Balombodi 5 - MUKANDA WA MYIDI MUKULU

Debora udi wimba musambu

¹ Dituku adi, Debora ne Barake muana wa Abinoyame, kuimbabu musambu ewu

² Mu Izrayele, muntu yonsu mmusulule nsuki yende. Bena Izrayele mbadifile ku mvita: Nuele Maweja-Nangila tuasakidila!

³ Nuenu bakalenga, nuenu balombodi, telejayi bimpe! Ndi musue kuimba musambu, ntumbisha Maweja-Nangila, Mvidi Mukulu wa Izrayele.

⁴ Maweja-Nangila kumuka mu ditunga dia Edome, kupueka ku mikuna ya Seyire. Buloba kuzakala, mavuba kuenguluka mayi, mvula wa mudimbi kuloka.

⁵ Mikuna minene kuzakala kumpala kuebe wewe, Maweja-Nangila wa ku mukuna wa Sinayi, Mvidi Mukulu wa Izrayele.

⁶ Tshikondu tshia Shamgare, muana wa Anate, tshikondu tshia Yayele, misumba ya bena luendu kunyema ditunga, bena luendu kulonda njila ya ku mpenga.

⁷ Kakuvua bantu bavua ne bumfumu to. Kakuvua balombodi mu ditunga dia bena Izrayele, too ne pangakamueneka meme Debora, meme mamu wa bena Izrayele.

⁸ Bantu bavua basungula mvidie mipiamipia. Katupa kiipi, mvita kutuadija. Kadi bivua bikole bua kupeta ngabu wa mvita, nansha difuma, bua bena Izrayele binunu makumi anayi.

⁹ Mwoyi wanyi udi kudi balombodi ba bena Izrayele, kudi bantu badi badifila nkayabu ku mvita. Elayi Maweja-Nangila tuasakidila!

¹⁰ Nuenu badi babanda pa mpunde, pa mpunde mikaji ya mubidi mutoke, nuenu badi basomba pa biata, nuenu badi bendakana mu njila, buambayi penu tumone.

¹¹ Pabuipi ne miaba ivua bimuna binuina mayi, bonsu bavua babanya mayi, bavua batumbisha Maweja-Nangila, bua bilenga bidiye muenzele bamfumu ba bena Izrayele, tshikondu tshi wa bena Izrayele badilongolola ku mvita, bimane ku biibi bia tshimenga.

¹² Debora, jukaku panshi, utuambuluishe. Katamuka, utume musambu wa mvita. Barake, muana wa Abinoyame, juka, kuata bantu mu lukanu, utulejebu!

¹³ Bivua bashala ne muoyi, kutua ku tshia bamfumu. Tshisamba tshia Maweja-Nangila ntshidisange kudiye, bu bilobu.

¹⁴ Bivua batshimuna bena Amaleke, mbafumine ku Efrayime. Bena Binyamine kubalonda. Kubuelakanabu ne bena mvita ba bena Efrayime. Diku dia Makire kufila bamfumu. Tshisamba tshia Zebulone kufila balombodi.

¹⁵ Bamfumu ba Isakare kudisangisha ne Debora. Isakare uvua pa diyi dia Barake, kumulonda panyima lukasa mu mpata. Kadi bena meku a Rubene, kuelangana mpata kashidi.

¹⁶ Bua tshinyi nudi bashale pabuipi ne mpangu, bua kuteleja mudi balami babikila bimuna biabu? Eyowa, bena meku a Rubene kuelangana mpata kashidi.

¹⁷ Bisamba bivua mu Ngilaade, luseke ludi diba dipatukila lua Yardene, ki mbiumuke to. Bena Dane kushala ku matu abu. Bena Ashere kusomba ku muelelu wa mayi, pabuipi ne bisabu biabu.

¹⁸ Kadi bena Zebulone, ne bena Naftali, ki mbatshine njiwu ya lufu, mbanyishe mua kufuila mu mvita.

¹⁹ Bakalenga baluishi, bakalenga ba bena Kenaane, kutuadija kuluisha Tanake, pabuipi ne mpokolu ya mu Megido. Kadi, kabena bapeta tshintu, nansha nkanu mitoke ya mushinga mukole.

²⁰ Mu diulu, mitotu kutuambuluisha mu mvita. Pa wayi ilonda njila wayi, ivua iluisha Sisra.

²¹ Musulu udi upueka bidimu ne bidimu, musulu wa Kishone, kubutula baluishi. Tuyayi mu mvita ne dikima!

²² Nyama ya tubalu kupita, yenda itupika, idiatakaja buloba ne bikonu biayi.

²³ Nutshipe tshimenga tshia Meroze, ke mudi mutumibue wa Maweja-Nangila wamba. Nutshipe tshimenga atshi, nutshipe ne benatshi, bualu kabena bambuluisha Maweja-Nangila to, kabena baluangana mvita pamue ne bilobu biende to.

²⁴ Yayele, mukaji wa Ebere, muena Kayine, bamuele lupemba munkatshi mua bakaji bonsu. Eyowa, bele Yayele lupemba, munkatshi mua bakaji bonsu badi basomba mu ntenta.

²⁵ Sisra kulomba Yayele mayi a kunua, Yayele kumupesha mabele, mabele mimpe a mafuta mu dikopu dia mushinga mukole.

²⁶ Pashishe, Yayele kubakula mulonda mu tshianza, kukuata ngindu wa muena ditanda mu tshikuabu. Yayele kutuuta Sisra, kumupanda lubombu, kumutubuluja mutu ne mulonda.

²⁷ Sisra kudishinda kumpala kua Yayele, kushalaye mutandabale panshi ku makasa ende. Sisra kudishinda, kupona panshi, kufua kashidi.

²⁸ Mamuende wa Sisra kutangidila pa dididishi, kudilaye, mutangidile pa tukanu: “Tshidi tshimanyika ditempu diende dia mvita ntshinyi? Mudiye ujingakana, kayi ufika lukasa, mmunyi?”

²⁹ Mamuende wa Sisra kuambulula, kayi upungila, bivua bakaji nende ba meji bamuambile ne:

³⁰ “Bena mvita mbapawule bintu bulelela, bakadi babanyangana bivuabu bapete: muena mvita yonsu mmupete nsongakaji, mulengele, umue nansha babidi mene. Sisra mmupete bilamba bilaba kakula, bizola mekala. Eyowa, mmupete tshilamba tshilengeja ne buanda bua mekala a mishindu ibidi, tshia kuela mu nshingu mua muntu udi utshimuna.”

³¹ Maweja-Nangila, baluishi bebe bonsu, bafue muvua Sisra mushiye panu. Kadi balunda bebe bikale bu diba, patshididi dipatuka ne bukenka, ne nsese yadi yonsu! Ke muvua ditunga dianji kushala mu ditalala bidimu makumi anayi nanku.