Balombodi 19 - MUKANDA WA MYIDI MUKULU

Buenzayi bua bena Binyamine mu Ngibeya

¹ Tshikondu tshivua bena Izrayele kabayi banji kupeta mukalenga, muena Levi mukuabu uvua musombele ku luseke, mu buloba bua mikuna bua Efrayime. Muena Levi awu, uvua mubanjije mukaji mukuabu wa mu Beteleyeme, mu Yuda.

² Mukaji awu kutanda ne bayende, kunyema, kupingana ku Betleyeme kuvua tatuende. Kushalaye ku Betleyeme ngondu inayi.

³ Bayende kumulonda, musue kumusengelela bua apingane kumbelu. Uvua muye ku ba mukajende ne muena mudimu wende, kabidi ne nyama ya mpunde ibidi. Nsongakaji kubueja bayende mu nzubu mua tatuende. Tatuende wa mukaji umona muku wende, kumuakidila ne disanka.

⁴ Kumulamaye ku nzubu kuende matuku asatu. Muena Levi awu ne muena mudimu wende kudia, kunua, kulala ku nzubu aku.

⁵ Dituku dinayi, kujukabu diba dimpe. Muena Levi mumane kudilongolola bua kupingana kuende, tatuende muenu kumuambila ne: — Wanji kudia, bua upete bukole, pashishe nenuye.

⁶ Nanku bantu babidi abu kusomba ku mesa, kudia, kunua. Tatuende muenu wa muena Levi kumuambila ne: — Anji kuindila kabidi kakese. Witabe bua kulala muaba ewu lelu.

⁷ Muena Levi uvua musue kuya. Kadi tatuende muenu kumusengelela bikole. Muena Levi kuitaba, kulala kabidi kua tatuende muenu.

⁸ Dituku ditanu muena Levi kubika diba dimpe bua kupingana kuende. Tatuende muenu kumuambila ne: — Anji kudia; nenuye dilolu. Nanku kudiabu bonsu pamue.

⁹ Kadi pavua muena Levi musue kupingana, ne mukajende, ne muena mudimu wende, tatuende muenu kumuambila ne: — Teleja, diba ndimane kupita, butuku mbumane kuila. Nulale, nuikishe kabidi kakese. Maloba nenujuke ne dinda bua kupingana kuebe.

¹⁰ Kadi muena Levi kena muitabe bua kulala kabidi to. Kumataye mu njila ne mukajende, ne nyama ya mpunde ibidi, mimane kusuika biseba bua kusomba. Kufikabu ku Yebusa, mmumue ne ku Yerushalayime.

¹¹ Muena Levi ne bavuaye nabu, kufika pabuipi ne tshimenga, kukavua dilolu. Muena mudimu wende kumuambila ne: — Tuyayi ku tshimenga tshia bena Yebusa bua kulalamu.

¹² Mfumuende, muena Levi, kubenga, wamba ne: — Nansha kakese, katuena mua kuya mu tshimenga tshia bantu benyi, mudi kamuyi bena Izrayele to. Tutungunuke ne luendu too ne ku Ngibeya.

¹³ Muena levi kuamba kabidi ne: — Tukoleshe luendu, tufike ku Ngibeya, nansha ku Rama, bua tulale mu tshimue tshia ku bimenga ebi.

¹⁴ Nanku kutungunukabu ne luendu. Bafike pabuipi ne Ngibeya, mu buloba bua Binyamine, diba kubuela.

¹⁵ Kuyabu mu Ngibeya bua kulala. Kubuelabu mu tshimenga, kusombabu muaba udi bantu basombele. Kadi muntu kena mubakidile, muye nabu kuende bua kulalabu to.

¹⁶ Dilolu adi, mukulumpe mukuabu uvua ufuma ku budimi, kufikaye muaba awu. Uvua wa ku buloba bua mikuna bua Efrayime. Kadi uvua musombele mu Ngibeya, tshimenga tshia bena Binyamine.

