Balombodi 18 - MUKANDA WA MYIDI MUKULU

Bena Dane badi bumuka mu buloba buabu

¹ Tshikondu atshi bena Izrayele kabavua ne mukalenga to. Tshisamba tshia bena Dane tshivua tshikeba muaba wa kuasa. Bualu ku bisamba bionsu bia bena Izrayele, bena Dane kabavua banji kupeta muaba wa kuasa to.

² Nanku bena Dane kusungula munkatshi muabu bantu balume batanu bavua ne dikima. Bantu abu bavua bumukila mu bimenga bia Sora ne Eshetayole, bua kuya kutentekela ditunga bimpe. Bantu balume abu kufika mu buloba bua mikuna ya Efrayime. Kuimanabu pabuipi ne kua Mika.

³ Pavuabu muaba awu, kumvuabu nsongalume wa bena Levi wakula. Kumanyabu tshiakuidi tshiende. Kuyabu kukonka nsongalume awu ne: — Udi mukubikile muaba ewu nnganyi? Udi wenza tshinyi? Tshiudi musombele muaba ewu ntshinyi?

⁴ Nsongalume kuandamuna ne: — Mika uvua musue kundama. Udi umfuta bua ngikale mutuangaji wende.

⁵ Kumuandamunabu ne: — Nanku, ebeja Mvidi Mukulu. Tudi basue kumanya ne: luendu luetu elu nebikale luimpe anyi?

⁶ Mutuangaji kubambila ne: — Kanutshinyi to! Maweja-Nangila udi nenu mu luendu elu.

⁷ Bantu batanu abu kutungunuka ne luendu, too ne ku Layishe. Kusanganabumu bantu bonsu basomba ne ditalala, anu bu bena Sidone. Kakuvua muntu nansha umue uvua mubenge mfumu wa buloba abu to. Bena Layishe bavua mutantshi mule ne bena Sidone. Kabavua ku diyi dia muntu mukuabu to.

⁸ Bantu ba bena Dane bavuabu batume abu, kupinganabu ku Sora ne ku Eshetayole. Bana babu kubakonka mushindu uvua luendu.

⁹ Kuandamunabu ne: — Jukayi, tuye kuluisha bena Layishe. Tudi bamone ne: buloba buabu budi buimpe butambe. Kanushadi basombe amu tshianana to. Jukayi lukasa, nuye kukuata buloba ebu!

¹⁰ Panuafikamu, nenusangane bantu abu kabayi badimuke to. Mbase mu buloba bualabale. Mvidi Mukulu neafile buloba abu mu bianza bienu. Kabidi bintu bilenga bionsu bia panshi pa buloba bidi mu buloba abu.

¹¹ Nanku bena mvita nkama isambombu ba bena Dane, bavua ne bia mvita mu bianza, kumuka mu Sora ne mu Eshetayole.

¹² Kuyabu kuasa mitanda yabu luseke ludi diba dibuelela lua Kiriyate-Yeyarime, mu ditunga dia bena Yuda. Ke padibu binyika muaba awu too ne mpindiewu ne: Makane-Dane, mmumue ne: mitanda ya Dane.

¹³ Bena mvita abu kumuka muaba awu, kuya mu buloba bua mikuna ya Efrayime. Kufikabu pabuipi ne nzubu wa Mika.

¹⁴ Bena mvita batanu bavwa bamane kutentekela buloba bua Layishe, kuambilabu balunda babu ne: — Numanye ne: ku nzubu eyi, kudi nzubu mukuabu muikale ne lupingu, ne bintu bia kubuka nabi. Mudi kabidi lupingu lukuabu lua tshiamu tshienguluke. Nuenu nkayenu nujadike tshinudi ne bua kuenza.

¹⁵ Ke bantu batanu abu kuya ku nzubu wa Mika. Kubuelabu mu nzubu muvua nsongalume wa bena Levi, kumuelabu muoyi.

