Balombodi 6 - MUKANDA WA MYIDI MUKULU

Bena Madiyane badi bakengehsa bena Izrayele

¹ Bena Izrayele kuenza kabidi malu mabi avua Maweja-Nangila mubenge. Nanku Maweja-Nangila kubafila mu bianza bia bena Madiyane bidimu muanda mutekete.

² Bena Madiyane kukengesha bena Izrayele bikole. Bua kunyema bena Madiyane, bena Izrayele kuya kusokoma mu milundu, mu njila ya mu mbuebue, ne mu miaba mikuabu ya mu mikuna mipulumuke.

³ Misangu yonsu ivua bena Izrayele bamane kukuna biakudia mu madimi, bavua bababunda mvita kudi bena Madiyane, bena Amaleke, ne kudi bantu balalakanyi bavua bafuma luseke ludi diba dipatukila.

⁴ Bantu aba, bavua basa mitanda yabu mu madimi a bena Izrayele, bua kunyangakaja biakudia mu madimi, too ne mu madimi awa pabuipi ne tshimenga tshia Ngaza. Kabavua bashila bena Izrayele tshintu tshia kudia. Kabavua babashila nansha mukoku, nansha ngombe, nansha mpunde.

⁵ Bantu aba, bavua benda ku muaba ne ku muaba, bafika ne bimuna biabu, kabidi ne ntenta yabu. Bivua benda mabumbu mabumbu bu mpasu. Nansha bobu, nansha tubalu tuabu, bivua bipite bungi, kakuyi udi mua kubibala. Kubutulabu ditunga, kudinyangakaja.

⁶ Bena Madiyane kukengesha bena Izrayele bikole. Bena Izrayele kubikila Maweja-Nangila bua abambuluishe.

⁷ Bena Izrayele bamane kulomba Maweja-Nangila, bua abasungidile kudi bena Madiyane,

⁸ Maweja-Nangila kubatumina muambi. Awu kubambila ne: — Maweja-Nangila Mvidi Mukulu wa bena Izrayele udi wamba ne: “Mvua munupatule mu ditunga dia Ejipitu munuvua mu bupika.

⁹ Meme kunusungidila kudi bena Ejipitu, ne kudi bantu bonsu bavua banukengesha. Meme kuipata baluishi benu, panuvua nuenda nubuela mu ditunga ku kakese ku kakese. Pashishe meme kunupa ditunga diabu.

¹⁰ Meme kunuvuluija ne: meme ndi Maweja-Nangila Mvidi Mukulu wenu. Kanuena mua kutendelela mvidie ya bena Amore, bena ditunga dinudi basombe. Kadi kanuena bitabe diyi dianyi to!”

Ngideyone udi usungidila bena Izrayele

¹¹ Mutumibue wa Maweja-Nangila kufika mu musoku wa Ofra. Kusombaye muinshi mua mutshi wa lusanga mu budimi bua Yowashe, muntu wa mu diku dia Abiyezere. Ngideyone, muana wa Yowashe, uvua ushipuila miepu ya ntete mu tshikaminu tshia maluvu a mvinyo, bua bena Madiyane kabamumonu to.

¹² Mutumibue wa Maweja-Nangila kumumuenekela, kumuambila ne: — Maweja-Nangila udi nebe, tshilobu tshia mvita!

¹³ Ngideyone kuandamuna ne: — Mukalenga wanyi, umfuile luse! Maweja-Nangila wikala netu, mutudi tupeta makenga onsu aa mbishi? Bishima bionsu bivua baledi betu batuambila bidi penyi? Bivua batulondela ne: Maweja-Nangila uvua mubapatule mu Ejipitu. Maweja-Nangila mmumane kutulekela bulelela. Mmumane kutufila mu bianza bia bena Madiyane.

¹⁴ Maweja-Nangila ukudimuka kudi Ngideyone, kumuambila ne: — Uye ne bukole buudi nabu ebu, usungidile bena Izrayele mu bianza bia bena Madiyane. Meme ndi nkutuma.

¹⁵ Ngideyone kuandamuna ne: — Maweja-Nangila, ndi nkusengelela ne: meme ndi mua kusungidila bena Izrayele mushindu kaayi? Ku meku onsu a mu tshisamba tshietu tshia Menashe, diku dianyi ndia bantu badi kabayi ne bukole nansha bukese. Kabidi meme ndi muana wa mukala mu nzubu muetu.

¹⁶ Ke Maweja-Nangila kumuambila ne: — Nengikale nebe. Nanku neushipe bena Madiyane, bu bikale amu muntu umue.

¹⁷ Ngideyone kuamba ne: — Pawikala munnange, umpeshe tshimanyinu tshidi tshijadika ne: ke wewe Maweja-Nangila udi wakula nanyi.

¹⁸ Kuena mua kumuka muaba ewu, amu meme mumane kupingana ne mulambu undi musue kukulambula. Maweja-Nangila kuandamuna ne: — Ndi amu muaba ewu, too ne pawapingana.

¹⁹ Ngideyone kuya, kulamba muana mbuji, ne mampa kaayi mela buanga, menza ne bukula kilo makumi asatu. Kutekaye munyinyi mu tshisaka, kuelaye nsupu mu luesu. Kuyaye nabi muinshi mua mutshi wa lusanga, kubipeshaye mutumibue wa Mvidi Mukulu.

²⁰ Mutumibue kuambila Ngideyone ne: — Uye kuteka munyinyi ne mampa pa lubuebue elu. Pashishe wela nsupu pa bintu abi. Ngideyone kukumbaja bionsu abi.

²¹ Pashishe mutumibue kuolola tshianza tshivua ne dikombu, kutuaye lusongu lua dikombu pa munyinyi ne mampa. Kapia kulakuka mu lubuebue, kuosha munyinyi ne mampa. Pashishe mutumibue awu kujimina.

