Balombodi 17 - MUKANDA WA MYIDI MUKULU

Mika udi utendelela kuende

¹ Mu buloba bua mikuna ya Efrayime, muvua muntu mulume, dina diende Mika.

² Dituku dikuabu Mika kuambila mamuende ne: — Uvuluke ne: bavua bakuibe nkanu ya tshiamu tshitoke tshia mushinga mukole tshinunu ne lukama. Wewe kutshipa muivi awu, meme muteleje. Kadi meme ndi ne nkanu ayi. Meme ke uvua muyangate. Mamuende kumuambila ne: — Muananyi, Maweja-Nangila akuele lupemba.

³ Mika kupingajila mamuende nkanu ayi tshinunu ne lukama. Mamuende kumuambila ne: — Ndi mumane kujadika bua kujidila nkanu eyi, ishale mu dina dia Maweja-Nangila, bua mutshipu kaukukuatshi wewe muananyi. Nkanu eyi neyikuambuluishe bua kuenza lupingu lua tshiamu tshienguluke. Nanku ndi nkupesha nkanu eyi mpindiewu.

⁴ Kadi Mika kupingajila tshiakabidi mamuende nkanu eyi. Mamuende umusha nkanu nkama ibidi, kupeshaye nsenda wa biamu. Awu kuenza lupingu lua tshiamu tshienguluke. Kutekabu lupingu alu mu nzubu wa Mika.

⁵ Kadi muntu ewu Mika uvua ne muaba wa kutendelela ku nzubu kuende. Kuenzejaye lupingu lukuabu, kabidi ne bintu bia kubuka nabi. Pashishe kubanjijaye muanende mukuabu wa balume, bua amuenzele mudimu wa batuangaji.

⁶ Tshikondu atshi, bena Izrayele kabavua ne mukalenga to. Nanku muntu yonsu uvua udienzela malu muvuaye musue.

⁷ Nsongalume mukuabu wa bena Levi uvua musombe bu muntu muenyi mu Betleyeme, musoku wa mu tshisamba tshia Yuda.

⁸ Kumukaye mu Betleyeme bua kuya kukeba muaba mukuabu wa kusomba bu muenyi. Pawaye mu njila, kufikaye ku nzubu kua Mika, mu buloba bua mikuna ya Efrayime.

⁹ Mika kumukonka ne: — Udi ufuma penyi? Nsongalume kuandamuna ne: — Ndi muena Levi wa mu Betleyeme mu tshisamba tshia Yuda. Ndi ngenda nkeba muaba wa kusomba bu muntu muenyi.

¹⁰ Mika kumuambila ne: — Usombe kuanyi, wikale tatu ne mutuangaji mu nzubu muanyi. Ku tshidimu tshionsu, nenkufute nkanu mitoke ya mushinga mukole dikumi. Neupete kabidi bilamba ne biakudia. Muena Levi kubuela mu nzubu,

¹¹ kuitaba bua kusomba kua Mika. Mika kumulama bimpe anu bu muanende.

¹² Mika kubanjija nsongalume awu, bua amuenzele mudimu wa butuangaji. Kumuladikaye ku nzubu kuende.

¹³ Mika kuamba ne: “Ndi mujadike mpindiewu ne: Maweja-Nangila neangenzele bimpe, bualu ndi ne muena Levi muikale mutuangaji wanyi.”