeme, uvua mulele muana wa balume. Ngideyone kumuinyika ne: Abimeleke.

³² Ngideyone mumane kukulakaja bimpe, kufuaye. Kumujikabu mu lukita lua tatuende Yowashe, mu Ofra, musoku wa bena diku dia Abiyezere.

³³ Ngideyone mumane kufua, bena Izrayele kupingana ku ditendelela dia mvidie Baale. Kutendelelabu mvidie Baale-Berite.

³⁴ Kupuabu Maweja-Nangila Mvidi Mukulu wabu muoyi, nansha Yeye mubasungidile kudi baluishi babu bonsu bavua nabu mutumba.

³⁵ Kabavua bavuluke kabidi bena diku dia Ngideyone, uvuabu binyika kabidi Yerubaale, nansha malu mimpe a bungi avuaye muenze bua kubapetesha diakalenga.