²² Ngideyone kujadika ne: muntu awu uvua mutumibue wa Maweja-Nangila. Nanku kuelaye diyi ne: — Maweja-Nangila Mvidi Mukulu, ndi muena diakabi! Bualu ndi mumone mutumibue webe mpala ne mpala!

²³ Kadi, Maweja-Nangila kumuambila ne: — Wikale ne ditalala, kutshinyi, kuena ufua to!

²⁴ Ngideyone kuenzela Maweja-Nangila tshilambuilu muaba awu, kutshinyikaye ne: “Maweja-Nangila udi ufila ditalala.” Mpindiewu tshilambuilu atshi tshitshidi mu Ofra, musoku wa mu diku dia Abiyezere.

Ngideyone udi upula tshilambuilu tshia mvidie Baale

²⁵ Butuku abu, Maweja-Nangila kutumina Ngideyone diyi, umuambila ne: — Angata ngombe mulume wa tatuebe, ngombe muibidi, udi ne bidimu muanda mutekete. Upule tshilambuilu tshia mvidie Baale tshidi natshi tatuebe. Upule kabidi dikunji dia kutendelela mvidie didi diasa ku luseke lua tshilambuilu.

²⁶ Ku lusongu lua mukuna ewu, washilaku Maweja-Nangila Mvidi Mukulu webe tshilambuilu tshienza bimpe. Wangata ngombe mulume, umulambule bu mulambu wa kuosha. Kadi kapia kaudi osha naku mulambu awu, kikale ka nkunyi ya ku dikunji dia kutendelela mvidie diuvua muupule.

²⁷ Ngideyone kusungula bena mudimu bende dikumi, bua kuenzabu bionsu bivua Maweja-Nangila muambe. Kadi kuenzaye bionsu abi amu butuku, bualu uvua utshina kubienza mu munya, bualu bua bena diku diabu, ne bua bena musoku wabu.

²⁸ Mu dinda, bena musoku bamane kubika, kumonabu ne: tshilambuilu tshia mvidie Baale, ne dikunji dia kutendelela divua ku luseke, bavua babiupula. Bavua bamona kabidi muvuabu balambula, bosha ngombe mulume mujima pa tshilambuilu tshikuabu tshiasa tshipiatshipia.

²⁹ Bantu kukonkanangana ne: — Udi muenze nanku nnganyi? Bantu kuebejangana, kukeba, kujadika ne: Ngideyone, muana wa Yowashe, ke udi muenze nanku.

³⁰ Ke kuambilabu Yowashe ne: — Ufike ne muanebe apa, bua tumushipe, bualu mmupule tshilambuilu tshia Baale, ne dikunji dia kutendelela divua diasa ku luseke.

³¹ Yowashe kukonka bantu bonsu bavua bakungila ne: — Tshienu ntshia kusungidila Baale anyi, ntshia kumuluila mvita anyi? Muntu yonsu udi musue kusungidila Baale, nebamushipe malaba dinda. Pikala Baale Mvidi Mukulu, neudisungidile nkayende, bualu tshilambuilu tshivuabu bupule ntshiende!

³² Kutuadija tshikondu atshi, kuinyikabu Ngideyone dina dikuabu ne: Yerubaale — mmumue ne: Baale adisungidile nkayende — bu muvua Yowashe muambe ne: “Baale nkayende adisungidile, bualu tshilambuilu tshidibu bupule ntshiende!”

Ngideyone udi ulomba tshimanyinu kudi Mvidi Mukulu

³³ Bena Madiyane, bena Amaleke, ne bantu balalakanyi bavua bafuma luseke ludi diba dipatukila, kudisangisha, kusabuka Yardene. Kuasabu mitanda yabu mu mpata wa Yizreyele.

³⁴ Kadi Mueyelu wa Maweja-Nangila kutulukila Ngideyone. Awu kuela mpungi bua kubikila bantu ba mu diku dia Abiyezere bua bamulonde.

³⁵ Ngideyone kutuma bantu mu buloba bua Menashe buonsu. Kubikilaye bantu ba mu tshisamba atshi tshia Menashe bua kumulondabu. Kutumaye kabidi bantu bua kubikila bena bisamba ebi: tshia Ashere, tshia Zebulone ne tshia Naftali. Bantu bonsu abu kudisangisha ne Ngideyone.

³⁶ Ngideyone kuambila Mvidi Mukulu ne: — Uvua mumane kuamba ne: udi munsungule meme Ngideyone bua kusungidila bena Izrayele.

³⁷ Nanku ndi musue kuadija tshiseba tshia mukoku panshi, muaba udibu bashipuila ntete. Butuku ebu, pikala lumume lukuate anu ku tshiseba, buloba budi muaba awu bushale buume, ne njadike ne: udi munsungule bua meme kusungidila bena Izrayele, muuvua mumane kuamba.

³⁸ Kuenzekabi nanku. Butshia dinda, Ngideyone kuya kukama tshiseba. Kupatulaye lumume lupite bungi, lukumbane mua kuwuja dikopu tente.

³⁹ Ngideyone kuambila Mvidi Mukulu ne: — Kumfikidi munda to. Ndi musue kukulomba kabidi tshintu musangu wa ndekelu. Ndi musue kumona kabidi tshimanyinu anu ne tshiseba. Mpindiewu, tshiseba nkayatshi tshikale tshiume, lumume luikale pa buloba buonsu budi muaba awu!

⁴⁰ Butuku abu, Mvidi Mukulu kukumbaja bionsu bivua Ngideyone mulombe: tshiseba nkayatshi kushala tshiume, kadi buloba buonsu buvua muaba awu buvua bubolesha kudi lumume.