¹⁷ Mukulumpe awu kumona muntu muenyi musombe muaba awu. Kukonkaye muenyi awu ne: — Udi ufuma penyi? Uyaya kunyi?

¹⁸ Muena Levi kuandamuna ne: — Tudi tufuma ku Betleyeme, mu ditunga dia Yuda. Mpindiewu tudi tupingana kuetu, musoku udi ku luseke, mu buloba bua mikuna bua Efrayime. Ke muaba undi musombele. Ndi nya kuanyi, mfumina ku Betleyeme. Kadi muntu kena mumbikile bua kuya kulala kuende to.

¹⁹ Tuetu tudi ne bisosa ne miji bua kudisha nyama yetu ya mpunde. Tudi kabidi ne mampa ne maluvu a mvinyo buanyi meme, bua mukajanyi, ne bua muena mudimu wanyi. Katuena tukengela biakudia to.

²⁰ Mukulumpe awu kuandamuna muena Levi ne: — Udi mufike mu nzubu muenu. Meme nenkuambuluishe ne tshintu tshionsu tshiudi kuyi natshi. Kuena mua kulala muaba ewu to!

²¹ Kuyaye nabu kuende. Kupeshaye nyama ya mpunde biakudia. Benyi abu kuowa mayi ku makasa, kudia, kunua.

²² Kadi pavua benyi abu badia, basanka mu nzubu, bena buenzayi ba mu Ngibeya kunyungulula nzubu awu, kukokola ku tshiibi. Kuambilabu mukulumpe muena nzubu ne: — Patula muntu mulume uudi muakidile kuebe eku. Tudi basue ikale mukajetu.

²³ Mukulumpe awu kupatuka, kuambila bena buenzayi abu ne: — Bana betu, ndi nnusengelela, kanuenji bualu bubi bua mushindu ewu to. Kanuenji bualu ebu to. Bualu muntu ewu mmuenyi wanyi.

²⁴ Telejayi, ndi ne muananyi, nsongakaji udi kayi muanji kumanya balume. Kabidi muena Levi ewu, udi ne mukajende mukuabu. Ndi musue kunupa bakaji abu, nuenze nabu munudi basue. Kadi kanuenzedi muena Levi ewu bualu bubi to.

²⁵ Bena buenzavi abu kabavua basue kuteleja bionsu abi to. Nanku muena Levi kubapatuila mukajende pa mbelu. Kumukuatabu ku bukole. Kushalabu nende butuku bujima. Kumulekelabu anu pa kabundubundu.

²⁶ Patshiatshia, mukaji awu kuya kudishinda mu mushiku wa mbelu wa nzubu wa mukulumpe awu, muaba uvua bayende mulale. Mukaji kushala muaba awu too ne mutshile butuku.

²⁷ Mu dinda, bayende wa mukaji unzulula tshiibi tshia ku nzubu, kupatukaye bua kutungunuka ne luendu. Kusanganaye mukajende panshi mu mushiku wa mbelu wa nzubu, bianza biolola mu mushiku wa mbelu.

²⁸ Muena Levi kuambila mukajende ne: — Juka, tuye! Kadi mukaji kena muandamune to. Ke muena Levi kuambula tshitalu tshia mukajende pa nyama wa mpunde, kuya kuende.

²⁹ Muena Levi ufika kuende, kuangataye muele, kukosololaye tshitalu tshia muena kuende mabulu dikumi ne abidi. Kutuminaye tshisamba tshionsu tshia bena Izrayele, dibulu ku tshisamba, dibulu ku tshisamba.

³⁰ Bonsu bavua bamone bualu ebu, kukemabu, bamba ne: — Katshia bena Izrayele bapatuke mu Ejipitu, katuena banji kumona benza bualu bua mushindu ewu to. Mbimpe tulondeshe bualu ebu, tukonkangane, tukebe tshitudi mua kuenza.