Balombodi 2 - MUKANDA WA MYIDI MUKULU

Maweja-Nangila udi utandisha bantu bende

¹ Mutumibue wa Maweja-Nangila kumuka ku Ngilgale, kuya ku Bokime. Kuambilaye bena Izrayele ne: — Mvua munupatule mu Ejipitu, munufikishe mu ditunga edi, dimvua mulaye bankambua benu, muditshipe. Mvua muambe ne: kashidi tshiena mua kunyanga ndondu wanyi undi mutue nenu to.

² Kadi mvua munukandike bua kanutu ndondu ne bena ditunga edi, munulombe kabidi bua nuupule bilambuilu biabu. Kadi kanuena bangitabe to. Nuvua benze nanku bua tshinyi?

³ Nanku ndi nnujadikila ne: tshiena ngipata bena ditunga edi kumpala kuenu to. Bena ditunga edi nebanuteye mu buteyi, nudishindamu, nutendelela mvidie yabu.

⁴ Mutumibue wa Maweja-Nangila mumane kuambila bena Izrayele malu aa, bena Izrayele kutuadija kudila bonsu.

⁵ Kuinyikabu muaba awu dina ne: Bokime, mmumue ne: “Badidi ba Miadi.” Pashishe bena Izrayele kulambula Maweja-Nangila milambu muaba awu.

Lufu lua Yoshuwa

⁶ Yoshuwa mumane kutangalaja bantu bonsu, bena Izrayele kuya bonsu mu buloba buvuabu bababanyine. Ke muvua bena Izrayele bakuata ditunga nanku.

⁷ Bena Izrayele bavua benzela Mvidi Mukulu mudimu, matuku onsu atshivua Yoshuwa ne muoyi, ne panyima pa lufu luende kabidi, matuku onsu avua bakulu, bavua bamone malu a dikema onsu avua Maweja-Nangila muenzele bena Izrayele, batshikale ne muoyi.

⁸ Yoshuwa, muana wa Nune, muntu wa Maweja-Nangila, kufua muikale ne bidimu lukama ne dikumi.

⁹ Kumujikabu mu Timnate-Erese, muaba uvuabu bamupeshe, luseke lua mikuna ya Efrayime, ku mutu kua mukuna wa Ngashe.

¹⁰ Pashishe bantu bonsu ba tshikondu tshia Yoshuwa kufua. Ndelanganyi yonsu ivua ilonda, kayivua mimanye Maweja-Nangila bimpe, kabidi kayivua mimanye bionsu bivuaye muenzele bena Izrayele.

Bantu badi babenga Maweja-Nangila

¹¹ Bena Izrayele kuenza malu avua Maweja-Nangila ubenga. Kutuadijabu kutendelela mvidie Baale.

¹² Kubengabu Maweja-Nangila Mvidi Mukulu wa bankambua babu, uvua mubapatule mu Ejipitu. Kutendelelabu mvidie ya bantu ba bisamba bikuabu bavua basomba munkatshi muabu. Kudielabu panshi kumpala kua mvidie ayi. Ke muvuabu bafikishe Maweja-Nangila munda.

¹³ Ke bena Izrayele kubenga Maweja-Nangila, bua kuya kutendelela mvidie Baale ne Astarte.

¹⁴ Maweja-Nangila kufikila bena Izrayele munda. Kavua ubambuluisha kabidi to. Ke muvua bena buenzayi biba bintu bia bena Izrayele bionsu. Maweja-Nangila kufila bena Izrayele mu bianza bia baluishi bavua nabu mutumba. Bena Izrayele kabavua ne mushindu wa kutuila baluishi babu nkanana to.

¹⁵ Misangu yonsu ivua bena Izrayele baya mu mvita, Maweja-Nangila kubapangisha bukole, bu muvuaye mumane kuamba, kabidi muditshipe. Bena Izrayele, dikenga kubapita bunene.

¹⁶ Diba adi, Maweja-Nangila kusungula Balombodi, bua kulombolabu bena Izrayele. Nanku balombodi abu kusungidila bena Izrayele mu bianza bia bena tshinyangu.

¹⁷ Kadi bena Izrayele kabavua batumikila balombodi abu to. Bavua amu batendelela mvidie ya bantu benyi, bayifuila mpala panshi. Bena Izrayele bavua bumuka lukasa mu njila uvua bankambua babu balonda. Bankambua bavua batumikila mikenji ya Maweja-Nangila, kadi bena Izrayele kabavua bidikija bankambua babu to.

¹⁸ Misangu yonsu ivua Maweja-Nangila utumina bena Izrayele mulombodi, Maweja-Nangila nkayende uvua ku luseke lua mulombodi awu. Nanku Maweja-Nangila ke uvua usungidila bena Izrayele mu bianza bia baluishi, matuku onsu avua mulombodi awu ne muoyi. Maweja-Nangila uvua ufuila bena Izrayele luse, pavua-bu badila, banyingalala bua mushindu uvuabu babakengesha kudi baluishi babu.

¹⁹ Kadi pavua mulombodi awu ufua, bena Izrayele bavua babenga tshiakabidi Maweja-Nangila, bipite too ne pa bankambua babu. Bavua anu batendelela mvidie ya bantu benyi, badiela panshi kumpala kuayi bua kuyitendelela. Kabavua balekela buenzayi buabu, nansha tshitunu tshiyuabu natshi.

Maweja-Nangila udi uleja bena Izrayele mudi panu

²⁰ Maweja-Nangila kufikila bena Izrayele munda, kuamba ne: — Bantu ba mu tshisamba etshi, mbanyangakaje ndondu umvua muambile bankambua babu bua kumunemeka. Kabena bantumikila to.

²¹ Meme tshitshiena mua kubipatshila muntu nansha umue wa mu bisamba bivua Yoshuwa mushiye pakafuaye.

²² Nengangate bisamba ebi, bua meme kujadika nabi ne: bena Izrayele mbasue kuntumikila, muvua bankambua babu benza, anyi mbabenge mua kuenza tshindi musue.

²³ Nanku bisamba bionsu bivua Maweja-Nangila kayi mufile mu bianza bia Yoshuwa, kushalabi mu ditunga adi. Maweja-Nangila kena mubipate lukasa to.