¹⁶ Diba adi bena Dane nkama isambombu, bavua ne bia mvita mu bianza, bavua bimane mu mushiku wa mbelu wa nzubu awu.

¹⁷ Bantu batanu bavua bamane kutentekela ditunga abu bamane kubuela mu nzubu, kuambulabu mpingu yonsu ivuamu, kabidi ne bintu bia kubuka nabi, ne lupingu lua tshiamu tshienguluke. Mutuangaji uvua muimane mu mushiku wa mbelu pamue ne bena mvita nkama isambombu.

¹⁸ Mutuangaji umona bantu babuela mu nzubu wa Mika, bambula mpingu ne bintu bia kubuka nabi, kubakonkaye ne: — Tshinudi nuenza mu nzubu emu ntshinyi?

¹⁹ Bena mvita kumuandamuna ne: — Puwa, buikila mukana! Uye netu, bua wikale mutuangaji mu tshisamba tshietu. Udi musue kuikala mutuangaji wa muntu umue, anyi wa tshisamba tshijima tshia bena Izrayele?

²⁰ Mutuangaji kusanka bikole bua meji awu. Kuambulaye mpingu, ne bintu bia kubuka nabi, kudisangaye ne bena mvita.

²¹ Bena Dane kutungunuka ne luendu, bamane kupitshisha bana, bimuna ne mabuki kumpala kuabu.

²² Bena mvita bakavua mutantshi mule ne nzubu wa Mika, ke Mika ne bena mutumba nende, kudisangisha bua kubalondakaja.

²³ Kuelabu bena Dane bibingu. Bena Dane kukudimuka kudi Mika, kumukonka ne: — Tshidi tshikutonda ntshinyi? Udi utulonda ne bantu bungi nenku bua tshinyi?

²⁴ Mika kuandamuna ne: — Nudi bangate mvidie yanyi imvua mudienzele. Kabidi nudi bakuate mutuangaji wanyi. Tshiena mushale ne tshintu to. Kadi nudi nunkonka tshidi tshintonda bishi?

²⁵ Bena mvita kuandamuna ne: — Buikila mukana! Bana betu bakuabu badi mua kufika munda, kukuluisha. Nanku neudikebele lufu, wewe ne bena nzubu webe!

²⁶ Ke bena mvita kutungunuka ne luendu. Mika umona ne: bena mvita abu badi ne bukole bua bungi, kupinganaye ku nzubu kuende!

Muaba wa tshijila mu tshimenga tshia Dane

²⁷ Bena Dane kuangata bintu bivua Mika mudienzele. Kuyabu kabidi ne mutuangaji wa Mika uvua umuenzela mudimu. Bena Dane kuya kuluisha bena Layishe. Kushipabu bantu bavua mu tshimenga atshi, kabayi ne bualu, basomba mu ditalala. Bena Dane kuosha tshimenga atshi.

²⁸ Tshimenga tshia Layishe tshivua mu tshibandabanda tshia Bete-Rekobe, mutantshi mule ne Sidone. Bena Layishe kabavua ku bumfumu bua muntu mukuabu to. Ke pavua muntu nansha umue kayi ufika bua kubambuluisha. Bena Dane kuasulula tshimenga atshi, kusombamu.

²⁹ Kushintululabu dina dia Layishe, divuabu binyika tshimenga atshi kale. Kutshinyikabu ne: Dane, dina dia nkambua wabu, muana wa Yakobe.

³⁰ Bena Dane kuimanyika lupingu lua Mika bua kuntendelela. Yonatane, muana wa Ngershome (Ngershome uvua muana wa Moshe), kushala mutuangaji wa tshisamba tshia bena Dane. Ndelanganyi ya Yonatane ivua anu mu mudimu ewu wa butuangaji too ne pavua bantu baye mu bupika.

³¹ Bena Dane bavua anu batendelela lupingu lua Mika matuku onsu awa muaba wa tshijila wa Mvidi Mukulu mu Silo.