Balombodi 21 - MUKANDA WA MYIDI MUKULU

Bena Binyamine badi bafululuka

¹ Pavua bena Izrayele badisangisha ku Mispa, bavua baditshipa bua muntu nansha umue wa kudibu, kaseleshi muanende wa bakaji kudi muntu wa bena Binyamine to.

² Kadi mpindiewu, bena Izrayele kuya ku Betele. Kusombabu kumpala kua Maweja-Nangila too ne ku dilolu. Kunyingalalabu, badila bikole,

³ bakonka ne: — Maweja-Nangila Mvidi Mukulu wa bena Izrayele, tudi tukenga nanku bua tshinyi? Mpindiewu, tshisamba tshikuabu tshia bena Izrayele tshidi tshibutuka kashidi bua tshinyi?

⁴ Butshia dinda, bena Izrayele kuasa tshilambuilu muaba awu. Kulambulabu milambu ya kuosha, ne ya bobumue.

⁵ Pashishe bena Izrayele kukonkangana ne: — Ku bisamba bionsu bia bena Izrayele, kudi tshisamba tshidi katshiyi tshifike mu tshisangilu tshituvua natshi mu Mispa kumpala kua Maweja-Nangila anyi? Bualu bena Izrayele bavua bamane kuditshipa bua kushipa muntu yonsu uvua kayi mufike ku Mispa.

⁶ Luseke lukuabu bavua bumvue luse bua dikenga dia bana babu bena Binyamine. Kuambabu ne: — Lelu tshisamba tshikuabu tshia bena Izrayele tshidi tshifuana kubutuka.

⁷ Kadi bua bena Binyamine, badi bashale ne muoyi aba, kupeta bakaji, netuenze tshinyi? Bualu tuvua bamane kuditshipa kumpala kua Maweja-Nangila bua katuseleshi bana betu ba bakaji kudi bena Binyamine to.

⁸ Bena Izrayele kuebejangana bua kumanya bantu ba munkatshi mua bisamba bia bena Izrayele, bavua kabayi bafike ku Mispa bua kudileja kumpala kua Maweja-Nangila. Kusanganabu ne: kakuvua muntu nansha umue wa mu tshimenga tshia Yabeshe mu Ngilaade. uvua mufike mu mitanda, muaba uvua tshisangilu atshi.

⁹ Bualu pavuabu babadike bantu bavua mu tshisangilu, muntu wa mu Yabeshe nansha umue kena muitabe to.

¹⁰ Bantu bavua mu tshisangilu kutuma bantu binunu dikumi ne bibidi bavua ne bukitu ku Yabeshe, babambila ne: — Nuye kushipa bena Yabeshe mu Ngilaade. Nushipe too ne bakaji ne bana.

¹¹ Nushipe bantu balume bonsu ba mu tshimenga, ne bakaji badi bamane kumanya balume. Ke tshinudi mua kuenza.

¹² Munkatshi mua bena Yabeshe, kusanganabu bana ba bakaji nkama inayi, bavua kabayi banji kumanya balume. Kuyabu nabu mu mitanda ya mu Silo, mu ditunga dia Kenaane.

¹³ Pashishe bantu bavua mu tshisangilu, kutumabu bantu bua kuambila bena Binyamine, bavua basokome mu lubuebue lua Rimone, ne: tumwanganayi, tutue ndondu.

¹⁴ Ke bena Binyamine kupingana diakamue kuabu. Kubapeshabu bakaji bavuabu kabayi bashipe mu Yabeshe. Kadi bakaji abu, kabavua bungi bukumbane bua bantu bonsu to.

¹⁵ Bena Izrayele kumvua luse bua bena Binyamine, bualu Maweja-Nangila uvua mubutule tshimue tshia ku bisamba bia bena Izrayele.

¹⁶ Balombodi ba tshisangilu kuamba ne: — Kakutshiena bakaji mu tshisamba tshia bena Binyamine to. Kadi bena Binyamine badi kabayi bafhe mu mvita, bua kupetabu bakaji netuenze tshinyi?

¹⁷ Mbimpe bua bena Binyamine badi kabayi bafue mu mvita, balelangane, bua tshisamba atshi tshia bena Izrayele katshibutuku kashidi to.

¹⁸ Kadi katuena mua kuitaba bua bena Binyamine basele bana betu ba bakaji to. Bualu tuvua bamane kuditshipa ne: muena Izrayele yonsu udi uselesha muanende wa bakaji kudi muena Binyamine, neikale ne diakabi.

¹⁹ Bena Izrayele kuvuluka ne: tshibilu tshia Maweja-Nangila tshia ku tshidimu tshionsu ku Silo, tshidi pabuipi. Silo ntshimenga tshivua ku mutu kua Betele, kuinshi kua Lebona, luseke ludi diba dipatukila lua njila udi mumuke ku Betele muye ku Shekeme.

²⁰ Bena Izrayele kupesha bena Binyamine meji ne: — Nuye kusokoma mu madimi a mionji ya mvinyo.

²¹ Nushale batentekela. Pikala nsongakaji ya mu Silo nupatuke bua kuja maja, nuenu nupatuke mu madimi a mionji ya mvi-nyo. Muntu yonsu wa kunudi neakuate nsongakaji, aye nende mu buloba bua Binyamine bua nsongakaji awu ashale mukajende.

²² Pikala batatuabu nansha bana babu ba balume batudidila, netubambile ne: “Tudi tunusengelela bua nufuileku bena Binyamine luse. Bualu mu mvita ya mu Yabeshe, katuena bakuatshile muntu yonsu wa kudibu mukaji to. Kadi bu munudi kanuyi babapesha bana benu ba bakaji, nanku kanuena banyange mitshipu yenu to.”

²³ Bena Binyamine kuitaba lungenyi alu. Kukuatabu nsongakaji bungi bubakumbanyine munkatshi mua bana ba bakaji bavua baja maja ku Silo, kuyabu nabu. Kupinganabu mu tshitupa tshiabu tshia buloba. Kuasululabu bimenga biabu, kusombabu.

²⁴ Bena Izrayele bakuabu bavua mu tshisangilu, kutangalaka. Muntu yonsu kuya mu tshisamba tshiabu, ne mu diku diabu; kuya kusomba mu tshiende tshitupa tshia buloba.

²⁵ Tshikondu atshi, bena Izrayele kabavua ne mukalenga to. Muntu yonsu uvua wenza anu mudiye musue.